අපේ සංගීතවේදීන්ට ඉන්දියාවේදී ගී ගැයූ එස්.පී.බාලසුබ්‍රමනියම් 1946-2020

ඔක්තෝබර් 1, 2020

පසුගිය කාලයේ කොරෝනා වෛරසය ලොව පුරා පැතිර ගියේ තරාතිරම් නොබලා මිනිසුන් වැලඳ ගනිමිනි. ඇතැම් රටවල් එම අභියෝගයට සාර්ථකව මුහුණ දෙන විටදී තවත් රටවල් රෝගීන් සහ මරණ විශාල සංඛ්‍යාවන්ට හිමිකම් කියන්නට විය. කලා ක්ෂේත්‍රයටද එයින් දැඩි බලපෑමක් එල්ල වූ අතර ලොව ජනප්‍රිය තරු කිහිප දෙනෙකුටම වෛරසය ආසාදනය වූ පුවත් ද වාර්තා විය. ඉන්දීය සිනමා සංගීත අඹරේ දැවැන්ත තරුවක් වූ එස්. පී. බාලසුබ්‍රමනියම් ද කොරෝනා වෛරස් වසංගතයේ ගොදුරක් වී පසුගිය සැප්තැම්බර් 25 වැනිදා මෙලොවින් සමුගෙන ගියේය.

එස්පී බාලු හෙවත් ශ්‍රීපති පණ්ඩිතාරාධ්‍යුල බාලසුබ්‍රමනියම් සැමදා තාරුණ්‍යයට හිමිකම් කියූ හඬක් සතු වූ ගායකයෙක් විය. ගායකයතු පමණක්ම නොව සංගීත අධ්‍යක්ෂකවරයෙක්, නළුවෙක් මෙන්ම චිත්‍රපට නිෂ්පාදකයෙක් ද විය. වසර 55 කට ආසන්න කාලයක් පුරා ඔහු ඉන්දීය සංගීත ක්ෂේත්‍රය තුළ ඉන්දියානු භාෂා 16 කින් ගීත 40,000 කට වඩා ගායනා කර තිබේ. ඒ සමඟින් ගිනස් ලෝක වාර්තාවක් ද ඔහු සතු විය. කන්නඩ, තෙළිඟු, දෙමළ, මලයාලම් සහ හින්දි සිනමා ක්ෂේත්‍ර සියල්ලම එස්පී බාලුගේ හඬින් ගීතවත් වී ඇත. 

බාලසුබ්‍රමනියම් කුඩා කල සිටම සංගීතය කෙරෙහි උනන්දුවක් දැක්වූවෙක් විය. සංගීත අධ්‍යාපනය ලැබුවද ඔහු ඉංජිනේරුවෙකු වීමේ අදහසින් අනන්තපූර්හි ජේ.එන්.ටී.යූ ඉංජිනේරු විද්‍යාලයට ඇතුළත් වුවද එය සංගීත කටයුතුවලට බාධා නොවීය. 1964 දී මදුරාසි හි තෙළිඟු සංස්කෘතික සංවිධානය විසින් සංවිධානය කරන ලද ආධුනික ගායකයින් සඳහා වූ සංගීත තරඟයකදී ඔහු සිය පළමු ත්‍යාගය දිනා ගත්තේය. ටයිෆොයිඩ් හේතුකොට ගෙන ඔහු ඉංජිනේරු අධ්‍යාපනය නවතා චෙන්නායිහි ඉංජිනේරු ආයතනයට සහකාර සාමාජිකයෙකු ලෙස සම්බන්ධ විය.

ඔහු සිනමා පසුබිම් ගායනයට පිවිසියේ 1967 වසරේ තිරගත වූ ශ්‍රී ශ්‍රී ශ්‍රී මර්යාදා රාමන්නා නම් තෙළිඟු චිත්‍රපටයෙනි. එයින් දින අටකට පසු ඔහුගේ දෙවැනි චිත්‍රපට ගීතය කණ්ණඩ බසින් ගායනා කළේය. ඔහුගේ පළමු දෙමළ ගීතය වන්නේ එල්. ආර් ඊෂ්වරී සමඟින් 'හොටෙල් රම්බා' චිත්‍රපටය වෙනුවෙන් ගැයූ "අතනාඩු ඉප්පාඩි ඉරුන්දු එත්තනායි නාලාචු" ගීතයයි. නමුත් එය තිරගත නොවූ චිත්‍රපට ලැයිස්තුවට ඇතුළත් විය. ජී. දේවරාජන් විසින් ඔහු මලයාලම් සිනමා කර්මාන්තයට හඳුන්වා දෙන ලද්දේ 'කඩල්පාලම්' චිත්‍රපටයෙනි. ගායකයෙකු විසින් එක් දිනකදී වැඩිම ගීත ගායනා කිරීමේ ගෞරවය ද ඔහුට හිමි වේ. සංගීතඥ උපේන්ද්‍ර කුමාර් වෙනුවෙන් එක් දිනකදී ඔහු කන්නඩ බසින් ගීත 21 ක් පටිගත කිරීමට දායක වී ඇත. දෙමළ බසින් ගීත 19ක් සහ හින්දි බසින් ගීත 16 ක් ද මෙලෙසින් පටිගත කර තිබේ. 

