|
කේ.ඒ.ඩබ්ලිව් පොදු ජනතාවගේ සිනමාකරුවා
මීට තෙවසරකට පෙර අද වැනි දිනෙක (20) ඔහු අපෙන් සදහටම සමු ගත්තේය. කෙටි නමින්
හඳුන්වතොත් ඔහු කේ. ඒ. ඩබ්ලිව්. ය. කේ. ඒ. ඩබ්ලිව්. පෙරේරා ය.
ඔහුගේ වියෝව සිංහල
සිනමාවට එදාටත් වඩා අද තදින් දැනෙනු නිසැකය. පොදු ජන රුචිකත්වයට සරිලන චිත්රපට
තැනීමෙන්, චිත්රපට කර්මාන්තයේ පැවැත්ම සඳහා අරගලකාරී හඬක් නැඟීමෙන්,
ප්රතිපත්තිගරුක කලාකරුවකු ලෙස ආදර්ශවත්ව විසීමෙන් ඔහු සිංහල සිනමාවට හා පොදුවේ
සිනමා සංස්කෘතියට කළ මෙහෙවර මාහැඟිය.
 කේ. ඒ. ඩබ්ලිව්. සිනමාවට ප්රවිෂ්ට වූයේ සිංහල සිනමාවේ විප්ලවයක් සිදු කළ ‘රේඛාව
චිත්රපටයෙනි. ඔහු එහි දෙබස් රචකයා වූයේය.
ඉන් පසු ඔහු ‘සංදේශය’, ‘ගැටවරයෝ’, ‘සාරවිට’ වැනි චිත්රපටවලටද දෙබස් රචනා කළේය. කේ.
ඒ. ඩබ්ලිව්. ශූර දෙබස් රචකයකු යන්න විවාදයෙන් තොර පිළිගැනීමකි.
‘පිරිමියෙක් නිසා’ (සම අධ්යක්ෂණය) චිත්රපටයේ සිට ‘සුමේධා’ චිත්රපටය දක්වා ඔහු
අධ්යක්ෂණය කළ චිත්රපට සංඛ්යාව 26 කි.
කේ. ඒ. ඩබ්ලිව්. ගේ චිත්රපට සමස්තය සලකා බැලීමේදී ඒවා විග්රහ කළ හැක්කේ ජනප්රිය
චිත්රපට ධාරාව මත තබා යැයි මම සිතමි.
ඔහුගේ චිත්රපටවල ගීත, සටන්, නැටුම් වැනි
වට්ටෝරු අංගෝපාංග නොතිබුණා නොවේ. එහෙත් වෙනත් ‘වාණිජ’ චිත්රපටවල දක්නට නොලැබුණු
එක් සාධනීය ලක්ෂණයක් ඔහුගේ චිත්රපටවල තිබුණේය.
ඒ නම්, මනුෂ්යත්වයට ළං වූ චරිත එකී
චිත්රපටවල නිරූපණය වීමයි. ඔහු නිරන්තරවම කියා සිටි දෙයක් වූයේ තමා චිත්රපට තනන්නේ
පොදු ජන හදවත්වලට වදින්නට බවය.
ඒ අනුව හදවතට වදින තේමා, කතා, සිද්ධි හා දෙබස් ඒවාට
අන්තර්ගත වූයේය.
කේ. ඒ. ඩබ්ලිව්. තමා දෙබස් ලියූ හෝ අධ්යක්ෂණය කළ චිත්රපටවල ප්රධාන චරිත සඳහා
පොදුජන චරිත වස්තු විෂයය කර ගැනීමට ද විශේෂත්වයක් විය. ‘සාරවිට’ චිත්රපටයේ
කේන්ද්රීය චරිතය වූයේ සාරවිටකාරයෙකි. ‘බයිසිකල් හොරා’ චිත්රපටයේ බයිසිකලයක නැඟී
බත් පාර්සල් වෙළෙඳාමේ යෙදෙන්නකු ගැන ද ‘කතුරු මුවත්’ චිත්රපටයේ කතුරු මුවත්කාරයකු
ගැන ද කියැවිණි.
කේ. ඒ. ඩබ්ලිව්. ගේ සෑම චිත්රපටයකම අඩු වැඩි වශයෙන් පවුලේ පුරා වෘත්තයක් ගැබ්
වුවත් ඔහු විවිධ තේමා, වස්තු විෂයයන් කරා තම චිත්රපටවලදී ගමන් ගත් බව ‘සැනසුම
කොතැනද’, ‘කපටිකම’, ‘අපරාධය සහ දඬුවම’, ‘දුලීකා’, ‘ළසඳා’, ‘ජනක සහ මංජු’ වැනි
චිත්රපටවලින් සනාථ වෙයි.
 |
|
හිඟන කොල්ලා |
 |
|
වතුර කරත්තය |
 |
|
සැනසුම කොතැනද |
 |
|
දුර්ගා |
 |
|
ජනක සහ මංජු |
එසේම ඔහුගේ සිනමාපටවලින් බෞද්ධ දෘෂ්ටියක් ද විහිදුණු බව කිව හැකිය.
