“අරුගම්බේ” අන්තර්ජාතික සිනමාවට

මැයි 26, 2022

 

සුභ උදෑසනක් මහත්මයා....

මම බුද්ධික ජයරත්න. ආරුගම්බේ වෙරළාරක්ෂක පොලිසියෙන්.....

මේ, සරසවිය පත්තරෙන් ද?

ඔව්.

මම දෙන මේ පණිවිඩය මහත්තයලට වැදගත් වේවි. මේ දවස්වල ඊශ්‍රායල් සිනමා අධ්‍යක්ෂකවරයෙක් වන මාර්කෝ මහත්තයා මෙහේ ඇවිල්ලා චිත්‍රපටයක් රූගත කිරීම් කරනවා. ඒකට නම දාලා තියෙන්නෙත් " ආරුගම්බේ " කියලා. මේක ශ්‍රී ලංකාවට වැදගත් සිනමාපටයක් වේවි. මේ ගැන මහත්තයට හොඳ ලිපියක් ලියන්න පුළුවන්.

අරුගම්බේ පොලිසියෙන් දුන් හෝඩුවාව ඔස්සේ අපි අරුගම්බේ බලා පිටත් වුනෙමු. කොළඹින් පිටත් වුණේ පාරවල් අවහිර නොවන රාත්‍රියේය. පිම්මේ ගිය රථයට බාධාවක් ඇතිවූයේ සියඹලාණ්ඩුවෙන් හැරී හුලන්දාව පසු කර ලාහුගලට ළඟා වන විටදීය. ජංගම දුරකථනයේ සටහන් වූ වේලාව හරියටම පාන්දර 1.40 ය. ලාහුගල පෙනි පෙනී හතළිහකට ආසන්න වන අලි රංචුවක් මාර්ගය හරහා රිසිසේ ගමන් කරන්නට විය. රියදුරු අසුනේ සිටි සමීර රථයේ වේගය මඳක් අඩු කර, අලි රංචුවේ ගමන් මාර්ගය වෙනස් වූ පසු පාන්දර 2.30ට පමණ අදාළ දර්ශන තලය වෙත ගෙන ගියේය. පැය 6ක පමණ ගමන් මහන්සිය නිසා මඳක් විවේක ගැනිම සඳහා සමීර ර්‍ථචතථ ඨපධමඥ නිවාඩු නිකේතනය වෙත අපව රැගෙන ආවේය. හිරු උදාවට පසු නචතථ ඨපධමඥ කළමනාකරු වන තිලක්ගේ මඟපෙන්වීම ඔස්සේ සිනමාපටය රූගත කරන ස්ථානයට පැමිණියෙමු. අතිශය සුන්දර වෙරළ තීරයේ ඇති කුඩා බෝට්ටු විවිධ වර්ණවලින් දිස්විය. සමහරු මෙහි රිසි සේ දියේ ගිලෙමින් පිනා යති. විදේශීය තරුණ, තරුණියෝ දිය මත ලිස්සා යාමේ ක්‍රීඩාවේ ද ඇතැම්හු අව් රශ්මියේ පහස විඳීමින් ද තවත් කොටසක් වෙනසක් සොයා එන පිරිසක්ද ලෙසින් වූහ. අතිශය සුන්දර පරිසරයක් වන මෙම ප්‍රදේශය ලෝකයේ දිය මත ලිස්සා යාමේ ක්‍රීඩාවට ලොව ඇති හොඳම ස්ථාන 10 අතරින් එකකි. මෙහි තැන් තැන්වල නාම පුවරු සටහන් කොට තිබේ. මේ සියලු දේ විඳීමින්, දකිමින් පියමනින මාවතේ සිනමා නිෂ්පාදන කණ්ඩායමේ බඩු බාහිරාදිය තැන් තැන්වල ස්ථාන ගත කර තිබේ. මා සිටිනා දකුණු පසින් රජයේ ගොඩනැගිල්ලකි. එහි එක් ස්ථානයක විවිධ ආලෝක රටාවන් දක්නට ලැබේ. තවත් පසුබිමක කඩි ගුලක් ඇවිස්සුණාක් මෙන් පිරිසක් රූගත කිරීම් සිදු කරන උපකරණ අතැතිව එහා මෙහා යන්නට වූහ. ඒ අතර ශ්‍රී ලාංකිකයෝ මෙන්ම විදේශිකයෝ ද වෙති. මෙහි සිනමා කර්මාන්තයට තිබෙන අති නවීනම කැමරා තුන හතරක්ම විවිධ කැමරා කෝණ සමඟින් ස්ථානගත කොට ඇත. ඉංග්‍රීසී බසින් අධ්‍යක්ෂකවරයාගේ නියෝගයක් නිකුත් විය. " කෝ මේ පොලිස් නිලධාරියා....ඊළඟ සීන් එකට ලෑස්ති වෙන්න. ධඬ...රායිට්...“ පොලිස් නිලධාරියාගෙන් ප්‍රතිඋත්තරයකි. දරාගත නොහැකි අව් කූටකය පොළොවේ වැලිමතට වැටී දැඩි රත්වීමකට ලක්ව ඇත.

