Feedback

Week of නොවැම්බර් 26, 2020

වාසුලිය ගෙනෙන පවිත්‍රාට
නොවැම්බර් 26, 2020 ~ ඩබ්. කේ. මොහාන් ~ මහවැලි සී කලාපය

ජාතික රූපවාහිනියේ විකාශය වන වැඩසටහන් අතර සෙනසුරාදා දින විකාශය වන වාසුලිය වැඩ සටහන ප්‍රේක්ෂකයන් අතර ඉතාම ජනප්‍රිය වී තිබේ.

ඉතාම සිත් ඇද ගන්නා ලෙස මෙම වැඩ සටහනට නිවේදනයෙන් පණ පොවන්නේ නිවේදිකා පවිත්‍රා අමරසිංහයි.

ඇය ඉතාම ලස්සනට සිත් ඇද ගන්නා ආකාරයට වාසුලිය වැඩසටහන කරගෙන යනු ලැබේ. දැනට පුංචි තිරයේ ජනප්‍රියම වැඩ සටහනක් බවට වාසුලිය පත් වි තිබෙන්නේ ඇයගේ දක්ෂතාවය නිසාමය. පවිත්‍රා අමරසිංහ ඔබට දිගු ගමනකට සුබපැතුම්.

 

 

කුමුදු නිශාන්තට
නොවැම්බර් 26, 2020 ~ චන්දන වන්නිආරච්චි ~ දෙහිඅත්තකණ්ඩිය

මෙරට ටෙලි වංශ කතාවේ දීර්ඝ ඉතිහාසයකට නෑකම් කියන කලාකරුවෙකු වශයෙන් කුමුදු නිශාන්ත නැමති කලාකරුවා හැඳින්විය හැකිය. තම තරුණ අවධියේ සිටම ටෙලි නාට්‍ය රංගනයට එක් වී ඇති කුමුදු ඉතාම දක්ෂ නළුවෙක් වශයෙන් හඳුන්වා දිය හැකිය. ලැබෙන කුමන චරිතයකට වුව ද මනා සාධාරණයක් ඉටු කරන ඔහුට එම චරිතය කළු ද සුදු ද යන්න අදාළ නැත.

 

 

පෝරුතොට පියතුමන් කාටත් ආදර්ශයක්
නොවැම්බර් 26, 2020 ~ නිමල් කුලසේකර ~ අඟුලාන

ගරු අර්නස්ට් පෝරුතොට පියතුමන් දේශීය සිනමාවට කළ අමිල මෙහෙවරත් පොදුවේ සියලුම මානව වර්ගයනට ඉතා ගෞරවණීය ලෙසත් නීතිගරුකවත් ජීවත්වීමට එතුමා සෑම විටම ආදර්ශයක් දෙමින් සියලු දෙනා යහමගට ගෙන ඒමට කළ මෙහෙවර අති මහත්ය. සැබැවින්ම උන්වහන්සේ සියලු දෙනා ආදර්ශයට ගත යුතු උතුම් පියතුමෙකි.

 

 

පේෂලගේ කටට බ්‍රේක් නැද්ද?
නොවැම්බර් 26, 2020 ~ පාලක සමන් පෙරේරා ~ හැඳල

දෙරණ නාළිකාවේ විකාශය වන දෙරණ චැම්පියන් ස්ටාර් වැඩසටහන මෙහෙය වන පේෂල මනෝජ්ගේ මුඛයෙන් පිටවන අසභ්‍ය වචන හුවමාරුවේදී වැඩිහිටියන් හා ළමයින් සමඟ නැරඹීමට අපහසුතාවයට පත් වී ඇත.

ආරාධිත අමුත්තන් ලෙස පැමිණෙන කලාකරුවන් හට දක්ෂතාවන් ඇද කිරීම දෝෂාරෝපන කිරීම පිළිබඳ විටෙන් විට දැනුම්වත් කළත් පේෂල මනෝජ් හට දෙරණ නාළිකාවේ කිසිදු බලවත් නිලධාරින්ගේ අවධානය යොමු නොවීම බලවත් කණගාටුවකි. එය නැවත සිදු නොවීමේ වගකීම බාර ගන්නේ කවුරුන්ද?

 

 

නාමාවලියට පුංචි අකුරු එපා
නොවැම්බර් 26, 2020 ~ ජගත් චන්ද්‍රසිරි / පූජා ජගත්සිරි ~ පස්යාල