එම්. ජී. රාමචන්ද්‍රන්, සිවාජි ගනේෂන් වැනි නළුවන් වෙනුවෙන් ගී ගැයූ ඔහු පී. සුෂීලා, එස්. ජානකි, වානි ජයරාම් සහ එල්. ආර්. ඊශ්වරී වැනි ගායිකාවන් සමඟින් යුග ගී ගැයුවේය. ජනප්‍රිය සංගීතඥ ඉලෙයරාජා සමඟ බාලසුබ්‍රමනියම් ඇසුර ආරම්භ වූයේ ඉලෙයරාජා සිනමා       ක්ෂේත්‍රයට පැමිණීමට පෙරදීය. එවකට හාර්මෝනියම් සහ ගිටාර් වාදකයෙකු වූ ඉලෙයරාජාගේ ප්‍රසංග සඳහා බාලසුබ්‍රමනියම් ද සහභාගි විය. 'කරකට්ටක්කරන්' (1989) දමිළ චිත්‍රපටයේ ''මාන්ගුයිලේ''  ගීතය ඉලෙයරාජා සහ බාලසුබ්‍රමනියම් සංයෝජනයෙන් ඉන්දීය සිනමාවට දායක කළ ජනප්‍රිය ගීතයකි. එම ගීතය ඉලෙයරාජා ඔහු කෙරෙහි තැබු විශ්වාසය පවසන බවද ක්ෂේත්‍රයේ ප්‍රකටය. 1989 දී බාලසුබ්‍රමනියම් 'මේන් ප්‍යාර් කියා' චිත්‍රපටයේ සල්මාන් ඛාන්ගේ පසුබිම් ගායකයා වූයේය. එම චිත්‍රපටය ඉතා සාර්ථක එකක් වූ අතර බාලසුබ්‍රමනියම් ''දිල් දීවානා'' ගීතය සඳහා හොඳම පසුබිම් ගායකයා වෙනුවෙන් වූ ෆිල්ම්ෆෙයාර් සම්මානය දිනා ගත්තේය. පසුව අනූව දශකය පුරා සල්මන් ඛාන්ගේ චිත්‍රපට වෙනුවෙන් ප්‍රේමණීය ගී හඬ දුන්නේ බාලසුබ්‍රමනියම් විසිනි. ඒ. ආර් රහ්මාන්ගේ කුලුඳුල් සංගීත අධ්‍යක්ෂණය වූ මනිරත්නම්ගේ 'රෝජා' (1992) චිත්‍රපටයේ එන ඉන්දියානු සිනමාවේ මෙතෙක් පැවති හොඳම ආදර ගීතයක් ලෙසින් සැලකෙන ''කාදල් රෝජාවේ'' ගීතයට හඬ දුන්නේද බාලසුබ්‍රමනියම් විසිනි. රජිනි කාන්ත් සහ ශෝබනා රංගනයෙන් එක් වූ මනිරත්නම්ගේ 'තලපති' (1991) චිත්‍රපටයේ ඉලෙයරාජාගේ සංගීතයට බාලසුබ්‍රමනියම් විසින් ගැයූ ''සුන්දරි කන්නල්'' ගීතයද ඔහුගේ ඉහළ ජනප්‍රියත්වයක් ලද ගීත අතර වේ. 'කර්නා' (1995) චිත්‍රපටයේ ''මලරේ මෞනාමා'' ගීතය ද ඔහුගේ වෘත්තීය ජීවිතයේ හොඳම ගීත අතරින් එකකි. 

