උන්මාද වූ ප්‍රේමාදරේ සප්ත කන්‍යා

ජනවාරි 10, 2019

වජිර ජයසිංහගේ කථාවකට, තලංගම ජයසිංහ විසින් චිත්‍රකථාවකට නැංවු 'වියරු මුහුද' එකල ලංකාවේ ප්‍රථම චිත්‍රකථා පත්‍රය වු 'සතුට' පත්‍රයේ පළවිය. හැත්තෑව දශකය අගභාගයේ චිත්‍රකථා යනු ,චිත්‍රපටවලටත් වඩා ප්‍රබල විනෝදාස්වාදයක් විය.

 

'වියරු මුහුද' එලෙස දැඩි ජනප්‍රසාදයට පත් වූ චිත්‍රකථාවකි. 'සිකුරු ලියා', 'අපේක්ෂා' 'දෙවනි ගමන', 'මංගල තෑග්ග' 'පරිත්‍යාගය' වැනි ජනප්‍රිය මැද මාවත චිත්‍රපට රාශියක් නිර්මාණය කර ලාංකේය සිනමාව තුළ ස්ථාවර නමක් සාදා ගත් අධ්‍යක්ෂක එච්.ඩි.ප්‍රේමරත්නගේ ඇස මෙම 'වියරු මුහුද' චිත්‍රකථාව ළඟ නැවතී තිබී, එය සිනමාවට නැගිය යුතුයැයි සිතුවිල්ලක් පහළ වන්නට ඇත්තේ එහී චරිතවල හා සිදුවීම් තුළ තිබූ ප්‍රබලත්වය නිසා වන්නට ඇත.

දීප්තිට, අනිල් රුවන්වැල්ල මුණ ගැසුණේ අවන්හලකදීය. දුටු ගමන්ම මන බදිනසුළු සුන්දරත්වයක් හා ආකාර්ෂණීයත්වයක් ඇති දීප්ති දෙස වරක් නොව දස වරක් හෝ බැලීමට අනිල්ට සිතුණේ, සුන්දරත්වය යනු කුමක්දැයි ඔහු හදුනන නිසාය. ඒ ඔහු වෘත්තියෙන් ඡායාරූප ශිල්පියෙකු නිසා විය හැකිය. දිප්තිගේ රූපය කැමරා කාචයට මොන තරම් ගැළපෙනවා දැයි, ඇය දුටු මොහොතේම අනිල්ට සිතුනි. අනිල් දෙසද දීප්ති හැරී බැලුවේ ඔහු තුළ තිබු ප්‍රියමනාප පෙනුම නිසා විය හැක. දෙදෙනා තුළ ඇතිවූ ආකර්ෂනය හමුවේ දෙදෙනාට මිතුදමක් ඇතිකර ගැන්මට හැකිවිය. එය සුන්දරවූ මිතු දමකි. ඒ මිතු දමේ සැගවී තිබූ අන්තර්ගතනය ආදරය බව දෙදෙනාට පසුව වැටහුණි.

 

"උන්මාද වූ ප්‍රේමාදරේ

සමනල වසන්ත යෞවනයේ

සංසාරයේ සුබ ප්‍රාර්ථනා

ඉඳුනිල් දෙනයන සටහන් වේ"

අනිල් දීප්තිට තම ආදරය ප්‍රකාශ කරන අතර, සිහිවටනයක් සේ ඔහුගේ කැමරා කාචයට ඇයගේ සුන්දර රූපය අසු කරගන්නටද ඔහු අමතක කළේ නැත.

"කිඳුරු කොදෙව්වේ- කසුන් කුමාරිකාවි

සයුරි තෙරෙන් සැඟවී ආවාදෝ

චණ්ඩ මාරුතේ-ඉන්ද්‍ර ඛීලයක් වගේ

නොසැලී ඉන්නට වරම් ලැබේදෝ"

පසුදිනම අනිල් මූණපෑවේ නොසිතු දෙයකටය. අනිල් තනිව යනවේලාව බලා සිටි මැරවරයන් කීප දෙනෙක් අනිල්ට අම්බානෙකට නෙලා ,අනිල් ගේ කැමරාව කුඩුපට්ටම් කර දමා අනිල් මහමඟ හළා දමා ගියෝය.

