එදා ලතා ‘සැඩ සුළං’හි ගී ගැයු අයුරු

පෙබරවාරි 10, 2022

භාරතීය ගීත කෝකිලා ලතා මංගේෂ්කාර් සිංහල චිත්‍රපටයකට ගැයූ එකම ගීතය අඩංගු වූයේ සැඩ සුළං චිත්‍රපටයටය. සැඩ සුළං චිත්‍රපටයට ලතා සම්බන්ධ වීම ඇය සිංහල චිත්‍රපටයක ගී ගැයූ එකම අවස්ථාව පමණක් නොව දකුණු ඉන්දියාවේ චිත්‍රාගාරයක දී ඇය ගීතයක් පටි ගත කළ මුල්ම අවස්ථාව ද විය. එමෙන්ම සුප්‍රකට දක්ෂිණ භාරත සංගීත අධ්‍යක්ෂ එස්.දක්ෂිණමූර්තිගේ සංගීතයට ඇය ගීයක් ගායනා කරන ලද මුල්ම අවස්ථාව ද එය විය. කෙසේ වෙතත් මෙම ගීතයේ ගෞරවය හිමි විය යුත්තේ ආනන්ද සමරකෝන්ට හා ටී.සෝමසේකරන්ටය. ගීතය රචනා කිරිමෙන් නොනැවතී ලතා වෙනුවෙන් සිංහල භාෂාව පුරුදු කරන ලද්දේ ද සමරකෝන් ය.

මේ පිළිබඳ රසවත් කථාවක් තිබේ. සිංහල චිත්‍රපට ගීතයක් ගයන්නට ආරාධනා කළ සැණින් ලතා එය ප්‍රතික්ෂේප කළාය. එයට හේතුව නුහුරු බසකින් ගීතයක් ගයන්නට ගොස් අමාරුවේ වැටෙන්නට ඇය තුළ ඇතිවුණ අකැමැත්තයි. එහෙත් සැඩ සුළං අධ්‍යක්ෂණය කරමින් සිංහල චිත්‍රපට අධ්‍යක්ෂණයට එක්වූ මුල්ම ලාංකික දෙමළ සිනමාකරුවා වූ ටී.සෝමසේකරන් එලෙස පරාජය ලෙහෙසියෙන් බාර ගන්නා මිනිසකු නොවිණ. එබැවින් ඔහු ලතා ගේ රුචි අරුචි කම් වටහා ගත්තේය. ලතා ද සාමාන්‍ය කාන්තාවන් මෙන් විලවුන් කෙරෙහි දැඩි ඇලුම් කරන කාන්තාවක බව ඔහු සොයා ගෙන තිබිණ. ඒ අවදියේ වෙළෙඳ පොළට පැමිණි ප්‍රංශයේ නිෂ්පාදිත ඉහළම වර්ගයේ විලවුන් වර්ගයක් ගැන ලතාගේ අවධානය යොමුව ඇති වග සෝමසේකරන් සොයා ගත්තේය . ඔහු රසිකයකු හැටියට එම විලවුන් වර්ගය ඇයට තිළිණයක් කොට යැව්වේය. මේ විලවුන් සමඟ ඇති වූ මිත්‍රත්වය කෙතරම් ද යත් ලතාට සෝමසේකරන්ගේ යෝජනාව ප්‍රතික්ෂප කළ නොහැකි විය. ලතා කැමැත්ත පළ කළ සැණින් ආනන්ද සමරකෝන් බොම්බායට ( මුම්බායි) වෙත යැවූ සෝමසේකරන් ඇයට සිංහල උච්චාරණය පුරුදු කළේය. සැඩ සුළං චිත්‍රපටය සඳහා ඇය ගීත දෙකක් ගායනා කළාය. මෙම ගීත පටිගත කරන ලද්දේ මදුරාසියේ (චෙන්නායි) හි එවකට තිබුණු නවීන මෙන්ම දැවැන්ත චිත්‍රාගාරය වූ වාහිනි චිත්‍රාගාරයේය. මේ සඳහා සෝමසේකරන් විසින් බොම්බායේ සිට මදුරාසියට ලතාට විශේෂ ගුවන් යානයක් යවන ලද බව ද සඳහන් වෙයි. මෙහි දෙවැනි ගිතය ගායනය සඳහා මොහිදින් බෙග් ද එක් විය. සැඩ සුළං චිත්‍රපටයේ සියලු ගීත රැසක් අනුකරණ ගී වුවත් ලතා ගැයූ ගී අනුකරණ තනු වක් නොවන්නට සෝමසේකරන් හා සමරකෝන් වග බලා ගෙන තිබිණ. ගීතය ගැයීමෙන් අනතුරුව ලතා වෙනුවෙන් අමතර තෑග්ගක් ලෙස රුපියල් අසූ දහසක් වැය කොට ඇයගේ ප්‍රියතම චොකලට් වර්ගයක් තිළිණයක් ලෙස ලබා දෙන්නට තරම් සෝමසේකරන් නිර්ලෝභී විය. සැඩ සුළං චිත්‍රපටයේ මෙම ගීතයට සම්බන්ධ කිසිවකු හෝ මේ වන විට ජීවතුන් අතර නැත. ඉතිරිව සිටියේ ලතා මංගේෂ්කාර් පමණකි.