දශක හතරකට පෙර අධ්‍යක්ෂ කේ. විශ්වනාත් ශාස්ත්‍රීය සංගීතය හා නර්තනය පදනම් කරගෙන නිර්මාණය කළ 'සංකරාභරනම්' (1980) චිත්‍රපටයද ඉහල සාර්ථකත්වයක් සමඟින් ඉතිහාස ගත වූ චිත්‍රපටයකි. කේ.වී. මහදේවන්ගේ සංගිතයට බාලසුබ්‍රමනියම් එහි ඇතුළත් ගීත දහයෙන් එකක් හැර අන් සියල්ලම ගායනා කළේය. බාලසුබ්‍රමනියම් විසින් දිනා ගත් ජාතික සම්මාන හයෙන් පළමුවැන්න ලබා ගත්තේ එහි එන ''ඔම්කාරා නාදානු'' ගීතය වෙනුවෙනි. දකුණු ඉන්දියාව පුරා රසිකයන් දිනාගෙන වසර දෙකකට පසු ඔහු හින්දි සිනමාව වෙනුවෙන් ද ගී ගැයුවේය. ඔහුගේ දෙවන ජාතික සම්මානය දිනා ගත් 'ඒක් ඩුජේ කේ ලියේ'  (1981) චිත්‍රපටයේ ''තෙරේ මේරේ බීච් මෙයින්'' ගීතය ගැයුවේ කමල හසන්ගේ රංගනය වෙනුවෙනි. 'කෙලඩි කන්මනී' (1990)  චිත්‍රපටයේ ඉලෙයරාජාගේ තවත් තනු නිර්මාණයක් වූ ''මැනිල් ඉන්දා කඩල්'' ගීතය රජිනිකාන්ත් හෝ කමල් හසන් වෙනුවෙන් නොව රාධිකා සරත්කුමාර් සමඟින් කළ ඔහුගේම රංගනය වෙනුවෙන් ගැයූ ගීතයකි. 

ලතා මංගේෂ්කාර්, ඌෂා මංගේෂ්කාර්, අල්කා යාග්නික්, අනුරාධා පෞද්වල්, ආශා භෝස්ලේ, සප්නා මුඛර්ජි, ජොනිතා ගාන්ධි ඔහු සමඟින් හින්දි යුග ගී ගැයු ගායිකාවන් වේ. 'සාගර්' (1984), 'චෝර් චෝර්' (1993), 'හම් ආප්කේ හේ කෝන්' (1993), 'සාජන්' (1990) වැනි චිත්‍රපටවල ඉහල ජනප්‍රියත්වයක් ලද ගීත බොහොමයක් ගැයුවේ ද ඔහු විසිනි. 'හම් ආප්කේ හේ කෝන්'  චිත්‍රපටයට ලතා මංගේෂ්කාර් සමඟින් ගැයූ "දිදි තේරා දීවර් දිවානා", 'සාජන්' චිත්‍රපටය වෙනුවෙන් ගැයූ "බොහත් ප්‍යාර් කර්තේ හේ","දේඛා හේ පෙහෙලී බාර්", "තුම්සෙ මිල්නෙ කි තමන්නා", "ජියේ තෝ ජියේ කේසී" ගීත බාලසුබ්‍රමනියම් විසින් හින්දි සිනමාව වෙනුවෙන් ගැයූ අතිශය ජනප්‍රිය ගී අතර වේ. 2013 වසරේ ශාරුක් ඛාන් රඟපෑ 'චෙන්නායි එක්ස්ප්‍රස්' චිත්‍රපටයේ "චෙන්නායි එක්ස්ප්‍රස්" ගීතය ගායනයට දායක වූයේ පහළොස් වසරකට පසු හින්දි සිනමාවට යළි එක් වෙමිනි.  

ගායකයකු, නළුවකු ලෙස පමණක් නොව බාලසුබ්‍රමනියම් දක්ෂ හඬ කැවීමේ ශිල්පියෙකුද විය. එය සිදුවූයේ අහම්බයකිනි. එනම් කේ.බාලචන්දර්ගේ 'මන්මධා ලීලා' චිත්‍රපටයේ තෙළිඟු පිටපතේ කමල හසන් රඟපෑ චරිතයට හඬ දෙමිනි. රජිනිකාන්ත්, විෂ්ණුවර්ධන්, සල්මන් ඛාන්, අනිල් කපූර්, ජෙමිනි ගනේෂන්, අර්ජුන් සර්ජා, නාගේෂ්, කාර්තික්, රඝුවරන් වැනි නළුවන් වෙනුවෙන් ඔහුගේ හඬ දායකත්වය ලබා දුන්නේය. 'ගාන්ධි' (1982) චිත්‍රපටයේ තෙළිඟු පිටපතේ බෙන් කිංස්ලිගේ රංගනය වෙනුවෙන් ද ඔහු හඬ කැවීය. 'දසවතාරම්' (2008) හි තෙළිඟු පිටපත සඳහා කමල හසන් විසින් පණ පෙවූ චරිත දහයෙන් කාන්තා චරිතය ඇතුළුව චරිත හතක් ද ඔහුගේ හඬ කැවීම් අතර විශේෂ වේ. ඔහු හොඳම හඬකැවීමේ ශිල්පියා ලෙසින් සම්මානයටද පාත්‍ර වී තිබේ.

