නවකතාවක් ඇසුරෙන් මෙරට බිහි වූ පළමු සිනමාපටය වූ කැලෑහඳ හි ජෝන් ජයපාල ලෙස රඟපෑ ස්ටැන්ලි පෙරේරා 50, 60 දශකවල බැබළුණු තරුවක් විය. ඔහුගේ බිරිඳ ගර්ලි ගුණවර්ධන, දියණිය සබීතා පෙරේරා ද සිනමාව් කැපී පෙනෙයි. ස්ටැන්ලි පෙරේරා රඟපෑ සිනමාපට අතරින් සේපාලි, සරදම්, අයිරාංගනී, ගංතෙර, චණ්ඩාලි, ළාදළු, සොඳුරු යුවළ, සුදු දුව, හතර කේන්දරේ ඇතුළු චිත්‍රපට රාශියකි. මෙවැනි නළුවන් විටින් විට සිහිපත් කළ යුතුයි.
----------------------
හෙන්රිට සුබපැතුම්
සිංහල සිනමාවට නව ජීවයක් දුන් කාන්තාවට සිනමාවේ දොරටු විවෘත කළ හෙළයේ මහා ගීත කෝකිලාවිය රුක්මණී දේවියෙගේ 97 වන උපන් දිනය ඉතාමත් උත්සවශ්‍රීයෙන් විශාල රසික කැලකගේ සහභාගිත්වයෙන් මෙවර ද සමස්ත ලංකා බෞද්ධ කාන්තා සමිති සංගම් ශාලාවේදී පැවැත්විණ. නළු නිළියන්, විද්වතුන් රාශියක් රුක්මණී දේවියගේ පැරැණි ගී ශ්‍රවණය කිරීමට පැමිණීම ඉතාමත් සතුටකි. මෙම සියලුම දේ තම කරට ගත් රුක්මණී දේවි අනුස්මරණ සංගමයේ නිර්මාතෘ, සභාපති හෙන්රි ප්‍රියශාන්ත මෙන්ඩිස් මහතා තම ජීවිතය නිසි මඟට යොමු කළ ඒ මහා ගීත කෝකිලාවියගේ උපන් දිනය පෙර මෙන්ම මෙවර ද සමරනු ලැබුවේ ඇයට කරනා කෘතගුණ සැලකීමක් ලෙසිනි. මෙවර මෙන්ම ලබන වසරේදීත් මෙම වටිනා ගීත යටපත් වීමට නොදී අපට ඇසීමට සැලසීමට ඔබතුමාට නිරෝගී සම්පත් හිමි වේවායි ප්‍රාර්ථනය කරමු.
සුසිලා පතිරාජ
උස්වැටකෙයියාව
-----------------------
තල්ලුව දුන් ගැලරිය
70 - 80 දශකයන් සිනමාවේ ස්වර්ණමය යුගයන් ලෙස හැඳින් වුවහොත් වැරදි නැත. චිත්‍රපටයක් විකාශය කර අවසානවීමටත් පෙර ඊළඟ කාලයට පෝලිම් ගැහිලාය. එකල සිනමාහල්වල ගැලරියට හිමි වූයේ සුවිශේෂි තැනකි. එම පීඩිත පංතියේ විසිල් පාරට මුළු සිනමා ශාලාවම ගිගුම් දුන්නේය. හරියට සිංහල සිනමාව ඔවුන් අතට ගත්තා සේය. අවම පහසුකම් යටතේ වුව ද ‘මකුණෝ’ වැනි කෘමින්ගේ ප්‍රහාර මැද ඔවුන් සිංහල සිනමාවට දුන් තල්ලුව නම් සුළුපටු නොවේ. ඒත් අද කෝ ඒ සිනමාව. විවෘත ආර්ථික රටාවත් සමඟ හැම දේ ක්ෂණික දේවල් බවට පත්ව සිංහල සිනමාව ක්ෂණික නූඩ්ල්ස් ගණයට පත් වෙලාය. අතීතයේ අප දුටු සිනමාවේ සුන්දරත්වයට මොකද වුණේ. අප අපෙන් විමසිය යුතුය.
ජගත් චන්ද්‍රසිරි
පූජා ජගත්සිරි
පස්යාල
--------------------
කලාකරුවන් සැමරීමට දිනයක්
සදා මතකයේ රැඳුණු චරිත රඟපාමින් අප මෝහනයට පත් කළ නළු නිළියන් මෙන්ම ගායක ගායිකාවන් ද බොහොමයක් අද ජීවතුන් අතර නැතත් ඔවුන් රඟපෑ චරිත මෙන්ම ගැයූ ගීතයන් ද අද ද සිත් සතන්හි නොමැකී පවතී. එසේ මිය ගිය නළු නිළියන් ගායක ගායිකාවන් නිවේදක නිවේදිකාවන් ආදී වූ සියලුම කලාකරුවන් සැමරීම සඳහා දිනයක් වෙන් කර ගැනීම වගකිව යුත්තන්ගේ මෙන්ම අප සැමගේ යුතුකමක් බව මගේ හැඟීමයි.