ආනන්ද සමරකෝන් විසින් රචනා කරන ලද මෙම ගීත යේ පදමාලාව මෙපරිද්දෙනි

ශ්‍රී ලංකා මා ප්‍රියාදර ජය භූමි
ජය භූමි- ජය භූමි_ ශ්‍රී ලංකා

සිරි දැරු හෙළ දිව පුරාතනේ
ජයකොඩි- නැංවු වීර විකුමැති මා
රම්‍ය දරුවනේ
කෝ අනේ - අද දිනේ
කිම වුණේ ද
දරුවනි අහෝ
නෑ පෙනෙන්ට කිසි තැනේ
කොයි ගියේ ද මා දමා
පෙම්බර මා පැටවුනේ- පෙම්බර මා පැටවුනේ

ලකඹර ජය කේළි නගා
සැමට සුසිරි සෙත සදා
කර ශ්‍රී සෞභාග්‍ය ළඟා
ගියෙ ඇයි මා දුකෙහි දා
කෝ අනේ අද දිනේ....

දන අද දුකඳුරෙහි ගිලී
ඇයි මේ ලෙස දිළිඳු වී
ඇසැර බලව් හිඳ අවදිව
ලක යයි පිරිහී

සැහැසි ක්‍රියා නිතර කෙරෙති
දුසිරිතට ම ඇදි අදී
නො ඉඳ මෙ මර නින්දේ අද
එනු එනු පිබිදී-එනු එනු පිබිදී

දෙවැනි ගීතය- මොහිදින් බෙග් සමඟ

ඉදිරියටා යමු සැවොමා
නිදහස ලබනට බැමි සිඳ දා

තවත් වහල් ව ඉන්නේ නෑ
මේ දුක් විඳීන්නේ නෑ සදා
යමවු යමවු සිත් සන්තොසින්
විමුක්ති ශාන්ති වෙයි උදා
ඉදිරියටා....

මේ ලංකාදීපයේ සුරම්‍ය
දූ පුතුන් අපියි උතුම්
විනීත වූ ගුණාංග ලෝක සාමයයි අපේ විකුම්
මේ දේ ගැනයි අපේ සටන්
අපේ අවි උතුම් දහම්
ඉදිරියටා....

අපේ මේ ජීවිතේ මෙ ලෝ
බොහෝ උදාර වස්තුවයි
හොදින් ගෙවා නැසී ගියොත්
නිගා ලබන්නේ නෑ සුබයි
එසේ හෙයින් මේ ජීවිතෙන්
ලබන්ට නම් ප්‍රෙයා්ජනේ
පුදන්ට ඕනෑ ජීවිතේ
පුදන්ට ඕනෑ ජීවිතේ
ඉදිරියටා යමු සැවොමා...