කාලයත් එක්ක වීරයෝ වෙනස් වෙනවා

දසුන් පතිරණ
මාර්තු 5, 2020

මිනිස්සු ජීවිතේ ඉදිරියට යන්න විවිධ පූර්වාදර්ශ හොයනවා. විවිධ ප්‍රතිරූප අනුගමනය කරනවා. තමන්ගේ ජීවිතයට වැඩිපුරම බලපෑමක් කළ තැනැත්තාව "වීරයා" කියලා නම් කරගන්නවා. වීරයෝ විවිධයි. විෂමයි. වීරයෝ එකිනෙකාට සාපේක්ෂයි. අපි හිතුවා කලා ලෝකයේ තරු සමඟ ඔවුන්ගේ වීරයෝ ගැන කතා කරන්න. දසුන් පතිරණ කියන්නේ තමන්ගේ රංගන ප්‍රතිභාවෙන් රිදී තිරය සහ පුංචි තිරය ජයගත් සම්මානනීය තරුණ රංගන ශිල්පියෙක්. දසුන් කුඩා අවධියේ සිට වර්තමානය වෙන තෙක් තමන්ගේ වීරයෝ ගැන අප සමඟ තොරතුරු බෙදාගත්තේ මේ ආකාරයට.

දසුන්ට පොඩි කාලේ වීරයෙක් හිටියාද?

ඔව්. ඒ තමයි මගේ තාත්තා. පොඩි කාලේ අපි හැදෙන්නේ තාත්තාත් එක්ක. මම විශ්වාස කරන්නේ තාත්තාව. ඒ නිසා පුංචි කාලේ තාත්තා වීරයා කියලා හිතුණා. නමුත් කාලයක් යද්දි අපි වෙනස් වෙනවා. අපි ටිකෙන් ටික ලොකු වුණාම වීරයොත් වෙනස් වුණා.

ඒ කියන්නේ කාලෙත් එක්ක දසුන්ගේ වීරයා වෙනස් වුණාද?

ටිකෙන් ටික ලෝකය ඇස් ඇරලා දකිද්දි වීරයෝ වෙනස් වුණා. සාමාන්‍ය පෙළ කරන කාලේ මගේ වීරයා බෲස්ලී. ඒ කාලේ බෲස්ලී වගේ වෙන්න ආසා හිතුණේ. ඒ කාලේ අපි වීරයෝ හදාගත්තේ විශේෂත්වය ගැන හිතලා නෙමෙයි. ආසාවට සහ "වෙනවා නම් මේ වගේ වෙන්න ඕනේ" කියලා හිතුණු නිසා. ඊටපස්සේ අමීර් ඛාන් මගේ වීරයා වුණා. අමීර් ඛාන් දැන් මිනිස්සුන්ට වීරයෙක් වුණාට ඒ කාලේ එහෙම නැහැ. ඒත් අමීර් ඛාන්ගේ මුල් කාලේ චිත්‍රපටි බලලා, රඟපාන විදිහ දැකලා හිතේ ඇඳුණා ඒ වගේ වෙන්න තියෙනවා නම් හොඳයි කියලා.

පසුකාලීනව ඔබේ ගුරුවරයා, වීරයා වෙනවා නේද?

මම සෑහෙන්න ෆිල්ම් බලපු කෙනෙක්. සිංහල, දෙමළ, හින්දි අහුවෙන හැම ෆිල්ම් එකක්ම බලනවා. එහෙම ෆිල්ම් බලලා බලලා 'මිල්ල සොයා' වගේ ෆිල්ම් එකක් බැලුවාම "මේක මාරයිනේ" කියලා හිතුණා. පරණ චිත්‍රපටිවල Over acting දැකලා මහේන්ද්‍ර පෙරේරා රඟපාන විදිහ දැක්කාම මරු කියලා හිතුණා. මහේන්ද්‍ර පෙරේරාගේ රංගනයත් එක්ක මට ආපු moral එක නිසා තමයි නළුවෙක් වෙන්න ඕනේ කියලා හිතුණේ. ඊටපස්සේ රූපවාහිනී වැඩසටහනකින් මහේන්ද්‍ර පෙරේරා Drama Workshop කරනවා කියලා මම දැනගත්තා. ඒ 2004දී. මම ඔහුව හොයාගෙන යන්න තීරණය කළා.

