තිදෙනෙකු අතරට එන හතරවැනියා හෝලා

පෙබරවාරි 25, 2021

විහාරමහා දේවී උද්‍යානය වෙනදාට වඩා අද ජනාකීර්ණය. ඒ එදින ඉරිදාවක් වූ නිසාය. නොයෙක් ජනයෝ ඇවිත් රිසි පරිදි මේ භූමියේ ඇවිදිති. ඇතැම්හු බිම වාඩිවී ආහාර පාන ගනිමින් සිටිති. සමහර දුවා දරුවෝ මවුපිය දෑතින් මිදී හිතේ හැටියට කෙළි සෙල්ලම් කරති. ඔය අතරේ මෙතැන සිටිනා තරුණයෙකි. ඔහුගේ නම අර්ජුනය. අර්ජුන උද්‍යානයට පැමිණියේ තනිවම නොව තම පවුල සමඟිනි. අර්ජුනගේ දියණියට අයිස්ක්‍රීමක් ගන්න මුදල් ලැබුණේ සෑහෙන්න වෙලාවක් යනතුරු පියාගෙන් කළ ඉල්ලීමක ප්‍රතිඵලයක් වශයෙනි. ඇය මිටින් හළ කිරිල්ලියක පරිදි දුව ගියාය. ඒ මොහොතේ එක්තරා තරුණියක් මෙතැනට පැමිණෙයි. ඇය ට්‍රේසිය. සුරූපිනියකවූ ඇය දෙස නොයෙක් දෙනා හොරෙන් බලන අන්දමක් පෙනිණ. එහෙත් ඇය දැකීමෙන් අර්ජුන මහත්වූ කලබලයකට පත් වෙයි. ට්‍රේසිගේ නෙතට අර්ජුන හසු වන්නේ ඔය මොහොතේය. ඔවුන් දෙදෙනා මුහුණට මුහුණ බලා සිටිති. ක්‍රමයෙන් අතීත කතාවක් මතක් වෙයි. අදින් අවුරුදු කිහිපයකට ප්‍රථම අර්ජුන පෙම්වතෙක්ව සිටියේය. මැණික් නමැති තරුණියක් ඔහු විවාහ කර ගන්නට සූදානමින් පසුවෙයි. වෘත්තියෙන් කලාකරුවෙකු වූ අර්ජුනට ස්ථිර රැකියාවක් නොමැති වීම මැණික තිබූ එකම ප්‍රශ්නය විය. වරින්වර ඇය අර්ජුනගෙන් ඒ පිළිබඳ විමසීය. නිදහස් කලාකරුවෙකු ලෙස ජීවිතය ගෙනයාමට ප්‍රිය කළ අර්ජුනගෙන් එකී පැනය නිතරම මැණික් විමසන්නීය. එය අර්ජුනට හිසරදයකි. දිනක් එම කතාබහ උත්සන්න විය. ගමනක් යමින් සිටි අතරතුර දී ඇති වූ එම බහින් බස් වීම නිසා අතර මඟ අර්ජුන දමා මැණික් පිටත්ව ගියාය. අති සුඛෝපභෝගී බෙන්ස් රථයකින් ට්‍රේසි පැමිණෙන්නේ ඔය මොහොතේදීය. දෙදෙනාට දෙදෙනා හඳුනා ගන්නා ඔවුන් නිදහසේ ඇවිදින්නට පටන් ගනිති. ට්‍රේසි සහ අර්ජුන අතර ක්‍රමයෙන් ප්‍රේමයක් ලියලයි. කාලය ගෙවී යද්දී ඒ දෙදෙනාට වරින් වර ප්‍රශ්න ගැටලු මතුවෙයි. ඒවාට උත්තර සොයමින් ට්‍රේසි සහ අර්ජුන කාලය ගත කරති. නුවර ප්‍රදේශයේ චාරිකාවක නියැළෙමින් සිටියදී ඔවුන්ගේ ජීවිතයට පැමිණෙන වසන්ත නැමැති කෙනෙකු නිසා මෙතෙක් නිදහසේ ගෙවා දැමූ ට්‍රේසි සහ අර්ජුනගේ ජීවිතය කණපිට හැරේ. එතැන් පටන් සිදුවන්නේ අනපේක්ෂිත සිදුවීම් පෙළකි. මේ ආදර කතාව නම් කොට ඇත්තේ “හෝලා” යනුවෙනි ඉතාලි බසින් හෝලා යනු හෙලෝ යන වචනයයි. නාලක විතානගේ හෝලා අධ්‍යක්ෂවරයාය. අනිත්‍යා, රූපාන්තරණ, නිලංජනා, සරුංගල්, ඊතලය වැනි සිනමාපට නිර්මාණය කළ නාලක විතානගේ මෙවර තිරයට ගෙන එන්නේ තවත් ආදර කතාවකි. ඒත් සමඟම ඔහු යොවුන් වියේ දෙදෙනෙකු තනිවම ජීවිතයට මුහුණ දෙනවිට ඔවුන් අත්විඳින ගැටලු පිළිබඳ ද මෙහිදී කතාබහ කරයි. හෝලා තිරරචනය ද අධ්‍යක්ෂ නාලක විතානගේගෙනි.

 

 

හෝලා සිනමාපටයේ නළුනිළියන්

උදිත් ප්‍රනාන්දු, ගයාත්‍රී කාංචනමාලි, ජෙහාන් අප්පුහාමි, රංගි රාජපක්ෂ, පවිත්‍රා වික්‍රමසිංහ, ජයන්ත මුතුතන්ත්‍රි,ඉමේෂාන් නෙල්ලිගහවත්ත සහ ප්‍රින්සි ප්‍රනාන්දු.

කැමරා අධ්‍යක්ෂණය - මංජුල කුමාරතුංග

සංස්කරණය - ශාන් අල්විස්ගේ

අංග රචනය - අරුණ ශාන්ත

කලා අධ්‍යක්ෂණය - දිලික්ශාන් වීරසිංහ

සහාය අධ්‍යක්ෂණය - මලින්ද මධුසංඛ

සංගීත අධ්‍යක්ෂණය - ජිනිදු ප්‍රවීන්ගේ

ශබ්ද මිශ්‍රණය සහ විශේෂ දෘෂ්‍ය ප්‍රයෝග - අසේල ඉන්ද්‍රලාල්

ගී පද රචනය - කසුන් කංකානම්ගේ

නිෂ්පාදනය - රමේෂ් දිල්ශාන් සහ ප්‍රසන්න ජයසූරියගේ