එච්.ඩී. ප්‍රේමරත්න මෙම "වියරු මුහුද" චිත්‍රකථාව තුළින් බොහෝ හැලහැප්පීම් දුටු නිසා මෙම කථාව ඇතැම් විට තෝරා ගන්නට ඇත. චිත්‍රකථාව නම් පත්තරය පුරාම දෙදරුවේය. එහෙයින් ප්‍රේමරත්නට මෙය තරමක අභියෝගයක්ද විය. කමල් අද්දරආරච්චි හා සංගීතා වීරරත්න යොදා ප්‍රේමරත්න මේ අභියෝගයට මුහුණ දෙන්නට ලක ලැස්තිවීමම තවත් අභියෝගයක් විය.

අනිල්ට සිදුවූ මැර ප්‍රහාරය නම් අනිල්ටම ප්‍රහේලිකාවක් විය. ඔහුගේ අතින් කිසිවකුට වරදක් වී නැත. දේශපාලන හෝ රටේ සිදුවන දූෂණ ගැන නම් ඔහුගේ කැමරාව කිසිසේත් ක්‍රියාත්මක වෙන්නේ නැත. ඔහු අතින් ඡායාරූප ගැනෙනුයේ සුන්දර දෑ පමණි. එහෙව් කෙනෙකුට මෙවන් මැර ප්‍රහාරයක් එල්ල වන්නට ඇත්තේ, වැරදීමකින් විය හැකිය. ඔහු සිතුවේ එලෙසය.

දීප්තිද මේ සිදුවීමෙන් දැඩිව සැලුණද, ඇය මතුපිටින් එය පෙන්වූයේ නැත. ඇය හොද තත්ත්වයේ කැමරාවක් අනිල්ට තෑගි කළ අතර, අනිල්ට ඡායාරූප ශාලාවක් දැමීමට මුදල් දෙන බවක්ද පොරොන්දු වී එහි මූලික කටයුතු පටන් ගන්නට යැයි උපදෙස්ද දුන්නාය.

ප්‍රේමරත්න වජිර - තලංගමගේ ' වියරු මුහුද' කථාන්තරයට 'මාකටිං වැලියුව්' එකක් දීමට දෝ එහි නම සිනමාවට උචිත අන්දමට වෙනස් කළේ "සප්ත කන්‍යා" ලෙසය. එය චිත්‍රපටයේ කථාවට එක එල්ලේම නොගැළපුනද, එහී හොද ශබ්දයක් තිබුණි. ප්‍රචාරණයේදී ඒ නම හොඳ අතට බලපෑවේය.

හදිසියේම අනිල්ගේ කාමර සගයා වූ පුවත්පත් කර්තෘ රොනී කළුපහන අතුරුදහන් වූයේද මේ අව් අස්සේය. ඒ අතුරුදහන් වීමේ අවසන් ප්‍රතිඵලය වූයේ රොනී ගේ නිසල මලසිරුර හමුවීමය. මෙම සිදුවීම පසුපසද අර අනිල් ට ප්‍රහාර එල්ල කළ මැරයන් සිටිනු ඇතැයි පොලීසිය සැක කළේ රොනිගේ පුවත් පතේ රොනී විසින් අනිල්ගෙ සිදුවීම ගැන උලුප්පා සටහන් දැමූ නිසාත් ඒවායේ වරද කෙළින්ම පාතාලයට පැවරූ නිසාත්ය.

චිත්‍රපටයේ "ත්‍රිල්" කිරීමට හැකි තැන් ප්‍රේමරත්න කලබලේකින් නිම කිරීමට ගියා යයි සිතෙන්නේ මේ රොනීගේ අතුරුදහන් වූ සිද්ධියේදීය. මෙතැනදී චිත්‍රපටය ත්‍රාසජනක කිරීමට තිබූ අවස්ථාව ප්‍රේමරත්න විසින් මඟහැර තිබුනි. අනිල්ට හා රොනීට සිදුවූ සිදුවිම් පිටුපස භයානක හස්තයක් තිබෙන බව ප්‍රේක්ෂකයන් ට දැනුනද එය එතරම් අනිල්ට නොදැනුනේ ඇයිදැයි අසන්නට සිද්ධ වෙන්නේත් ප්‍රේමරත්න ගෙන්මය.