එස්.පී.බාලසුබමනියම් පේ‍්‍රමසිරි කේමදාසයන්ගේ සංගීතයට අවස්ථා දෙකකදී ගී ගැයූවේය. ඒ ලාංකික සිනමාකරු ටී.අර්ජුන අධ්‍යක්ෂණය කරන ලද වසන්තතිල් ඔරු වාන විල් නම් දමිල චිත්‍රපටය උදෙසාය. එමෙන්ම ධීනදයාලන් අධ්‍යක්ෂණය කළ වේලම් කොට්ට තාලි කට්ටු චිත්‍රපටයටද ගී ගැයුවේය.

එසේම ඔහු අවසාන භාගයේ ප්‍රවීණ සංගීතවේදී සරත් වික්‍රමයන්ගේ සංගීතයට නාද සංගත තැටියට ගීතයක් ගැයුවේය.

එස්. පී. බාලසුබ්‍රමනියම් මදුරාසි (වර්තමාන අන්ද්‍රා ප්‍රදේශ්) නෙල්ලූර් හි තෙළිඟු බ්‍රාහ්මණ පවුලක උපත ලැබූවෙකි. ඔහුගේ පියා එස්. පී. සම්බමූර්ති, හරිකතා කලාකරුවෙකි. හරිකතා යනු ආන්ද්‍රා ප්‍රදේශ්, මහාරාෂ්ට්‍ර සහ කර්ණාටක යන ප්‍රදේශවල බහුලව දක්නට ලැබෙන කතන්දර, කවි, සංගීතය, නාට්‍ය, නැටුම් හා දර්ශන වලින් සමන්විත වූවකි. බාලසුබ්‍රමනියම්හට ගායිකා එස්. පී. සයිලාජා ඇතුළුව සහෝදරියන් පස් දෙනෙකු සහ සහෝදරයන් දෙදෙනෙකු විය. සාවිත්‍රි සමඟ විවාහයෙන් පල්ලවි දියණියත් පුත් චරන් ඔහුගේ දිවියේ ආලෝකය විය. පුත් එස්. පී. චරන් දකුණු දකුණු ඉන්දියානු ගායකයෙක් සහ නළුවෙක් සහ නිෂ්පාදකයෙක් ද වේ. බාලසුබ්‍රමනියම් හොඳම පසුබිම් ගායකයා ලෙසින් ඉන්දීය ජාතික චිත්‍රපට සම්මාන හයක් දිනා ගත්තේය. ෆිල්ම්ෆෙයාර් සම්මාන 4ක්, දකුණු ඉන්දීය ෆිල්ම්ෆෙයාර් සම්මාන 6ක් ඇතුළුව ඔහු තවත් සම්මාන රැසකින් පිදුම් ලැබූවෙකි. ඉන්දියානු රජයෙන් පිදෙන පද්ම ශ්‍රී (2001) සහ පද්ම භූෂන් (2011) සම්මානයන්ගෙන් ද පුද ලැබීය.

කොවිඩ් 19 වසංගතය මධ්‍යයේ සුවිශාල මෙහෙවරක නිරත වූ පොලිසිය, හමුදාව, වෛද්‍යවරුන්, හෙද හෙදියන් වැනි පුද්ගලයින්ට උපහාර වශයෙන් පසුගිය මැයි මාසයේදී ඉලෙයරාජා විසින් නිර්මාණය කළ "භාරත් භූමි" නම් ගීතයටද බාලසුබ්‍රමනියම්ගේ දායකත්වය ලැබුණි. කෙසේ නමුත් එම වෛරසයටම ගොදුරුව චෙන්නායිහිදී ඔහු මිය යන විට 74 වැනි වියේ පසු විය. ඔහුගේ අවසන් සිනමා පසුබිම් ගායනය ඇතුළත් වන්නේ තිරගත වීමට නියමිත ශිවා විසින් අධ්‍යක්ෂණය කර රජිනිකාන්ත් රංගනයෙන් දායක වූ 'අන්නාත්තේ' දෙමළ චිත්‍රපටයටයි. එස්පී බාලසුබ්‍රමනියම්ගේ අභාවයෙන් පසු ඉන්දීය අගමැති නරේන්ද්‍ර මෝදි පවසා සිටියේ, තම කලා ලෝකය බෙහෙවින් දුගී වූවා සේ දැනෙන බවයි.