පොඩ්ඩි ඉස්සරහට තවත් වෙනස් වේවි

- නිම්මි මනෝහාරි
ජූලි 29, 2021

 

ඇය අධ්‍යාපනය ලැබුවේ මහනුවර ශ්‍රිපාලි බාලිකා මහා විදුහලෙනි. එවකට පාසලේ විකට රැජින ඇයයි. නිරන්තරයෙන්ම තම පාසල් යෙහෙළියන්ගේ මනදොළ පිනවාලන්නට තරම් ඇය සමත් වුවාය. ඒ මෙරට කලාවේ ප්‍රවීණයන්ගේ විවිධ කලා අංගයන් අනුකරණයන් ලෙස ඉදිරිපත් කරමිනි. එමෙන්ම විවිධ නර්ථන අංගවලින්ද එය ඉදිරිපත් කරමින් යෙහෙළියන් නිතර සතුටු කළාය. පාසලේ මාධ්‍ය ඒකකයේ නිවේදිකාවක ලෙසින් ද ඈ ජනප්‍රිය වූවාය. අධ්‍යාපනයෙන් අනතුරුව ඇය ප්‍රා‍දේශීය ප්‍රවෘත්ති වාර්තාකාරිනියක් ලෙසද කටයුතු කළාය. අද වන විට සිය දිවියේ තවත් එක් කඩඉමක් පසුකරමින් ඇය රංගන ශිල්පිනියක බවට ද පත් වී හමාරය. ඒ ස්වර්ණවාහිනි රූපවාහිනි නාළිකාවෙන් සතියේ දින පහේම රාත්‍රි 9.30 විකාශය වන නාඩගම්කාරයෝ ටෙලි නාට්‍යය තුළිනි. ඇය එහි එන සංගීත මාස්ටර්ගේ පොඩි දුව 'පොඩ්ඩී' හෙවත් අංජලිගේ චරිතයෙන් අපගේ ආලින්දය සරසන්නීය. පිරිපුන් රුවැති නවක නිළියක් වන ඇය නිම්මි මානෝහාරි නම් වේ.

 

නිම්මි ඉන්නනේ කොහෙද?

මහනුවර පේරාදෙණියේ

 

පවුලේ විස්තර කිව්වොත්?

අම්මයි, තාත්තයි, මමයි, මල්ලියි. අම්මා හෙදියක්, තාත්තා ඉදිකිරිම් ක්ෂේත්‍රයේ රැකියාවක් තමයි කරන්නේ. මල්ලි තවම ඉගෙන ගන්නවා.

 

නිම්මි අධ්‍යාපනය ලැබුවේ?

මහනුවර සීතා දේවී බාලිකා මහා විදුහලෙන්

උසස් පෙළට කළේ මොනවාද?

කලා විෂයන් තමයි කළේ. සිංහල, නර්ථනය, මාධ්‍ය අධ්‍යාපනය යන විෂයන්

 

ඒ කාලේ ඉස්කෝලේ විකට රැජිනක් වුණා කියලත් ආරංචියි?

ඔව් අයියා. ඒ කාලයේ මම විවිධ ගායක ගායිකාවන්ගේ නළු නිළියන්ගේ හඬින්, හැඩයෙන් ඒවා අනුකරණය කරමින් ඉදිරිපත් කිරිම් කරනවා. ඉතින් පාසලේ මගේ යෙහෙළියන් අතර ජනප්‍රිය වුණා. එහෙම තමයි ඉතින් මම පාසලේදි ගොඩාක් දෙනා අතර ජනප්‍රිය චරිතයක් බවට පත් වූණේ. ඒ වගේම මම නර්ථන ශිල්පිනියක් හා පාසලේ මාධ්‍ය ඒකකයේ නිවේදිකාවක් ලෙසත් කටයුතු කළා.

 

ඒ කියන්නේ කලාවට මූලික පසුබිම ලැබුණේ ඔබේ පාසලෙන්මද?

අනිවාර්යනේම එතනින් පටන් ගත්තු ගමන තමයි අද මං මේ දක්වා යම්තාක් දුරකට ඇවිත් ඉන්නේ. ඊට පස්සේ මම පාසල මඟින් එතැනදි මට මුද්‍රිත මාධ්‍යය පිළිබඳව පුහුණු පාඨමාලාවක් හදාරන්නත් අවස්ථාව ලැබුණා.

 

නිම්මි ප්‍රාදේශීය වාර්තාකාරිනියකුත් වුණා නේද?