ඔහුගේ ‘බංගලි
වළලු’ සෘජුවම ජාතක කතාවක් සිනමාවට නැඟීමකි. ‘සැනසුම කොතැනද’, ‘ළසඳා’ ‘සසර’ වැනි
චිත්රපට ඔහුගේ බෞද්ධ ජීවන දැක්ම ප්රකට කරයි.
‘සැනසුම කොතැනද’, ‘ළසඳා’ හා ‘හිඟන කොල්ලා’ කේ. ඒ. ඩබ්ලිව්. වෙතින් නිර්මාණය වූ හොඳම
චිත්රපට තුන යැයි මම පෞද්ගලිකව සිතමි. ආදරය පිළිබඳ ඉතාම සංවේදී කතා පුවතක් ‘සැනසුම
කොතැනද’ චිත්රපටයට විෂය ක්ෂේත්ර වූයේය.
‘ළසඳා’ පතිවත රැක ගැනීමට තැත් දරන
ගැහැනියක පිළිබඳ අනුවේදනා පූර්වක කතාවකි.
එතෙක් මෙතෙක් අන්තර් ජාතික කතෝලික සම්මාන
දිනූ එකම ශ්රී ලාංකේය සිනමාපටය ‘ළසඳා’ ය. ‘හිඟන කොල්ලා’ අති වාණිජ චිත්රපටයක් වුව
ප්රබල නාටකීය ගතියකිනුත්, සිනමාරූපී ගුණයකිනුත් නිමවා තිබිණි.
‘හිඟන කොල්ලා’ වැනි සංකීර්ණ කතා සංදර්භයකින් යුත් ප්රබන්ධ කතාවකින් සාර්ථක තිර
නාටකයක් සකස් කිරීමෙන් කේ. ඒ. ඩබ්ලිව්. ප්රත්යක්ෂ කර සිටියේ තිර නාටක රචනයේ ඔහු
සතු විශ්මිත ප්රතිභාවය.
මෙය කරුණාසේන ජයලත් වැනි ප්රවීණයන්ගේ පවා ඇගැයීමට ලක්වී
ඇත. ‘හිඟන කොල්ලා’ වැනි නවකතාවක් ඇසුරෙන් තිර නාටකයක් සකස් කිරීම තිර රචනය ගැන තම
අත්දැකීමට අනුව ආශ්චර්යවත් ක්රියාවක් බව ජයලත් කියා තිබේ.
කේ. ඒ. ඩබ්ලිව්. ගේ
චිත්රපට ජීවිතයේ ලොකුම දස්කම හැටියට තමා සලකන්නේ ‘හිඟන කොල්ලා’ බවද ඔහු යථෝක්ත
ලිපියෙහිලා තවදුරටත් කියා ඇත.
කේ. ඒ. ඩබ්ලිව්. නිසැක වශයෙන්ම නළු නිළියන්ගේ අධ්යක්ෂවරයෙක් වූයේය. අපේ සම්භාව්ය
සිනමාව විසින් ළාදුරු රෝගීන් සේ සලකා බැහැර කර දමනු ලැබූ නළු නිළි පිරිසකගෙන්
විශිෂ්ට චරිතාංග නිරූපණ ලැබ ගැනීමට ඔහු සමත් වූයේය.
පියදාස ගුණසේකර (සැනසුම කොතැනද,
ළසඳා) ඩොමී ජයවර්ධන (ළසඳා) ඩී. ආර්. නානායක්කාර (බයිසිකල් හොරා, කතුරු මුවත්),
සන්ධ්යා කුමාරි (සැනසුම කොතැනද), ඔස්වල්ඩ් ජයසිංහ (අපරාධය සහ දඬුවම, ළසඳා), නීටා
ප්රනාන්දු (ළසඳා) මෙන්ම උපාලි අත්තනායක, හර්බට් අමරවික්රම, සම්පත් ශ්රී
නන්දලෝචන, සෝනියා දිසා වැනි නළු නිළියන්ගේ විශිෂ්ට රඟපෑම් කේ. ඒ. ඩබ්ලිව්. ගේ
සිනමාපටවල අපට දක්නට ලැබේ.
එම නළු නිළියන්ගෙන් උපරිම රංගන හැකියාවන් මතු කර ගැනීමට
කේ. ඒ. ඩබ්ලිව්. ට හැකි වූයේය.
පොදු ජන රුචිකත්වයට සරිලන අයුරින් චිත්රපට තනා එම චිත්රපට පොදු ජනතාව අතරට ගෙන
යෑමෙන් කේ. ඒ. ඩබ්ලිව්. කළ යුග කාරක මෙහෙවර ඉතාම ප්රශංසනීයය. ඒ සඳහා ඔහුට
‘දීපශිඛා’ සම්මානය පවා පිළිගැන්විණි.