පොලිස් නිලධාරියා හා ප්‍රධාන නිළිය (මීරා ටසූර් - Mira Tzur)ගේ රූගත කිරීම ඇරඹිණි. පොලිස් නිලධාරියාගේ භූමිකාව නිම වීමෙන් පසු මම ඔහු ළඟට කිට්ටු වුණෙමි.

සරසවිය පුවත්පතට දුරකථන ඇමතුම දුන්නේ ඔවු.... මම තමයි....

වාඩි වෙන්න ....

මම අධ්‍යක්ෂක මහත්මයාව මුණ ගස්වන්නම්....

එසේ කියමින් ඔහු අධ්‍යක්ෂකවරයාගේ සමීපයට ගියේය. දැකලා පුරුදු ඔහු ඒ වෙන කවුරුවත් නෙවෙයි, රංගන ශිල්පී බුද්ධික ජයරත්නයි. ආරුගම්බේ වෙරළ පොලිසියෙන් කියා දර්ශන තලය වෙත එන්න අවස්ථාව සලැසු ඔහු සිනමාපටයේ ප්‍රධාන චරිත නිරූපණය කරන රංගන ශිල්පීන් අතර පොලිස් නිලධාරියාගේ චරිතයට පණ දෙන්නේය.

 

(Marco Mordechai carmel)  මාර්කෝ කාර්මේල් ඊශ්‍රායල් සිනමාවේ පළපුරුදු සිනමාකරුවෙකි. ඔහු ෆාදර් ලයික් යූඅ ෆාදර්, ෆුඩ් ස්ටෝන්, මයි ලව්ලි සිස්ටර් යන චිත්‍රපටය නිර්මාණය කළේය. අධ්‍යක්ෂකවරයාගේ වේලාවෙන් ස්වල්ප වේලාවක් අප වෙනුවෙන් වෙන් කරන්නට ලැබීමෙන් ඔහු උද්දාමයට පත් වන්නට ඇති.

බොහොම සන්තෝෂයි.... මගේ සිනමාපටය සොයාගන ආවට.......

මොනවද දැන ගන්න ඕනේ ?

දැන් පළමු පැනය මගෙනි.

මේ සිනමාපටය ශ්‍රී ලංකාවේ රූගත කරන්න අදහස් කළේ ඇයි ?