මේ අතර දීප්ති අනිල්ට ඡායාරූප ශාලාවක් පටන් ගැන්මට මුදල් දෙයි. මේ සා මුදලක් දිප්තිට ලැබෙන්නේ කොහොමද කියා හෝ නොවිමසා අනිල් තම සගයා වූ ජගත් සමග ඡායාරූප ශාලාව පටන් ගනී. ⁣එහෙත් මෙතනදී ප්‍රේමරත්න තරමක කුතුහලයක් ගෙන එන්නේ ඡායාරූප ශාලාව විවෘත කරන දිනයේම, පොලීසියෙන් පැමිණ, අනිල්ට පොලිසියට පැමිණෙන්නට කියනුයේ අනිල්ට පහර දුන් හා රොනීට පහර දී මරා දැමූ අපරාධ කල්ලියේ පින්තූරු වලින්, අනිල්ට එදා පහර දුන් අයව හඳුනා ගැන්මට හැකිදැයි දැන ගැන්මටය.

අනිල් පොලීසියට ගොස් ඒ පින්තූරු පිරික්සා බලන විට ඔහුට පහර දුන් මැරයන් හදුනා ගත් අතර, එහී තිබූ පාතාල කල්ලියේ අනෙක් පින්තූර අතරේ දීප්තිගේ පින්තූරය තිබෙන දුටු අනිල් තුෂ්නිම්භූත විය. එතැන දීප්තිගේ පින්තූරය තිබූ හෙයින්, එය දීප්තිගෙන්ම අසා දැන ගත යුතු නිසාත්, මෙහි සුලමුල තමා විසින්ම ⁣සොයා ගත යුතු නිසාත් අනිල් කීවේ මේ කිසිවෙක් තමාට පහර දුන් අය අතරේ නොසිටි බවකි.

එහෙත් පොලිසිය දීප්ති හොයා ගත්තා පමණක් නොව, අනිල්ට රැගෙන දුන්නා යයි කියු කැමරාවද දීප්ති විසින් හොරකම් කෙරුවක් බවද සොයා ගනී.

දිප්තිගෙ හැව ගැලවුණු බව දැනුණු ඇය සියල්ල වමාරා පොලිසියට බාර විය. ඇය අවුරුදු දෙකකට සිරභාරයට පත්වුණි. ඇය වෙනුවෙන් පොලීසිය ඔප්පු කළ චෝදනා අතර, සොරකම් කිරීම, පික් පොකට් ගැසීම හා ගණිකා සේවනය ද විය.

'දුහුවිල්ලෙන් වත්සුනු තවරා

කුමර කුමරියන් වී- ලෙන්ගතු ඇසුරේ- රහස් බැලුම් දෙන හැන්දෑවේ-කය මිස හිත නැති පුරවරයේ- කව්රුන් හෝ තුරුලේ නිමේෂයක්- කොදුරමි රහසින්- ආ ගිය උන්හැටි තැන් සඟවා-උකුසු ඇසක් ගෙන-ගුරුළු වෙසක් ගෙන-

පියඹා යාවි-මොනර කිරිල්ලී"

අවුරුදු දෙකක් ගතවන විට, දීප්තිගෙන් ලැබුණු මුදල් වලින්, පටන් ගත් ඡායාරූප ශාලාව සැහෙන මට්ටමකට දියුණු වී තිබුණි. මොන තරම් දූෂිත දෑ කළද අනිල්ට දීප්ති හා ඇයගේ ළෙන්ගතුකම, ආදරය, අමතක කිරීමට නොහැකි විය. තමා අද මේ තත්වයට හෝ පැමිණියේ දීප්ති නිසා නොවේ දැයි අනිල් නිතරම සිහිපත් කළේය. දීප්ති හිරෙන් නිදහස් වී ආවට පසු ඇයව විවාහ කරගන්නෙමියි යන තිර අධිෂ්ඨානයකට අනිල් ඒවන විටත් පැමිණ සිටියේය.

මේ ඇතුළත විශ්වසනීයභාවය අඩුවී යන අවස්ථාද නැත්තේ නොවේ. අනිල්, රොනී, ජගත්, දීප්ති සියල්ලම හුදකලා චරිතයන්ය. ඔවුනට දෙමාපියන්, නෑදෑයන්, යාළු මිත්‍රයන් කිසිවෙකු නැත. අනිල්ට ඕන හැටියට තීරණ ගැන්මට නිදහස තිබුණි. අඩුම තරමේ දෙමාපියන් හෝ සිටියා නම් පාතාලයට සම්බන්ධ, හෙරක්, මංකොල්ල කාරියක්, පික්පොකට් කාරියක් විවාහ කරගැන්මට කිසි ලෙසකත් ඉඩ දෙන්නේ නැත. ප්‍රේමරත්න, අනිල් ගේ දෙමාපියන් කථාවට ඈදා නොගත්තෙ වජිර හෝ තලංගම එය ඉස්මතු නොකෙරූ නිසාද, නොඑසේ නම් අර ඉහත කී හේතුව වූ පාතලයේ ගැහැනියක් විවාහ කිරීමේදී දෙමාපියන්ගේ කොකු වැටෙන නිසාදැයි තේරුම් ගැන්මට නොහැකිය.

