සිංහල පුළුවන් වුණු දවසක ගීතයක් ගයනවා

ස්ටෙෆනි සිරිවර්ධන
අගෝස්තු 27, 2020

සිරස නාළිකාවෙන් විකාශය වුණු Voice of teens Sri Lanka වැඩසටහනත් සමඟම එහි නිවේදන කටයුතු කළ ස්ටෙෆනි සිරිවර්ධන කා අතරත් ජනාදරයට පත් වුණු චරිතයකි. ලාංකේය රූ රැජින කිරුළ හිමි කරගැනීමට සමත් වුණු ඇය විවාහ වූයේ ගායන ශිල්පී දුෂ්‍යන්ත් වීරමන් සමඟය. Voice of teens  වැඩසටහන පිළිබඳව සහ අනෙකුත් කලා ක්ෂේත්‍රයේ වැඩකටයුතු පිළිබඳ කතාබහකට ෆ්ටෙෆනි සිරිවර්ධනව සම්බන්ධ කරගත්තෙමු.

 

ඇත්තටම ස්ටෙෆනිට සිංහල බැරිද?

 

නැහැ. දැන් හොඳට පුළුවන්. හොඳටම පුළුවන් කියලත් කියන්න බැහැ. ඒත් මම හිතනවා Voice of teens  වැඩසටහනෙන් පසුව මගේ සිංහල කලින්ට වඩා ගොඩක් improve වෙලා කියලා.

 

Voice of teens  වැඩසටහන නිසා ස්ටෙෆනි දැන් හරි ජනප්‍රියයි නේද?

 

ඔව් voice of teens  වැඩසටහනත් එක්කම මට ගොඩක් අය ආදරේ කරන්න පටන්ගත්තා. විශේෂයෙන් පුංචි ළමයි මාව දකිනකොට දුවගෙන ඇවිත් මාව බදාගන්නවා. ඒ අයගේ ආදරේ මට නොඅඩුව ලැබෙනවා. මට ගොඩක් සතුටුයි ඒ ගැන.

 

voice of teens  වැඩසටහන මෙහෙයවීම සම්බන්ධයෙන් ඔබට ලැබෙන ප්‍රතිචාර කොහොමද?

 

ගොඩක් අය මට ආදරේ දෙනවා. මම වැඩසටහන ඉදිරිපත් කරන විදිහට ළමයි ඒක අනුකරණය කරලා වැඩසටහන ඉදිරිපත් කරන වීඩියෝ ගොඩක් අය මට එවනවා. හරිම ලස්සනයි. ඒවා දැක්කාම මට ගොඩක් සතුටු හිතෙනවා ඉතින්. මාව අගය කරන හැමෝටම මම ස්තූති කරනවා. මොකද මගේ සිංහල උච්චාරණය ඒ තරම් හොඳ මට්ටමක නොතිබියදීත් ඒ අය මාව අගය කළා. මම සාමාන්‍යයෙන් සිංහල භාෂාවෙන් නිවේදන කටයුතු කරන්නේ නැහැ. මට ගොඩක් අය කියනවා "Akki you can do it"  , "ඔයා හරිම ලස්සනට present  කරනවා" කියලා. ඇත්තටම ඒ ප්‍රතිචාර මට ලොකු හයියක් වුණා.

 

මේ අතරවාරයේ ස්ටෙෆනිගේ සිංහල උච්චාරණයට බැනපු අයත් හිටියා.

 

ඔව් මට බැනපු අය ඉන්නැති. ඒත් මට සිංහල කියවන්න බැහැනේ. ඒ නිසා සෝෂල් මීඩියාවල මට බැනලා දාන දේවල් මම දකින්නේ නැහැ. දුෂ්‍යන්ත් වුණත් ඒ දේවල් මට කිව්වේ නැහැ. එයා හරිම ධනාත්මක කෙනෙක්. එයා ඒ දේවල් දැක්කාම දැක්කේ නැහැ වගේ ඉන්නේ. හැබැයි මම ළමයින්ගේ නම් කියද්දි වචන අදින විදිහට විහිළු කරලා හදපු memes දැක්කා facebook එකේ.

 

ස්ටෙෆනිට සිංහල ඒ තරම් බැරි වුණත් youtube  එකේ "සිරිසංඟබොධි මාලිගාවෙදි" රැප් එක හොඳට කියනවා අපි දැක්කා.

 

ඔව්. ඒ වීඩියෝ එක දුෂ්‍යන්ත්ගේ අදහසක් අනුව කරපු එකක්. ඒක බලපු අයගෙනුත් දෙන්නට ගොඩක් හොඳ ප්‍රතිචාර ලැබෙනවා.

 

Voice of teens  වැඩසටහනෙන් පසුව ඔබට සිංහල නිවේදන කටයුතුවලට ආරාධනා ආවාද?

 

කොහොමත් මගේ රැකියාව නිවේදනය. මම ගොඩක් කරන්නේ සාමූහික වැඩසටහන්. හැබැයි මම නිවේදනය කරන්නේ ඉංග්‍රීසි භාෂාවෙන්.