මාර්කෝ - මම මීට පෙර කිහිපවරක්ම ශ්‍රී ලංකාවට ඇවිල්ලා තියෙනවා. එන්නේ සර්ෆිං ක්‍රීඩාව කරන්නයි. ඒ ඇවිත් ලබපු අත්දැකීම් වගේම ලෝකයේ රටවල් ගත්තාම සර්ෆින් ක්‍රීඩාව කරන්න තියෙන තැන් බොහොම අඩුයි. ඒත්, ඒ හැකියාව ඇති රටවල් අතර ශ්‍රී ලංකාවෙ වගේ වෙරළ තීරයක් හමුවන්නේ නෑ වෙනත් කිසිම රටක. ඒ නිසයි මේක තෝරා ගත්තේ. ඒ වගේම මගේ ජීවිතයටත් ශ්‍රී ලංකාව හරි සමීපයි. මේ සිනමාපටය මගේ සිහිනයක්. සමහර විට ඔයාලට වැඩිය මම මේ අරුගම්බේට ඇවිල්ලා තියෙනවා වෙන්න පුළුවන්. මේ සර්ෆින් ක්‍රීඩාවත් එක්ක තරුණයකුට හා තරුණියකටත් වගේම තරුණයන් පිරිසකටත් මුහුණ දෙන්න වෙන ගැටලු රාශියක් පාදක කරගෙනයි මේ සිනමාපටය ගොඩනැඟෙන්නේ. ඒක තමයි සරලවම කියනවා නම් මට කියන්න තියෙන්නේ. මෙහි තිර පිටපත ලියන්නේ මගේ බිරිඳ මාර්කෝ කාමේල්. ශ්‍රී ලංකාව වෙනුවෙන් මෙහි නිෂ්පාදන කටයුතු ශ්‍යාමන් ප්‍රේමසුන්දර කරන්නෙ. ඔහු මට හොඳ සහයෝගයක් ලබා දෙනවා. ඇත්තටම කියනවා නම් මම මේ සිනමාපටය කරන්න හිතන් හිටියේ තායිලන්තයේ. පස්සේ මම ඒ තීරණය වෙනස් කළා. යම් යම් හේතූන් මත අපි ගේන්න හිටපු සමහර කැමරා උපකරණවත් අපිට ගේන්න බැරි වුණා. නමුත් හිතුවටත් වැඩිය හොඳට ෆිල්ම් රූගත කරන්න මට හැකි වුණා. ශ්‍රී ලංකාවෙන් තෝරාගත් රංගන ශිල්පීන් මේ සිනමාපටයට හොඳ දායකත්වයක් ලබා දුන්නා. ඒ ගැන මම ඇත්තටම සතුටු වෙනවා. අනිත් අංශවල අයත් මේකට ඇත්තටම හොඳ සහයෝගයක් ලබා දෙනවා.

 

මම තිර පිටපත ලියූ මෝ පොලොනෝර් (Mor Polanuer)වෙත හැරුණෙමි.

අරුගම්බේ තිර පිටපත ලියවෙන්නේ කොහොමද ?

මෝ පොලොනෝර්- මට මතක හැටියට මේක හත් වෙනි තිරපිටපත වෙන්න ඕනෑ. මම විවිධ වස්තු විෂයයන් ඔස්සේ තිර පිටපත් ලියලා තියෙනවා. හැබැයි මේ පිටපත මට හරි සුවිශේෂී සිනමා පිටපතක්. එයට හේතුව තමයි, මගේ සැමියා වගේම මාත් ශ්‍රී ලංකාවට ඇවිත් තියෙනවා කීප වතාවක්ම. ඒ හැම අවස්ථාවකම අපි සර්ෆින් කළා. අරුගම්බේ අරුණාම, අපි මිරිස්සෙ සර්ෆින් ක්‍රීඩාවේ යෙදිලා තියෙනවා. හැබැයි මිරිස්ස ඇරුණාම ලස්සනම තැන තමයි, අරුගම්බේ. මාර්කෝගේ සිහිනයක් තිබ්බා කවදා හරි ශ්‍රී ලංකාවේ සිනමා පටයක් රූපගත කරන්න අපි ආපු ගිය දේවලුත් එක්ක මේ කතාව පදනම් කරගෙන මම කතාව ලිව්වා. අපි දෙන්නම එකම කර්මාන්තයේ නියැළෙන නිසා මේ වගේ නිර්මාණයක් කරන්න ලේසියි. අනික අපේ රටවල් දෙක අතර තියෙන සහයෝගිතාවය මේකෙන් හොඳට පෙන්නුම් කරාවි. අපේ රටේන් අරුගම්බේට එන පිරිස් වැඩියි. අපිට මේ ලොකේෂන් එක හොඳට හුරු ස්ථානයක් හින්දයි අපි මෙතැන තෝර ගත්තේ. ඒ නිසා මම සිනමාපටය පුරාම ගලා යන චරිත මොනවද කියලා හොඳට අවබෝධ කරගෙන තිර පිටපත ලියලා අවසන් කළා. ඒකේ ප්‍රතිඵලය තමයි, අපි මේ සියලු දෙනාම භුක්ති විඳීන්නේ. රටවල් දෙකක රංගන ශිල්පීන් එකතු වුණාම හොඳ නිර්මාණයක් බිහි වෙනවා. මම ඒ දේට කැමතියි.

