කෞශල්‍යාගේ කෞශල්‍යය

මැයි 13, 2021
 “දුටු තැන අල්ලනු” නාට්‍යයෙන්

 

 

සිංහල, ඉංග්‍රීසි ද්වි භාෂාවෙන්ම එක සේ ශූර ලෙස රූපණ කාර්යයෙහි නියැළෙන නළු, නිළියෝ මෙරට වේදිකා නාට්‍ය ක්ෂේත්‍රයෙහි සුලබ නොවෙති.කෞශල්‍යා ප්‍රනාන්දුද ඒ විරල නළු නිළි කාණ්ඩයට අයත් වන බැව් මා අමුතුවෙන් පැවසිය යුතු නැත. නූතන අප්‍රිකානු නාට්‍ය ලාංකේය වේදිකාවට හඳුන්වාදීමෙහිලා පුරෝගාමී කාර්යභාරයක් කෘතහස්ත නාට්‍යවේදිනී සෝමලතා සුබසිංහ සිරිමතියගෙන් ඉටු විය. නුගුගි වා තියන්ගෝගේ "The Trial of Dedan kimathi" නාට්‍යයෙහි ඉංග්‍රීසි නිෂ්පාදනය සේම එහි සිංහල පරිවර්තනය වූ "යදම්" (තුන්වන ලෝකයේ වහල් භාවයේ හඬ) (1992) යන නාට්‍ය ද්වය ඇය අධ්‍යක්ෂණය කළාය. මෙකී ඉංග්‍රීසි, සිංහල නිෂ්පාදන ද්වයෙහිම කෞශල්‍යා රංගනයෙන් දායක වූවාය. ඩෙඩාන් කිමති සහ ඔහුගේ දේශපාලන ව්‍යාපාරයට සහාය වන පහළ පන්තියේ පීඩිත ගැහැනියගේ සංවාද ඔස්සේ අධිරාජ්‍යවාදයට එරෙහිව නැඟෙන විරෝධය සහ මානව හිතවාදය, ආවේගශීලි නොවන සංයත භාවයෙන් මේ නාට්‍යයෙහි කුළුගැන්වේ. කෞශල්‍යා මෙහි නිරූපිත ගැහැනියගේ භූමිකාව උදෙසා වසරේ හොඳම සහාය නිළිය ලෙස රාජ්‍ය නාට්‍ය උලෙළේ දී ඇය සම්මානයට පාත්‍ර වූවාය.

මේ වූ කලී දීර්ඝ කාලයක් පුරා ස්වදේශිකයන් පෙළන්නා වූ යටත් විජිතවාදීන්ට එරෙහිව අරගල කරන අවංක නායකයකු රැකගනු පිණිස ස්වාර්ථය බැහැර කරමින් අභීතව කැප වන ගැහැනියකගේ භූමිකාවකි. එකී චරිතය ඉල්ලා සිටින බාහිර, අභ්‍යන්තරික මනෝභාවයන් ඉසියුම් ලෙස ඈ නිරූපණය කළාය. දරිද්‍රතාවෙන් පීඩිත, මුහුකුරා ගිය මනසකින් හෙබි තරුණයකු ලෙස මෙහි ශූර ලෙස රඟපෑ පූජිත ද මැල් රංගන ශිල්පියා "යදම්" නැරැඹූ ප්‍රේක්ෂකයෝ අමතක නොකරත්. වසරේ හොඳම සහාය නළුවා ලෙසින් ඔහු රාජ්‍ය නාට්‍ය සම්මානයට පාත්‍ර විය. මෙහි කෞශල්‍යා සහ පූජිත රැඟු එක් ජවනිකාවක් මා හට සිහිපත් වේ.

පිරිමි ළමයා (පූජිත) - දීපිය මගේ සල්ලි.. තෝව මරනවා ඕකටම මං

(ගැහැනිය ගොස් ඔවුන් වෙන් කරයි. ඇය ශක්තිමත් ලෙස ඔවුන් දෙදෙනා දෙපසට කොට අල්ලයි)

ගැහැනිය (කෞශල්‍යා) - විලි ලැජ්ජාවයි. උඹ අලි කොල්ලා. හොඳයි උඹ වගේ ලොකු මිනිහෙක්. උඹට උඹේ නංගිව මරන්න ඕන. උඹේම අම්මගෙ දුව.

පිරිමි ළමයා (පූජිත) - මගෙ නංගි. ඒකි මගේ නංගි නෙමෙයි. ඒකි කාගෙවත් නංගි නෙමෙයි. හෙරක්.