ඔව්. මට උසස් පෙළින් පස්සේ ප්‍රවෘත්ති වාර්තාකාරිනියක් ලෙස පුහුණු වෙන්නත් අවස්ථාවක් ලැබුණා අවුරුද්දකට ආසන්න කාලයක්. ඊට පසුව මම පෞද්ගලික රූපවාහිනි නාළිකාවක ප්‍රාදේශීය ප්‍රවෘත්ති වාර්තාකාරිනියක් ලෙසත් කෙටි කලක් වැඩ කටයුතු කරගෙන ගියා.

 

ඔබ රැකියාවකත් නිරත වූණා නේද?

ඔව් ඊටත් පස්සේ තමයි මට පෞද්ගලික සංචාරක හෝටලයක උත්සව සම්බන්ධීකරණ නිලධාරිණියක් ලෙස රැකියාවක්ලැබුණේ. මෑතක සිට ආ දැඩි කොරෝනා තත්ත්වය හමුවේ රැකියාව අවදානමට ලක් වුණා. ඒ නිසා රැකියාව දැන් කරන්න අවස්ථාව නැති වෙලා තියෙන්නේ.

 

එතකොට රංගනයට අවස්ථාව ලැබෙන්නේ කොහොමද?

මගේ ඥාති සහෝදරයෙකුගේ මාර්ගයෙන් තමයි ඒ අවස්ථාව මට ලැබෙන්නේ. මුලින්ම මේ සඳහා මට රඟපාන්න එන්න කිවාම මම එයට දායක වෙන්න එතරම් කැමැත්තක් තිබුණේ නෑ. මොකද මම ගෙදරම හිටිය ලැජ්ජාශීලී අයෙක් නිසා. පස්සේ මේ ටෙලි නාට්‍යයේ නිෂ්පාදකතුමාම මට කතා කරලා කරුණු පැහැදිලි කරලා දීලා කිවා මෙන්න මේ වගේ දෙයක් තමයි ඔයාට කරන්න තියෙන්නේ. එක කරන්න පුළුවන්ද කියලා එක පාරක් මෙහාට ඇවිත් බලන්න කියලා. පස්සේ මගේ අම්මත් මාව මේ සදහා උනන්දු කළ නිසා මම ගිහින් එයට සම්බන්ධ වුණා.

 

ප්‍රථම රංගන අත්දැකීම නිම්මිට දැනුණේ කොහොමද?

ඇත්තටම මං ඉස්සෙල්ලා කීවා වාගේ මං ලැජ්ජාශීලි අයෙක් නිසා මුලින්ම ඒක කරන්න ගියාම චකිතයක් බයක් දැනුණා. මොකද මම අලුත් නිසා මට ප්‍රථමයෙන්ම තමයි මේ විදිහට රඟපාන්න අවස්ථාව ලැබුණේ. අනික ඒ මේ රටේ රංගන කලාවේ ප්‍රවීණයන් එක්ක. (ප්‍රසන්නජිත් සර්, මීනා අක්කා, සෙනාලි අක්කා) පස්සේ මගේ බය ප්‍රසන්නජිත් සර් තමයි නැති කළේ. ඉතින් ඒදා ඉඳලා අද වෙනකල් මං මේ වැඩේ හොඳට කරගෙන යනවා. අදටත් ඒ අය හැමෝගෙන්ම වාගේ මට ලොකු සහයෝගයක් ලැබෙනවා.

 

නිම්මිට ලැබුණු ඒ චරිත ගැන කිව්වොත්?

මාස්ටර් සර්ගේ පොඩ් දුව පොඩ්ඩි (අංජලි) කියන්නෙම නිශ්ශබ්ද චරිතයක්. ඒත් ගෙදරදි ටිකක් කටකාර කතා බහ වැඩි කෙනෙක්. මාලන්ගේ විවිධ කතාවන් අනුකරණය කරමින් ඔහුට ඇද කිරිම තමයි කරන්නේ. ඉදිරියට මේ චරිතය විකාශයේදී ලොකු වෙනසක් දකින්න ලැබේවි. ඒ නිසා නාඩගම්කාරයෝ ටෙලිනාට්‍යය දිගටම නැරඹුවොත් ඒ තත්ත්වය දැක බලා ගන්න පුළුවන්. මං ආරාධනා කරනවා හැමෝටම මේ ටෙලි නාට්‍යය අතපසු නොකර නරඹන්න කියලා.

 

මාස්ටර් සර්ගේ පොඩි දුව අංජලිට මේ දවස්වල ලැබෙන ප්‍රතිචාර කොහොමද?