 

මාර්කෝ කාමේල්ගෙන් සමුගත් මම දර්ශන තලයේ කෙලවරක හිඳ සිටි ප්‍රධාන රංගන ශිල්පියා හා ශිල්පිනිය අසළට ළං වූයෙමි.

 

ඔවුන් නම් වලින් ජෝයි රිගා සහ මීරා ටසූර්ය. Joy Rieger , Mira Tzur,
 

කොහොමද ඔබලාට....? අරුගම්බේ සිනමාපටය ශ්‍රී ලංකාවේ රූගත කිරීම ගැන මොකද හිතෙන්නේ ?

සිනමා පටයේ රූගත කිරීමත් එක්ක අපි සතුටින් ඉන්නවා.

ඇත්තටම ශ්‍රී ලංකාව හරි සුන්දර රටක්. අපි දෙන්නම කතා කළේ ශ්‍රී ලංකාව තරම් ලස්සන තැන් සහ දේශගුණයෙ විවිධ වෙනස්කම් තියෙන රටවල් හොයාගන්න හරි අමාරුයි. නිදහසේ ඉන්න පුළුවන් වාතාවරණයකුත් තියෙනවා. දක්ෂ රංගන ශිල්පීන්, ශිල්පිනියන් ඉන්නවා. අපි දෙන්නට ඒ වගේ අයත් එක්ක රඟපාන්න ලැබීම ගැන සතුටුයි. අපේ අධ්‍යක්ෂකතුමා අපිට මේ ගැන සඳහන් කළාට පසු අපි හරිම කැමැත්තෙන් මෙහෙ එන්න බලාගෙන හිටියේ. රුපගත කිරීම අවසන් වුණාම අපි යනවා. හැබැයි ශ්‍රී ලංකාව වටේ පොඩි රවුමක් දාලා යන්න එනවා. සිනමාපටය තිරගත වෙනකොටත් එන්න බලනවා.

 

ලී කණු සිටවා, පොල් අතු සෙවිලි කර සාදන ලද කුඩා කුඩා අට්ටාල කිහිපයක් වෙරළට මඳක් දුරින් තනා තිබේ. එහි රැඳී සිටින කිහිප දෙනෙකු අතර හුරු පුරුදු රංගන ශිල්පියකු දක්නට ලැබුණි.

මේ අන් කවරෙකු නොව ඔබ මා කවුරුත් හඳුනන ප්‍රවීණ රංගවේදී සනත් ගුණතිලකයි. "එනවා කියලා දන්න හින්ද තමයි මම යන්නැතුව හිටියේ " ඔහු කතාවට මුල පිරීය.

" මම මේ සිනමා පටයට සම්බන්ධ වන්නේ තිස්ස අබේසේකර මහත්තයාගේ සිනමා වැඩ මුළුවකදී හදුනාගත් ශ්‍යාමන් නිසයි. මට ශ්‍යාමන් පහුගිය දවසක කියනවා, " පොඩි වැඩක් තියෙනවා, හැබැයි ලොකු වැඩක් නෙවෙයි. අන්තර්ජාතික සිනමා පටයකට හෝටල් භාරකරුවකු ලෙස රංගනක නියැළෙන්නයි. හැබැයි... ඒ වෙනකොට මම තව වැඩක තමයි හිටියේ.....ඒ කාලේ රැවුලත් වවාගෙන ඉන්න කොට ඒ ස්වරූපයෙන්ම පින්තූරයක් මාර්කෝට යවලා තියෙනවා. ඊට පස්සේ මාර්කෝ ඒකට ඕකේ කරගෙනයි මාව මේ චරිතයට තෝර ගත්තේ. ඊට පස්සේ ඊශ්‍රාලයෙ සිටින මේ සිනමා පටයට දායක වන සියලු දෙනාම ගෙන්වා ගැනීමට විදේශ සේවා නියුක්ති කාර්යාංශයෙ මංගල රන්දෙණිය ඇතුළු පිරිස හා සංචාරක මණ්ඩලය ලොකු සහයෝගයක් දුන්නා. ඒක අපිට ලොකු හයියක් වුණා.