චිත්‍රපටයක් තිරගත කිරීමේදී හා ටෙලි නාට්‍යයක් විකාශය කිරීමේදී ඒවා අධ්‍යක්ෂණය කරන නිර්මාණකරුවන් කරන වැරැද්දක් දැන් දැන් පෙනෙන්නට ඇත. එය නම් කථාව යන අතරතුරම පැත්තෙන් පැත්තට කූඹි කකුල් වගේ කුඩාවට එම නිර්මාණයට දායක වූ නළු නිළියන් හා කාර්මික ශීල්පීන්ගේ නම් ඇතුළත් කර තිබීමයි. එය කියවීමට වෙනමම අන්වීක්ෂයක් තිබිය යුතුය. ඒ තරමටම ඒ අකුරු කුඩාය. එය එම නිර්මාණයට දායක වූ සියලුම ශිල්පීන් හට කරන බලවත් අසාධාරණයකි. මේ තත්ත්වය අතීත සිනමාවේ හෝ ටෙලි නාට්‍ය තුළ දක්නට නොලැබිණ. එකල නාමාවලියට ප්‍රමුඛතාවය දී තිබිණ. අද බොහෝ රංගන ශිල්පීන් ප්‍රේක්ෂකයන් අතරට නොයන්නත් මෙය ද හේතුවක් විය හැක. රූපයෙන් හඳුනා ගත්ත ද නාමයෙන් නොදන්නා කලාකරුවන් රාශියක් මෙරට තුළ ඇත. ඔවුන් මියගියත් බොහෝ අය දන්නේ නැත. සියලුම චිත්‍රපට හා ටෙලි නාට්‍ය අධ්‍යක්ෂවරුනි මේ ගැනත් හිතන්න.

 

 

‘රිදී නිම්නය’ මිහිරියි සුන්දරයි
නොවැම්බර් 26, 2020 ~ තිලකරත්න විල්වල සහ මැණිකේ විල්වල ~ කෑගල්ල

ඉරිදා දවල් 11.00 - 12.00 දක්වා ස්වර්ණවාහිනි නාළිකාවෙන් විකාශනය වන ‘රිදී නිම්නය’ චිත්‍රපට ගීතමය වැඩ සටහන හරිම මිහිරියි. ලස්සනයි. එමගින් 60 - 70 - 80 යන දශකවලදී මෙරට සිනමාහල්වල ප්‍රදර්ශනය කරන ලද හින්දි චිත්‍රපටවල ගීත සහ එම ගීතවල තනුවටම අනුව ගයා ඇති සිංහල චිත්‍රපටවල ගීත මනා ලෙස සකසා නිවේදක දෙපලක් වන ධර්ම ශ්‍රී වික්‍රමසිංහයන් සහ රංජිත් එදිරිසිංහයන් විසින් ඉදිරිපත් කරනු ලැබීම හරිම ප්‍රශංසනීයයි

 

 

මුල් ගැයුමට නැත සම්මාන
නොවැම්බර් 26, 2020 ~ ජයන්ත අමරතුංග ~ පොලොන්නරුව

පුරා වසර 60 - 70 ක් අප මතකයේ රැඳි එදා ශිල්පීන් ගැයූ ගීත අද රූපවාහිනි නාළිකාවල ‘රියලටි’ වැඩසටහන්වලින් නවකයින් ලවා ගායනා කොට ඔවුන්ට ලක්ෂ ගණන් මුදල් ද කෝටි ගණන් වටිනා නිවාස ද ලබා දෙනවා. එදා වාද්‍ය ශිල්පීන් විශාල පිරිසක් ඉදිරියේ එක හුස්මට පටිගත කළ ගීත අද මොවුන් ගයන්නේ නටමින් සිනාසෙමින්. ඔවුන් ගයන විට එම ගීතවලට ‘රාග - තාල’ නැත. ‘ශ්‍රැතිය’ ද නැත. එහෙම ගැයූ අයට දෙන තෑගි ඇයි මුල් නිර්මාණකරුවාට නොදෙන්නේ. ඔවුන් නිසා නේද මොවුන් තෑගි ලබා ගන්නේ. මෙවන් විකාර වැඩ නිසා මුල් ගීතය සහ එම නිර්මාණකරුවන් හෑල්ලුවට ලක් නොකරනු.

 

 

වීදි නාට්‍ය පුරෝගාමියා සමරමු
නොවැම්බර් 26, 2020 ~ ඩඩ්ලි ගෝමස් ~ මොරටුව

වීදි නාට්‍ය කලාවේ පුරෝගාමියා වූ ආචාර්ය ගාමිණී හත්තොටුවේගමගේ මිනිසෙකුට එල්ලිලා මැරෙන්න බැරිද, රජ දැක්ම, පරවියෙක් දැක්ක කල්, බෝසත් දැක්ම, ඔටුන්නක බර වැනි සාර්ථක වීදි නාට්‍ය සියල්ලේම විශේෂ ලක්ෂණය වූයේ ඉතාම සරල බව හා දෙබස් හි ගැබ්ව තිබූ උපහාසාත්මක භාවයයි. ඒ නිසාම ඒවා ගම් දනව් මෙන්ම නගර සියල්ලෙහිදීම ජනප්‍රිය විය. ජනතාව වීදි නාට්‍ය පුරා රොද බැඳ ගත්තේය. ඔහු එකම සිංහල චිත්‍රපටයක රඟපෑවේය. ඒ වලාපටල චිත්‍රපටයයි. 1938 දී උපත ලද එතුමා 2009 වර්ෂයේ ඔක්තෝම්බර් 30 වැනි දින අප හැර ගියේය.

 

Week of නොවැම්බර් 26, 2020