දේශීය චිත්රපට කර්මාන්තයක් ගොඩ නැංවීමටත් එය නොයෙක් අර්බුදයන්ට මැදි වූ තීරණාත්මක
අවස්ථාවලදී ආරක්ෂා කර ගැනීමටත් කේ. ඒ. ඩබ්ලිව්. දැරූ පරිශ්රමය ද අපේ ගෞරවයට ලක්
විය යුත්තකි.
1972 දී ජාතික චිත්රපට සංස්ථාවක් පිහිටුවීමට පුරෝගාමී වූවන්ගෙන් කේ.
ඒ. ඩබ්ලිව්. ප්රමුඛයෙකි.
1994 දී මුළු චිත්රපට කර්මාන්තයම දැවැන්ත අර්බුදයකට ඇද
හෙළෙද්දී ඔහු ‘ජාතික චිත්රපට ආරක්ෂක සංවිධානය’ නමින් සංවිධානයක් ගොඩ නංවාගෙන දේශීය
සිනමාව ආරක්ෂා කර ගැනීමට විශාල කාර්යය භාරයක් ඉටු කළේය.
කේ. ඒ. ඩබ්ලිව්. දේශපාලන වේදිකාවට පවා නැඟ උගුරේ ලේ රහ වන තුරු කෑ ගැසුවේ සිනමා
කර්මාන්තයේ අභිවෘද්ධිය උදෙසාය.
ඔහු කිසි විටෙකත් එම වරප්රසාද භාවිතා කරමින්
සංස්ථාවේ සභාපතිකම් ගැනීමට හෝ බාර් ලයිසන් ගැනීමට හෝ තම දරුවන් සුපිරි පාසල්වලට දමා
ගැනීමට නොගියේය.
කේ. ඒ. ඩබ්ලිව්. මිය යන විට ඔහුගේ බැංකු ගිණුමේ තිබුණේ රුපියල් 600
ගණනක් බව ඔහුගේ පුත් ජයන්ත දාස් පෙරේරා වරක් ගුවන් විදුලි සාකච්ඡාවකට සහභාගි වෙමින්
කියා සිටියේය.
කේ. ඒ. ඩබ්ලිව්. මිය යන තුරුම ප්රතිපත්ති ගරුකව සිටියේය. ඔහු හැම විටම අදීන මත
දැරුවේය. ඊට එක් නිදසුනක් මෙසේය.
1994 දී කේ. ඒ. ඩබ්ලිව්. චිත්රපට සංස්ථා උපදේශක
මණ්ඩලයෙන් ඉල්ලා අසු වූයේය. ඊට හේතු වූයේ ‘නොමියෙන මිනිසුන්’ චිත්රපටය පෝලිමෙන්
පිට පැන ප්රදර්ශනය කිරීමට විරෝධය පාමිනි.
කේ. ඒ. ඩබ්ලිව්. අප්රාණික වස්තූන්ට පවා ගරු සරු දැක් වූවෙකි. ඔහු චිත්රපට
අධ්යක්ෂණය කිරීමෙන් එකතු කර ගත් මුදලකින් හැටේ දශකයේ දී පමණ මිලට ගත් ෆෝඩ් මෝටර්
රථය (4 ශ්රී 3112) තමා මිය ගියායින් පසුවවත් නොවිකුණන ලෙස පවුලේ අයට කියා තිබුණේය.
කේ. ඒ. ඩබ්ලිව්. ජීවතුන් අතර සිටියදී ඔහුගේ පුත් ජයන්ත දාස් පෙරේරා දිනක් පියා හමු
වී මෙසේ කීවේය.
‘තාත්තේ කාර් එක විකුණන්න අදහසක් නැද්ද? මගේ යාළුවෙක් ගන්න කැමැතියි’.
කේ. ඒ. ඩබ්ලිව්. ට කේන්ති ගියේය.
‘කාර් එක විකුණන්න? උඹේ යාළුවට කියපන් මං උඹව වික්කත් කාර් එක විකුණන්නේ නැහැයි
කියලා’.
යැයි ඔහු කියා සිටියේය. ජයන්ත දාස් කට පියාගෙන හෙමිහිට පියා වෙතින් ලිස්සා ගියේය.
කේ. ඒ. ඩබ්ලිව්. ගේ මරණයෙන් පසු ඔහුගේ ආදරණීය බිරිය එම මෝටර් රිය හුණුපිටියේ
ගංගාරාමයට පූජා කළාය. එහි මෝටර් රථ කාර්මික පුහුණුව ලබන සිසුහු අද එයින් කිසියම්
ප්රයෝජනයක් ගනිති.
සුනිල්
මිහිඳුකුල
|