දෑ අවුරුද්දකින් පසු දීප්ති නිදහස් වී පැමිණියා ය. අනිල් තම මිතුරා වූ ජගත් සමඟ දීප්තිගේ මුදල් වලින් පටන් ගත් ඡායාරූප ශාලාවේ දියුණුව දැක දීප්තිද ඉමහත් ලෙස සතුටු විය.

සියලු දෙය අමතක කර දීප්ති විවාහ කර ගැන්මට අනිල් කළ යෝජනාවට දීප්ති කෙළසකවත් කැමති වූයේ නැත. එහෙත් අවසානයේ අනිල්ගේ ඇවටීලී කිරීම මත ඇය එකඟ විය.

අනිල් හා දීප්තිගේ විවාහ ජීවිතය සුන්දරව ගලා ගියේය.

 

"සුවඳ දැනී, දැනී දැනෙනවා

උදා හිරු එළියේ, අලුත් ඉරක් දෝ මේ

සිතට ගලනවා සීත පිණි බිඳු, සීරුවෙන්, සුළගේ

හිනස්වා සිත හැඟුම්

සුවඳ දැනී, දැනී දැනෙනවා"

සියලු දුක් දොම්නස් පහව ගියායයි ඔවුහු සිතුවෝය. මිනිසුන්ට නරක කාලය මෙන්ම හොඳ කාලයක්ද පැමිණේ. මේ ඔවුනගේ හොඳම කාලය යයි අනිලුත්, දීප්තිත් සිතන්නට පෙළඹුණහ. ඒ සතුට දෙගුණ තෙගුණ කරන්නට, දීප්තිගේ කුසට දරු ගැබක් මෝරන්නට විය.

 

"ඊයේ නොදුටුව ලස්සන ලෝකය,

අද කොහෙන් හෝ

හෙමිහිට ඇවිදින් මිදුල දිගේ මට

තුරුලු වෙනවා

ජීවිතේ සුන්දරද මෙතරම්"

ඒ සුන්දරත්වය එලෙස රැදුණේ දාබරේ ඔවුන්ව සොයා ගන්නා තෙක් පමණි. දාබරේ දීප්ති සොයාගෙන ආවේ නැත. ඔහු පැමිණියේ සිපිරිනා මුඩුක්කුවේ විසූ තම බිරිඳ සෝමාවතී සොයාය. ඒ ආවේ තම විවාහ වූ ඡායාරූපයත් රැගෙනය.

දාබරේ සිතුවේ දීප්ති මේ සියල්ල වසන් කර අනිල් හා විවාහ වූ බවකි. නමුත් මේ සියල්ල අනිල් දැනගෙනය දීප්ති සමඟ විවාහ වූයේ. එහෙයින් දාබරේට මඟුල් ෆොටෝ පෙන්වමින් ගේම් එක දෙන්නට බැරි විය.එහෙම නම් එහෙමයි,මෙහෙම නම් මෙහෙමයි කියමින් දාබරේ, ඔවුනගෙන් විශාල මුදලක් ඉල්ලුවේ එය නොදුන්නහොත්, දීප්ති බහු විවාහයක් කර ඇති බවත් එය ලොවටම කියන බවත් තර්ජනය කරමිනි. සල්ලි සොයාගැන්මට පැය 24ක කාලයක් දී දාබරේ ගියද, මෙයින් ගැලවීමට පහසු නොවන බව ඔවුන් දෙදෙනාටම වැටහිනි.