ඊටපස්සේ මොකද වුණේ?

ඒ ගියා ගියාමයි මාව වෙනම ලෝකයක් ඇතුළේ හිර වුණා. අනිත් අරමුණු ඔක්කොම අමතක වුණා. මගේ එකම ඉලක්කය වුණේ රංගනය. රංගනය විතරක් නෙමෙයි මහේන්ද්‍ර පෙරේරාගෙන් ජීවිතය ඉගෙන ගත්තා. ජීවිතය විඳීන හැටි, මිනිස්සු එක්ක ගනුදෙනු කරන හැටි හැමදේම ඉගෙන ගත්තා. මහේන්ද්‍ර පෙරේරා කියන්නේ සැහෙන්න ලොකු බුද්ධි පරිචයක් තියෙන, හොඳ අත්දැකීම් ගොඩක් තියෙන, ක්ෂේත්‍රයේ ලොකු වැඩ ගොඩක් කරලා තියෙන කෙනෙක්. මුල් කාලයේ රඟපාන්න ගියාම විජයලා, ගාමිණීලා වගේ හොඳ පෞරුෂයක් නොතිබුණු නිසා ඔහුව ප්‍රතික්ෂේප වෙනවා. එහෙම වෙන්න වෙන්න මහේන්ද්‍ර අයියා කරන්නේ හදාරන එක. දැන් ඔහු legend එකක් වෙලා තියෙනවා. මගේ රංගනයට අඩිතාලම දැම්මෙත් ඔහු. මම මොකක්හරි තැනක ඉන්නවා නම් මහේන්ද්‍ර පෙරේරා ඒකට හේතුවක්. මම රංගනය හදාරන්න වෙන තැනකට ගියා නම් මීට වඩා වෙනස් දසුන් පතිරණ කෙනෙක් හැමෝටම දකින්න තිබුණා. 

දේශපාලන ක්ෂේත්‍රයේ වීරයෝ නැද්ද?

අපෝ නැහැ. දේශපාලනය ගැන කතා කරන්න අකමැති තරම් ඒක අප්‍රසන්නයි.

මිනිස්සු වීරයෝ හදාගන්නේ කොහොමද?

ඒක තීරණය වෙන්නේ එකිනෙකාගේ capacity එක අනුව. මිනිස්සු තම තමන් කැමති විදිහට වීරයෝ හදාගන්නවා. ඒ වීරයො ආශ්‍රය කරගෙන ජීවිතය ගොඩනඟාගන්න උත්සාහ කරනවා. මිනිස්සු වීරයෝ හදාගැනීම තුළින් කාටවත් හානියක් නැහැ. තම තමන්ගේ කැමැත්ත අනුව වීරයෝ හදාගනීවි.

වීරයෝ මිනිස්සුන්ගේ ජීවිතවලට කොච්චර බලපෑම් කරනවාද?

ගොඩක්දුරට බලපෑම් කරනවා. මිනිස්සු Motive වෙන්නේ වීරයා දිහා බලාගෙන. ජීවිතයට යම් බලපෑමක් කරන්න ඕනේ නිසාම තමයි මිනිස්සු වීරයෝ හදාගන්නෙත්.

දසුන් පතිරණව වීරයා කරගත්ත අය මුණගැහිලා නැද්ද?

මුණගැහිලා තියෙනවා. තරුණයෝ මට කියලා තියෙනවා "අයියේ, මං ආසයි අයියා වගේ වෙන්න" කියලා. මම ඒ හැමෝටම කියන්නේ "මං වෙන්න එපා. උඹ උඹ වගේ වෙන්න මගෙන් දෙයක් ගන්න තියෙනවා නම් ගන්න" කියලා.

තිලක් පෙරේරා

Add new comment