වසර ගණනාවක් තිස්සේ යුද්ධයත් සමඟ සංචාරක කර්මාන්තය ඇදගෙන ගිය මේ ප්‍රදේශය, දැන් විදේශීය සිනමා පටයක් රූගත කිරීම, එහි නම අරුගම්බේ ලෙස සටහන් කිරීමත් ශ්‍රී ලාංකීය සිනමාවටත්, අන්තර්ජාතික සිනමා කර්මාන්තයටත්, අපිටත් ලොකු හයියක්. අනික ශ්‍රී ලංකාවට හොඳ සන්නාමයක් වෙනවා. ඇතැම් විදේශීය සිනමාකරුවන්ට දර්ශන තල සොයා ගැනීමට විවිධ මාර්ග උපයෝගී කරගන්න වෙනවා. මේ සිනමාපටය හරහා මාර්කෝ අධ්‍යක්ෂකවරයා ලෝකයට හොඳ පණිවුඩයක් දෙනවා. ශ්‍රී ලංකාවෙ නැගෙනහිර ප්‍රදේශයේ මේ වගේ ස්ථානයක් තියෙනවා කියන එක. ඒකම අපේ සිනමාවට කරන ලොකු මෙහෙවරක්. ශ්‍රී ලාංකේය සිනමාපටයකට දායක වෙනවා වගේ නෙවෙයි ජාත්‍යන්තර සිනමා පටයක දායක වෙනවා කියන එක. ඒකේ ලොකු වටිනාකමක් තියෙනවා. අද මට මේ සිනමාපටය සමඟ රංගනයෙන් එක් වන්න වුණාට ඊළඟට එන සිනමා පටයට වෙනත් රංගන ශිල්පිනියක් හෝ ශිල්පියෙකුට එකතු වෙන්න පුළුවන්. ඒක තමයි විය යුත්තේ. මේ සිනමාපටයේ අධ්‍යක්ෂ මාර්කෝ ඔහුට ලැබෙන උපරිම සම්පත් දායක කරගෙන දර්ශන හා අවකාශ අනුව රූප රාමු වෙනස් කරමින් සිනමාපටය නවතම දිශාවකට ගෙනියනවා. ඒක හරිම සුවිශේෂි ලක්ෂණයක්. එවැනි අධ්‍යක්ෂකවරුන්ට අපි හොඳ උත්තේජනයක් වෙන්න ඕනෑ. මට මේ සිනමාපටයේ වැදගත් වන්න‍නේ චරිතයේ දිග පලළ නෙවෙයි. මාර්කෝට සහ ඔවුන්ගේ රටේ අධ්‍යක්ෂකවරුන්ට සිනමාවේ නියැළෙන්නන්ට මගෙන් යම් මෙහෙවරක් කරන්න පුළුවන් නම් ඒක තමයි මම ලොකුවටම බලාපොරොත්තුව වුණේ. මගේ මේ හතරවෙනි ජාත්‍යන්තර සිනමා පටය. ඒ කරපු සිනමාපට අතරින් භාරති රාජා කළ, (හන්නා ලයි කයිදුසේයි- ඔබේ දෑසේ හිර කරන්න) සිනමා පටය මගේ ජීවිතයට අතිශයෙන් වැදගත්. මේ ව⁣ගේ ජාත්‍යන්තර සිනමා පට විවිධ ප්‍රදේශවල රූපගත කරන්නට දූපත් මානසිකත්වයෙන් මිදිලා රජය රටේ සභ්‍යයත්වය හා සංස්කෘතිය ආරක්ෂා කරගෙන ජාත්‍යන්තර සිනමා අධ්‍යක්ෂකවරුන්ට අවශ්‍ය සහයෝගය සලසා දෙන්න ඕනෑ. "