එහෙයින් මෙතනින් අයින් වී ගම්පළාතකට ගොස් ජීවිතය ගෙන යාමට ඔවුන් තීරණය කලහ. අනිල් තම මිතුරා ජගත්ට මේ බව කීමට ඡායාරූප ශාලාවට ගිය අතර තුරේදී දාබරේගේ සගයෙක් වූ පින්තු දීප්තිව සොයා පැමිණ ඇයට ලිංගීක අඩම්තේට්ටම් කිරීමට සැරසුණු අතර එයින් බේරීමට දීප්ති ඔහුට පිහියෙන් ඇන මරා දැමීය. නැවත අනිල් නිවසට ආ පසු සිදුවූ සිදුවීම දැක වහා දීප්තිවත් රැගෙන වෙනත් නගරයකට පලා ගියේ පොලිසියෙනුත්, දාබරේගෙනුත් බේරිමටය.

අනිල්, පුෂ්පදේව ලෙසද දීප්ති , මංගලා ලෙසද වෙස් මාරු කරගෙන එහී ඉතා දුෂ්කර ජීවිතයක් ගත කළද, පොලීසිය මේ අලුත් පුෂ්පදේව සොයා පැමිණීය. මෙය ඉව වැටුණු අනිල්, දීප්තිවත් රැගෙන නිවස පිටු පස තිබූ කැලයට පැන ගතී. එහෙත් එහිදී ඇයට විලි රුදාව සෑදී අමාරු වූයෙන් අනිල් ඇය එතැනම දමා නැවත ගෙදරට ගියේ වාහනයක් සොයාගෙන ඇය රෝහලට රැගෙන යාමටය. ඒ වන විට පොලීසිය අනිල්ගේ නිවස වට කර තිබුණි. අනිල් නැවත පොලීසිය සමඟ කැලයට යන විට, දීප්ති දරුවා ප්‍රසුත්ත කිරීමට ඉමහත් පරිශ්‍රමයක් දරමින් සිටියාය. පොලීසිය මැදිහත් වී දොස්තර කෙනෙක් ගෙන ආවද, ඔහුට දරුවා නිරුපද්‍රිතව ගැනීමට හැකි වුණද, දීප්ති බේරා ගැන්මට නොහැකි විය. අනිල් දරුවා සමඟ තනිවිය.

ඇත්තටම මෙය සිනමාවට උචිත වූ 'ප්ලොට්' එකකි. එච්.ඩී. ප්‍රේමරත්නද මෙය දන්න උපක්‍රම යොදා සාර්ථක කර ගැන්මට උත්සහා කළේය. එයට මෙහී එක්වූ ගීත තුන මනා පිටිවහලක් විය. දාබරේ ලෙස රඟපෑ ටෝනී රණසිංහ එම වසරේ සම්මාන උලෙළ කීපයකින්ම හොඳම සහය නළුවාට හිමි සමිමානය ලැබුවද, වජිර හා තලංගම ජයසිංහ චිත්‍රකථාව තුළින් මැවූ දාබරේට සාධාරනයක් ඉෂ්ඨ කළාදැයි නම් සැක සහිතය. චිත්‍රකථාවේ දාබරේ මීට වඩා ප්‍රබල විය. අනිල් ලෙස රඟපෑ කමල් අද්දරආරච්චි හොද තේරීමක් විය. රොනී වූ හේමසිරි ලියනගේ හා ජගත් වූ ජයලත් මනෝරත්න කවදත් දක්ෂ නළුවන් දෙපලකි. රොබින් ප්‍රනාන්දු, මැණිකේ අත්තනායක, සුමින්ද සිරිසේන, ඥානාංග ගුණවර්ධන , ජේ.එච්.ජයවර්ධන, රුවන්ති මංගලා සෙසු චරිත රඟපෑහ.

එච්.ඩී.ප්‍රේමරත්නගේ ශෛලිය තුළින් "සප්ත කන්‍යා" ප්‍රේක්ෂකයන් වැළද ගත්තද, වජිර හා තලංගම මැවූ "වියරු මුහුද" කථාන්තරය, සිනමාව තුළ මෙයටත් වඩා පෙරළියක් කිරීමට තිබුණි. චිත්‍රපටය හොද වූවද එය චිත්‍රකථාව අබිබවා ගියාද කියන එක ගැන නම් තව වරක් සිතිය යුතුමය.

(ලබන සතියේ තවත් චිත්‍රපටයක්)

ශෝන් මැක්ස්මස් දිසානායක

CAPTCHA
This question is for testing whether or not you are a human visitor and to prevent automated spam submissions.
10 + 9 =
Solve this simple math problem and enter the result. E.g. for 1+3, enter 4.