ගැහැනු ළමයා (නයනා හෙට්ටිආරච්චි) - මං හෙරක් නෙමෙයි. තෝ මෘගයා.

ගැහැනිය (කෞශල්‍යා) -

මොනවද ඒකි කළේ ?

ගැහැනු ළමයා (නයනා) - මුකුත් නෑ...

(ඉකි ගසමින්) මූ...

පිරිමි ළමයා (පූජිත) - මුකුත් නෑ. (අත මුදා ගන්නට තැත් කරමින්) අත ඇරපන් ඕකි.අල්ලගන්න මොකුත් නැති බව පෙන්නන්නම් මං.

ගැහැනිය (කෞශල්‍යා) - උඹටත් මුකුත් නැති වෙයි. උඹේ මනුස්සකං නැති කරගත්තොත්.

 

සමන් ලියනගේ (ඩෙඩාන් කිමති), ජනක කුඹුකගේ (ෂෝ හෙන්ඩර්සන්), කෞශල්‍යා ප්‍රනාන්දු (ගැහැනිය), පූජිත ද මැල් (පිරිමි ළමයා), නයනා හෙට්ටිආරච්චි (ගැහැනු ළමයා), නිශාන්ත ද අල්විස් (බැංකුකරු), ප්‍රසන්නජිත් අබේසූරිය, සංජය පෙරේරා (දේශපාලනඥයා), ප්‍රසන්නජිත් අබේසූරිය, ගිහාන් ප්‍රනාන්දු (විධායක නිලධාරියා) දමයන්ත පෙරේරා (පූජක), චන්දන සෙනෙවිරත්න (දෙවැනි සොල්දාදුවා), ප්‍රසන්නජිත් අබේසූරිය, විපුල තේජ විශ්වනාත් (පළමුවැනි සොල්දාදුවා) ඇතුළු නළු නිළියෝ රැසක් මෙහි රංගනයෙන් දායක වූහ.

 

“යදම්” නාට්‍යයේ කෞශල්‍යා ප්‍රනාන්දු සහ පූජිත ද මැල්

බර්ටෝල්ට් බ්‍රෙෂ්ට්ගේ "The Three penny opera"" නාට්‍යය පාදක කොට ගෙන නයිජීරියානු ජාතික වොලි සොයින්කා නිර්මාණය කළ "Opera Wonyosi" (1977) නාට්‍යය සෝමලතා සුබසිංහ අධ්‍යක්ෂණයෙන් ලාංකේය වේදිකාවට හඳුන්වා දුන්නාය. "The Three penny opera" උදෙසා බ්‍රෙෂ්ට් ආභාසය ලැබුවේ ජෝන් ගේගේ "The Beggars opera" නාට්‍යයෙනි. ධනේශ්වර සමාජ ක්‍රමය තුළ අනේකවිධ දූෂිතයන් රටේ ඉහළ පන්තිය සමඟ සබඳතා පවත්වන ආකාරයත්, ඔවුන්ගේ සූරාකෑමත් , හොරුන් නායකයන් බවට පත්වීමෙන් සිදුවන හානියත් බ්‍රෙෂ්ට් උපහාසාත්මකව මෙහි විවරණය කොට ඇත.

"Opera Wonyosi" ඇසුරෙන් කෞශල්‍යා "දුටු තැන අල්ලනු" (2015) නාට්‍යය අධ්‍යක්ෂණය කළාය. ඇය මෙහි කිසිදු චරිතයක් රඟපෑවේ නැත.සෝමලතා සුබසිංහ රංග පීඨයේ නළු නිළියෝ මෙහි චරිත නිරූපණය කළහ. ශානක ප්‍රනාන්දු (අන්ල්කුරා), ධනුෂ්ක

ඩයස් ( කපිතාන් මැක්හීත්), තිලක්ෂිණි රත්නායක (පොලී), කුමුදු වික්‍රමතන්ත්‍රි (අන්ල්කුරා මැතිනිය), මයුර කාංචන පෙරේරා (පොලිස් පරීක්ෂක බ්‍රවුන්), නිලංක දහනායක (මටර්), සේවියර් කනිෂ්ක (ඩෙයර් සහ අල්ටකෝ), චාමර ගාමේත්‍රීගේ (බබා), සමීර ලක්මාල් විමලසිරි (ජේක්), තිළිණ පෙරේරා (අහ්මඩ්), පූජන දන්දෙණිය (බොකාසා අධිරාජ්‍යයා), දිලුම් බුද්ධික (සෙන්පති මෝසස්), තිවංක දොන් රණසිංහ (පූජක), යශෝධා රසඳුනී (සුකී), ගයත්‍රි ඒකනායක (ලුසී), දුමින්ද සඳරුවන් (ඩොගෝ) ඇතුළු නළු, නිළියන් රංගනයෙන් දායක වූ අතර රංග වින්‍යාසය සහ ආලෝකකරණය චන්දන අලුත්ගේගෙනි. සේවියර් කනිෂ්ක සහය අධ්‍යක්ෂණයෙන්ද එක් වූයේය.