 

ඇයි ස්ටෙෆනි රඟපාන්නේ නැත්තේ?

 

ඒක හොඳ ප්‍රශ්නයක්. මම හිතන්නේ මට සිංහල චිත්‍රපටිවල රඟපාන්න හැකියාවක් නැහැ. මොකද මගේ සිංහල හොඳ නැහැනේ.

 

රංගනයට ආරාධනා ඇවිත් ඇති?

 

ආරාධනා ආවා. මගේ චරිතයට හඬකවලා හරි කරමු කිව්වා. ඒත් මම හිතන්නේ නෑ මගේ සිංහල තවමත් ඒ මට්ටමට තියෙනවා කියලා.

 

කොහොමද දුෂ්‍යන්ත් එක්ක ගත කරන ජීවිතය?

 

අපි දැන් බැඳලා අවුරුදු දෙකක්. මගේ husband  හරිම හොඳයි. මම එයාට ගොඩක් ආදරෙයි. එයත් මට ගොඩක් ආදරෙයි.

 

අපිට ආරංචියි ස්ටෙෆනි දැන් රසට කෑම හදනවා කියලා.

 

ඔව්. දුෂ්‍යන්ත් මට කෑම හදලා දෙනවා. මම දැන් ටික ටික ලංකාවේ කෑම හදන්න පුරුදු වෙනවා. මම පොඩි කාලේ ඉඳන්ම දන්නේ ඉතාලි කෑම හදන්න. දුෂ්‍යන්ත්ගේ අම්මා රසට කෑම හදනවා. මම අම්මාගෙන් ඉගෙන ගන්නවා.

 

ස්ටෙෆනිත් ඉස්සරහට දුෂ්ශන්ත් වගේ ගීත ගායනා කරයිද?

 

ගොඩක් අය මගෙන් අහනවා සිංහල සිංදු කියන්නේ නැත්තේ ඇයි කියලා. මම English වලින් සිංදු කියනවා. මම හොඳට සිංහල ඉගෙන ගෙන හොඳට කතා කරන්න පුළුවන් දවසක මම කැමතියි ගීතයක් කරන්න.

 

 

 

සිංහල බැරි කාන්තාවක් එක්ක මම සිංහල සින්දුවක් කිව්වා

දුෂ්‍යන්ත් වීරමන්

දුෂ්‍යන්ත් වීරමන් කියන්නේ නව පරපුරේ ජනප්‍රිය රංගන ශිල්පියෙක්. පසුගිය දිනෙක youtube  ඔස්සේ ඔහු අපූරු වැඩක් කළා. දුෂ්‍යන්ත් ඔහුගේ බිරිඳ ස්ටෙෆනි සිරිවර්ධන සමඟ "සිරිසඟබොධි මාලිගාවෙදි" ගීතය ගායනා කරන වීඩියෝ පටයක් අන්තර්ජාලයට මුදාහැරියා. එය සමාජ ජාලාවල ඉතාම ජනප්‍රිය වුණා සේම එම වීඩියෝ පටයේ තිරය පිටුපස වීඩියෝවද ඉතා ඉහළ ප්‍රතිචාර ලබමින් සමාජජාලාවල සංසරණය වෙමින් පවතිනවා. මේ වීඩියො පටය ගැන දුෂ්‍යන්ත් වීරමන් අප සමඟ මෙසේ පැවසුවා.

 

"සිරිසංඟබොධි මාලිගාවෙදි" රැප් එක ස්ටෙෆනිට සිංහල බැහැ කියලා විහිළු කරන අයට උත්තරයක්ද?

 

එහෙම කියන්නත් පුළුවන්. මොකද ස්‍ටෙෆනි සිංහල කතා කරන විදිහට කට්ටිය විහිළු කළානේ. මට ඕනේ වුණේ ලංකාවේ අපේ දේශීය දේවල් නැවතත් මිනිස්සුන්ට අහන්න සලස්වන වැඩක් කරන්න. ඉස්සරහටත් ඒ වගේ වැඩ කීපයක් කරන්න බලාපොරොත්තු වෙනවා.

 

ඒ කියන්නේ දැන් මිනිස්සු දේශියත්වය අගයන්නේ නැද්ද?

 

අවුරුදු ගාණක ඉඳලා ලංකාවේ මේ සමාජ දේශපාලනික වින්නැහිය වෙලා තියෙන්නේ අපි දේශීයත්වය අගය කරන්නේ නැති නිසා. අවුරුදු ගාණක් යටත් විජිත පාලනයට නතු වෙලා ඉඳලා දේශපාලන, ආර්ථික, සමාජීය වශයෙන් මේ වෙනකොට මිනිස්සුන්ට අපේකම කියන එක අමතක වෙලා තියෙන්නේ. මුළු තුන් වෙනි ලෝකයම රටවල තියෙන්නේ මේ යටත් විජිත මානසිකත්වය. නමුත් යටත් විජිත කාලයට පෙර ඉතිහාසයේ මේ ජාති ආගම් භේද මුකුත් තිබුණේ නැහැ. අපි ඔක්කොම එකම රටක එකම මිනිස්සු විදිහට එකට ජීවත් වුණේ.