ඇත්තටම කියන්න ගොඩාක් සතුටුයි අයියේ. කෙටි කාලයක් ඇතුළත මට ලැබුණු මේ ප්‍රතිචාර ඉතාම අගය කරනවා. ප්‍රේක්ෂකයන් එයට ප්‍රතිචාර මට සජීවීවම ලබා දෙනකොට මට ඒක මුලින් අමුතු දෙයක් විදිහටයි දැනුණේ. නාඩගම්කාරයෝ ටීම් එකේ අයගේ පසුගිය අප්‍රේල් මාසයේ අවුරුදු උත්සවයක් පැවැත්වූවා. ඒක දැක බලා ගන්න අම්පාර, බදුල්ල, මහියංගනය, ත්‍රිකුණාමලය වාගේ ප්‍රදේශවලින් එදා පිරිස් ඇවිත් හිටියා. ඒ අය එකතු වෙලා මාව සෙල්ෆි ගන්නකොට එහෙමත් මුලින්ම මට අමුත්තක් දැනුණා. ඒත් දැන්නම් එහෙම නෑ. ඒක සාමාන්‍ය දෙයක්.

 

වෘත්තීය රංගන ශිල්පිනියක් වෙන්නද නිම්මිගේ කැමැත්ත?

මම තවම එහෙම වෘත්තීයමයව මේක කරන්න හිතාගෙන නෑ. මොකද මං මේ ක්ෂේත්‍රයට අලුත් නිසා. මේකේ මට ගොඩාක් දේවල් තියෙනවා ඉගෙන ගන්න. රංගනය ගැන ඉතාම සුළුවෙන් තමයි මම දන්නේ. ඉස්සරහට මං රංගනය ගැන හැදෑරිමක් කරන්නත් බලාපොරොත්තුවෙන් ඉන්නවා.

 

ඔබේ මුහුණ සහ ඇඟපත ලස්සන කරගන්න විශේෂ මොනවා හරි භාවිත කරනවාද?

මම එහෙම කෘත්‍රිම විශේෂ දේවල් කිසිවක් පාවිච්චි කරන්නේ නෑ. සාමාන්‍යයෙන් කෑම බීම ගන්නවා. ඒවාවලින් වගේම මගේ ආගම දහමට අනුව ජිවත්වෙමින් පිරිසිදු සිතකින් කිසිවෙකුට ඊර්ෂ්‍යා ක්‍රෝධ වෛර නොකර සැහැල්ලුවෙන් තමයි මම ජිවත් වෙන්නේ. පුළුවන් විදිහට හැමෝටම උදව් කරමින් ජිවත් වෙන්න මම කැමතියි. ලස්සන කියන දේ ස්වාභාවයෙන්ම එන්න ඕනේ දෙයක්. මම එය කෘත්‍රීමව ලබා ගන්න උත්සාහ කරන්නේ නෑ.

 

නිම්මිගේ සැබෑ ජිවිතේ වෙනසක් වෙන්නත් දැන් කාලේ හරි නේද?

නෑ අයියේ, ඒකට තව කල් තියෙනවා.

 

දැන් ඔබට පෙම්වතෙක් එහෙමත් ඉන්නවාද?

තවම නෑ.

 

ගෙදරින් ඔබට ගෙනෙන යෝජනාවකටද? ප්‍රේම සබඳතාවයකින් නිම්මි විසින්ම ක්ෂේත්‍රයේම කෙනෙක් හොයා ගෙන විවාහ කරගන්නද වැඩි කැමැත්ත. ?

එහෙමම කියලත් නැ.

 

තව අවුරුදු කීයකින් විතර විවාහ වෙන්නද බලාපොරොත්තුව?

මම තවම ඒ ගැන සැලසුම් කරලත් නෑ.

 

ඔබට මෙහිදී මතක් කළ යුතු අය සිටිනවාද?

නාඩගම්කාරයෝ ටෙලි නාට්‍යයේ රචක සද්ධාමංගල සූරියබණ්ඩාර, එහි අධ්‍යක්ෂ ජය ප්‍රකාශ් සිවගුරුනාදන් නිෂ්පාදක චාමර සමරවික්‍රම යන මහතුන් මේ අවස්ථාවේදී විශේෂයෙන් මතක් කරන්න ඕනේ. ඒ වගේම මෙහි එන නළු නිළියන් ඇතුළු ඊට දායක වන කාර්යමණ්ඩලයේ සියලු දෙනාටමත් මට මේ විදිහට ප්‍රථම වරට කතා කරපු සරසවිය පුවත්පත සහ මාධ්‍යවේදී ඔබ, මගේ ප්‍රේක්ෂක ජනතාව අවසාන වශයෙන් මතක් කරන්න ඕනේ. ඒ හැමෝටම මේ අවස්ථාවේදි ස්තුතිවන්ත වෙනවා.

 

හේමන්ත බණ්ඩාර