කල්‍යාණ ජයනෙත්ති
උණවටුන
------------------------
කෝපි කඩේ විරාම වැඩියි
සෙනසුරාදා දිනයන්හි රාත්‍රී 7.30 ට ස්වාධීන රූපවාහිනී සේවය තුළින් දශක ගණනාවක් පුරා විකාශය වන ‘කෝපි කඩේ’ ටෙලි නාට්‍ය මාලාව ගමේකම අපේකම විදහා දැක්වෙන නරඹන සැමට උසස් රස වින්දනයක් ගෙන දෙන්නකි.
එනමුදු මෙහි විරාමයන් (වෙළෙඳ දැන්වීම්) මොහොතක් පාසා විකාශය කිරීමෙන් නාට්‍යයෙහි රස වින්දනයට ඉමහත් බාධාවකි. මින් රැකියාව නිමවා වෙහෙසකරව නිවෙසට පැමිණ මෙය නරඹන ජනතාව තවත් වෙහෙසට පත් කරවන්නකි.
සරත් ලියනගේ
රන්මුතුගල
-------------------------
ඉංග්‍රීසි බසින් තැනුණ
අපේ සිංහල චිත්‍රපට
God King - ගෝඩ් කිං - ලෙස්ටර් ජේම්ස් පීරිස්
Rampage - රැම්පේජ් - මණික් සන්ද්‍රසාගර
Sitha Devi - සීතා දේවි - මණික් සන්ද්‍රසාගර
Till death do us part - රාජා ද සිල්වා
It’s the matter of time- රෝයි ද සිල්වා
It’s the matter of love - රෝයි ද සිල්වා
ඩඩ්ලි ගෝමස්
මොරටුව
--------------------
නර්තන ත්‍රිමූර්තිය
මනස්කාන්ත නැටුම් ශෛලියෙන් රිදී තිරය විකසිත කළ නර්තන ප්‍රතිභාවේ ත්‍රි මුහුර්තිය හෙලන් කුමාරි, ෆරිනාලායි සහ සුමනා ගෝමස්ය. පේ‍්‍රක්ෂක දෙසවනට නර්තනයේ සුන්දරත්වය එක් කළ මෙම ත්‍රි මුර්තිය අද වන විට සිනමා නර්තනයෙන් ද සමුගෙන හමාරය. රිදී තිරයේ ඔබලා මැවූ ඒ නර්තන සැමදා රසික මතකයේ රැඳී ඇත.
එච්. ඉන්ද්‍රපාල
මුංහේන
--------------------
නිරෝෂා විරාජිනීට
‘සුදු ඇත්පොව්වෙක් සුදු පියුම හොඬින් ගෙන’ මේ ගීතය එදා හිරුස්ටාර් වේදිකාවෙන් ඇසෙත්ම සැමගේ නෙතට සතුටු කඳුළක් එක් විය. නිරෝෂා ඔබට තව තවත් ශක්තිය ධෛර්ය අපි මුළු හදින්ම ප්‍රාර්ථනා කරමු.
වික්‍රමසුන්දර දයාරත්න
රෝහිණි දයාරත්න
දිවුලපිටිය
-------------
තවත් දක්ෂ නිළියක්
අප අතර සිටින තවත් දක්ෂ නිළියක බවට නෙරංජනී ශන්මුගරාජා ‘සුනාමි’ චිත්‍රපටයෙන් ඔප්පු කර ඇත. සිංහල සිනමාවේ අනාගතය වෙනුවෙන් තව තවත් වටිනා නිර්මාණවලට දායක වෙමින් ඔබේ ප්‍රතිභාව දක්වන්න. ඔබට සදා ජය.
කෙනත් පෙරේරා
ජාඇල
------------------
රෝයි පීරිස් ජීවමානයි
හිතවත් රෝයි පීරිස් ගායන ශිල්පියාණෙනි මා දෑසේ වේදනා ගීතයෙන් රටම පිනවා නොසිතූ මොහොතක අප දෑසට වේදනා තියලා ඔබ සදහටම නික්ම ගිහින් වසර 3 ක් සපිරුණත් රසික අප මතකයෙන් ඔබ නික්ම යන්නේ නැත. ඔබේ මධුර හඬින් ගැයූ රත්තරං ප්‍රාර්ථනා, සුදු රෝස මල් හිනාව, කඳුළු ලියකම්, ඔබ නෑසූ කතාවක්, හද සාගරේ, මා තනි වෙන්නම්, ඔබ ආදරේ මා කෙරේ නම්, අම්මේ යන්න එපා දුර රටකට, ආලවන්ත ගැටව් හන්දියේ වැනි සුමියුරු ගීත කිසිදා මිය නොයයි. එවැනි ගීතවල ඇති රස අද තියෙන ප්‍රේම විලාප ගීතයන්වල නැත. ඔබේ මා දෑසේ වේදනා, රත්තරං ප්‍රාර්ථනා ගීත දෙක වෙන කවුරුත් ගයනවා අහන්න සිදු වූයේ රසික අපේ අවාසනාවටයි. ඒ කාටවත් රෝයි පීරිස් කෙනෙක් වෙන්න බෑ. අපි ඔවුන් පිළිගන්නේ ද නැත. අදත් මතුවටත් ඔබ අප හදවතේ අමරණීයයි.
එච්. එච්. සුසන්ත සම්පත්