හෝටල් භාරකරු වූ සනත් ගුණතිලකගෙන් සමුගත් මා සංචාරක පොලිසියේ ඕ.අයි.සී.මහත්තයා හමුවීමට කීපවතාවක්ම මම උත්සාහ දැරුවත් ඔහුගේ රාජකාරිය ඊට වඩා ඉහළින් සිදු වේ. එනිසා අධ්‍යක්ෂකවරයාගේ අණින් තොරව ඔහුව නිදහස් කර ගැනීමට මට නොහැකිය. පුවත්පතට දුරකථන ඇමතුමක් දී අපවත් ගෙන්වාගන්න තරම් මෙහි වැදගත්කම ඔහු කලින්ම දැනගෙන සිටියාට සැක නැත.

* වෙරළ තීරයේ රාජකාරි වැඩියි වගේ නේද?

ඔව්... බෑගයක් උස්සලා.... හරි කචල් එකක් අප්පා......

ඉඳලා, ඉදලා එය වගේ වැඩ වෙනවා. ඒක හරි සිරියස් කේස් එකක්. මොකද දන්නවද? ඒක විදේශිකයෙකුගෙ බෑග් එකක්... .

ඒ මදිවට කොල්ලො සෙට් එකකුත් පොඩි ගේමක් දීලා තියෙනවා.

ඔළුව කචල් වෙනවා මේ වෙරළ තීරයේ.....

මේ පොලිස් නිලධාරියාගේ චරිතය තුළ ජීවත් වූයේ බුද්ධික ජයරත්නයි.

" ශ්‍යාමෙල් තමයි මේ නිෂ්පාදන කණඩායම ගේන්නේ. ඔහු තමයි ශ්‍රී ලංකාවේ රේඛීය නිෂ්පාදකවරයා. ඔහුට විශේෂයෙන් ස්තූති කරන්න ඕනෑ මෙවැනි නිර්මාණයක් මේ කාලේ ශ්‍රී ලංකාවට ගෙන එම සම්බන්ධව. මට මේ සිනමාපටය විශේෂයි. මගේ පළමු ජාත්‍යන්තර සිනමාපටයත් මේක. සමහරවිට මේක මගේ හැරවුම් ලක්ෂ්‍යයක් වෙන්නත් පුළුවන්. අපේ රට හරිම ලස්සන රටක්. විදේශීය සිනමාකරුවන් මේක හොයාගෙන එන්නේ ඒ නිසයි. මෙහි අධ්‍යක්ෂකවරයා ⁣මාර්කෝ අරුගම්ට 31පාරක් ඇවිල්ල තියෙනවා. මම ඇවිල්ලා තියෙන්නේ දෙපාරයි. ඒකෙන්ම පේනවනේ අපේ රටේ තියෙන ලස්සන අපි විඳීන්නේ නැහැ. රටේ තියෙන ලස්සන තැන් ඔවුන්ගේ සිනමා කර්මාන්තයේ දර්ශන තල වෙනුවෙන් අපිට උදා කරලා දෙන්න පුළුවන්. ඒක අපේ රටට හොඳ අවස්ථාවක්. අපේ කර්මාන්තයටත් හොඳ අවස්ථාවක්. ඒකට අපි හැමදෙනාම කැපකිරීමක් කළොත් අපිට ගොඩ යන්න පුළුවන්. මේ ඇවිල්ලා ඉන්න ෆිල්ම් ටීම් එක හරිම ආදරෙයි ශ්‍රී ලංකාවට. මෙම සිනමාපටයේ තිර රචනයත් හරිම සුන්දර ලෙසට ආදරය, දයාව කරුණාව, ත්‍රාසය, භිතිය මෙන්ම ප්‍රචණ්ඩත්වය සිනමාපටය පුරාම තියෙනවා. ඔවුන් මේ සිනමාපටය ජාත්‍යන්තරයට ගෙනියන්න නම් මේ සියලු දේම ගැබ් විය යුතුමයි. ඒක හොඳ තිර පිටපත් රචකයන්ගේ තිබෙන ලක්ෂණයක්. ටීම් එක හරි එකමුතුයි. ඒ හැමදෙනාම හිතන්නෙ තමන්ගෙ නිර්මාණය මේක කියලා. ඇත්තටම ඒක තමයි වෙන්න ඕන. එතකොට තමයි හොඳ නිර්මාණයක් බිහිවෙන්නේ. අපිටත් රංගන ශිල්පීන් හැටියට මව් කතාවට සෘජුවම සහභාගි වෙන්න ලැබීම ගැන මමත්, අශාන්, සහ සනත් ගුණතිලක හරිම සන්තෝෂ වෙනවා. ප්‍රධාන කතාවකට මීට පෙර සෘජුවම සම්බන්ධ වෙන්න අපිට හම්බවෙලා නෑ. මේ අවස්ථාව ලැබිමත් භාග්‍යක්. අනික මෙවැනි නිර්මාණ කරනකොට අපෙන් විය යුතු සුවිශේෂී දේවල් ටිකක් තියෙනවා. ඒ දේවල්වලින් එකක් තමයි මේ ප්‍රචාරණ කටයුතු කියන එක. ඒ නිසා තමයි මම කාකි ඇඳුම් කාරයෙක් විදිහට කතා කරලම පණිවිඩයේ දුන්නෙ. දවස් 26 ක් රූපගත කිරීම් කළා. අපි දවස් පහක් රූපගත කිරීම්වලමයි හිටියේ. එතකොට තිරයේ ධාවනය වන කාල සීමාව සැලකිය යුතු ධාවන කාල සීමාවක් වේවි. ඒක අපිට හරි වැදගත්. මොකද මේක ජාත්‍යන්තර සිනමා ලේබලය යටතේ තමයි තිරගත වෙන්නේ. රටවල් ගණනාවක, භාෂා කිහිපයකින් ලබන වසරේ ප්‍රදර්ශනය ආරම්භ කරන්න ලැස්තියි. යම් රටක, යම් ප්‍රදේශයක අනන්‍යතාවයක් වූ නමක් යෙදීම තුළින්ම මේ දර්ශන තලය හොයාගෙන එන්න පොරකන පිරිස වැඩි වෙන්න පුළුවන්. ඒක ඉදිරියට හොඳ ලක්ෂණයක් වෙයි. මගේ අදහස නම්, අපිත් ගෝලීයකරණය විය යුතුයි.