ප්‍රතිභාපූර්ණ නාට්‍යවේදී ධනංජය කරුණාරත්නගේ ස්වතන්ත්‍ර නාට්‍ය නිර්මාණයක් වූ "ඇසිඩ් වැස්ස" (2014) හී තම සැමියා තිස්ස (ප්‍රියන්ත සිරිකුමාර රඟපෑ) සහ පෙම්වතා විසල් (ජගත් මනුවර්ණ රඟපෑ) අතර දෝලනය වෙමින් පරිපීඩනයට ලක් වන ගැහැනියගේ (අමරා) භූමිකාව කෞශල්‍යාගේ රංගන දිවියෙහි කඩයිමකි. මධ්‍යම පාන්තික විවාහ සංස්ථාවක ගැටුම් මින් විවරණය කෙරිණි. කාලයාගේ ඇවෑමෙන් තම සැමියාගෙන් කායිකව හා මානසිකව දුරස්වන ඇය තම මනස්සෘෂ්ටියෙහි (ජ්චදබචඵර) ලැගුම් ගත් පෙම්වතාට සමීප වේ. රුවන්ති ඩි චිකේරාගේ "Kalumali"" (2012), ගැහැනියක ලෙස උපත ලැබීම හේතු කොට ජීවිතයේ වරින්වර ඇයට මුහුණ පෑමට සිදුවන ගැටලු , අභියෝග පාදක කොටගත් සිංහල හා ඉංග්‍රීසි ද්වි භාෂාවෙන්ම නිර්මිත නාට්‍යයකි. මෙහි කළුමාලි ලෙස නදී කම්මැල්ලවීර රඟපෑ අතර ඇගේ නැන්දම්මාගේ භූමිකාව කෞශල්‍යා රඟපෑවාය. මෙරට ඉංග්‍රීසි වේදිකාවේ කෘතහස්ත රූපණවේදියකු වූ පීටර් ද අල්මේදාගේ රංගනයද "ම්චතභථචතඪ" නාට්‍යයෙහි අගය වැඩි කළේය. මේ වූ කලී ස්ත්‍රී පුරුෂ භාවය හෙවත් පුමඉතිරි බව (Gender) හේතු කොට කාන්තාව මුහුණ පාන සමාජ විෂමතා අරභයා ස්ත්‍රීවාදී දෘෂ්ටියකින් (Feminist point of view)) ප්‍රශ්න කළ නාට්‍යයකි. "kalumali" සුරංගනා කතාවලින් එකකි. රුවන්ති , නදී කම්මැල්ලවීර සමඟ එක්වී මෙකී සුරංගනා කතාවෙහි වස්තුබීජය නාට්‍යයක් දක්වා වර්ධනය කළහ. මේ වූ කලී රුවන්ති විසින් ඉන් පෙර සිදු කරන ලද පර්යේෂණයක ඵලයකි. රුවන්ති මෙරට සිංහල හා ඉංග්‍රීසි වේදිකාවෙහි නියැළෙන ගැහැනුන් 13 කුට ඇරැයුම් කොට මාතෘත්වය පිළිබඳ ඕනෑම කලා මාධ්‍යයකින් තම මතවාදය සන්නිවේදනය කරන ලෙස ඉල්ලා සිටියාය. මේ අනුව එකී ගැහැනු 13 දෙනා කවිය, නාට්‍ය, සංවාද, ලියවිලි, කෙටි කතා ආදී විවිධ කලා මාධ්‍ය මඟින් මාතෘත්වය අරභයා ස්වකීය අව්‍යාජ අත්දැකීම් ඉදිරිපත් කළහ. රුවන්ති ඔවුන් සමඟ වසර එකහමාරක පමණ කාලයක් පුරා නිර්මාණකරණයෙහි නියැළෙමින් ලැබූ අනුභූතීන් "kalumali" නාට්‍යයෙහි අන්තර්ගත වූ බැව් පෙනේ.

 

ඉතිරි කොටස ලබන සතියේ...