 

ඒ යටත් විජිත මානසිකත්වය music වෙනස් කරන්න පුළුවන්ද?

 

ඒක තමයි මේ උත්සාහ කරන්නේ. අපි නිකමට හිතලා බැලුවොත් අපි තාමත් ඉන්නේ යටත් විජිත පාලනය දීපු දේවල් ඇතුළේ. දෙපැත්තට බෙදිලා, කණ්ඩායම්වලට කැඩිලා ඉන්නේ. අපි තාම නොදැනුවත්වම ඉන්නේ යටත් විජිත මානසිකත්වයේ. එතනින් එළියට එන්න අපි ඔක්කොම එක ජාතියක්, එක මිනිස්සු කිය කිය ලේබල් ගහපු සිංදු කිව්වාට හරියන්නේ නැහැ.

 

එහෙනම් කොහොමද වෙන්න ඕනේ?

 

අපිට පේනවා අදටත් ජාතික ගීය කියන්නේ සිංහල, දෙමල, මුස්ලිම්, බර්ගර් ජාතික ඇඳුම් ඇඳගත්ත ළමයි. එහෙම විෂම විදිහට ඇඳගෙන ඔක්කොම එකට ඉන්නවා දකිනකොටම අපිට පේන්නේ බෙදුම්වාදයක්. ඇත්තටම අපි ජීවත් වෙනකොට එහෙම නෙමෙයි ඉන්නේ. ඔක්කොම ඉන්නේ එකම විදිහේ ඇඳුම් ඇඳගෙන. ඇත්තටම එකතු කරගන්න බැරි නිසයි එහෙම ඇඳුම් ඇඳගෙන එකයි කියලා පෙන්නන්නේ. ඔක්කොම එකම වගේ කියලා පෙන්නන්න නම් කරන්න ඕනේ ලංකාව කියලා අපිට තියෙන සංස්කෘතික වටිනාකම්, අපේ දේවල්, අපේ කම මිනිස්සුන්ට නැවත දැනෙන්න සලස්වන එක. ඉතින් මම හිතුවා මගේ නිර්මාණවලදි ඉදිරියේදී කරන්න ඕනේ අපේ රටේ ඇතුළේ දේවල් අගය කරන එක කියලා. එතන ජාති භේද නැහැ.

 

ඒ නිසාද පැරණි නාඩගම් ගීතයක් ගායනා කළේ?

 

ඔව්. මේ අදහස් තියාගෙන මම සිංහල බැරි ගෑනු කෙනෙක් බැඳගෙන සිංහල කතා කරන්න පුළුවන් මිනිස්සු සිංහල කතා කරන්න බැහැ වගේ ඉන්න රටක මේ වගේ වීඩියෝ එකක් කළාම අපිට අපේ දේවල් ගැන වෙනම ප්‍රෞඩත්වයක් ඇති වෙනවා.

 

ඒ වීඩියෝව තුළ ඔබ ස්ටෙෆනිට හරියට සිංහල උගන්වනවා.

 

ඔව්. "සිරිසංඟබොධි මාලිගාවෙදි" කියන්නේ උච්චාරණය කරන්න අමාරු රැප් එකක්නේ. මොකද ඒකෙ වචන තියෙන්නේ පැරණි සිංහල වචන. දැන් භාෂාවට වඩා ඒක ගොඩක් වෙනස්නේ. ඉතින් මම ස්ටෙෆනිට "මෙන්න මේ වචනේ මෙහෙම කියන්න ඕනේ, මෙන්න මෙතැන මෙහෙම ඇදලා කියන්න" කියලා කියනවා. ස්ටෙෆනි ඒක හරියටම කියනවා. මම හිතනවා ඒක බලන අයට අපේ දේවල්වල අගය ගැන යම් උත්තේජනයක් ඇති වෙයි කියලා.

 

මේ ගීතය නැවතත් කරළියට ඇවිත් තියෙනවා නේද?

 

ඔව්. "සිරිසංඟබොධි මාලිගාවෙදි" ගීතය ලියවුණේ 1903දී. මේක මුලින්ම "භාතිය - සන්තුෂ්" කියද්දි ඒ කාලේ බැන්නේ සංස්කෘතිය විනාස කරනවා කියලා. ඒත් දැන් හැමෝම මේ දේවල් හොයනවා. කවුද සිරිසඟබෝ කියන්නේ? අනුරාධපුර යුගයේ මේ කතාව ඇත්තටම වුණාද? වගේ දේවල් හොයනවා. දැන් සෑහෙන්න අය මේකෙන් cover songs  කරනවා.

 

මේ වගේ තවත් ගීතයක් ස්ටෙෆනි එක්ක කියන්න බලාපොරොත්තු වෙනවාද?

 

අනිවාර්යයෙන්ම. මේකෙන් පස්සේ අපි තෝරගත්තේ "නිම්හිම් සෙව්වා" ගීතය. ඒ ගීතයෙත් වෙනස්ම අර්ථයක් තියෙන්නේ.