දර්ශන තලයේ රූප රාමු කිහිපයකම ප්‍රධාන නළුවාට රඟපාන ඊශ්‍රායල් ජාතික රංගන ශිල්පියා ජෝයි රිගා (Joy Rieger)) පොලිස් සිර මැදිරියේ සිරගත වී සිටිනවා. ඔහුට පොලිස් නිලධාරියා ආහාර වේල ගිහින් දෙන අයුරු සහ ඔහු අතර සිදුවෙන සංවාදය මේ මොහොතේ රූගත කෙරෙනවා. "

 

දැන් මම ශ්‍රී ලාංකීය නිෂ්පාදකවරයා ලෙස කටයුතු කරන ශ්‍යාමෙල් ප්‍රේමසුන්දර වෙත යොමු වූයෙමි. ඔහු ෆේ‍්‍රම්ස් ටීවී ඇන්ඩ් ෆිල්ම්ස් සමාගමේ කළමනාකාර අධ්‍යක්ෂවරයාය. මේ සියල්ල මෙන්ම සූරිය අරණ චිත්‍රපටයේ සංස්කරණය සහ ශබ්ද පරිපාලනය වෙනුවෙන් සරසවිය සම්මාන දිනාගත්තේ ඔහුය. මෙම සම්මාන දෙකම එකවර දිනාගත් එකම තැනැත්තාද ඔහුය.

" මගේ ආයතනයෙන් කෙරෙන්නේ ජාත්‍යන්තර සිනමපට නිෂ්පාදනය. ඒ අනුව මට ජාත්‍යන්තර සිනමා පට නිෂ්පාදනය කරන සමාගම් සමඟ සම්බන්ධතාවයන් තියෙනවා. ශ්‍රී ලංකාවේ මෙවැනි නිෂ්පාදනාගාර කිහිපයක් තියෙනවා. ඒ අතර ඉන්න එක්කෙනෙක් තමයි මම. ඇත්තටම මම සතුටු වෙන්නේ මේ වගේ අසීරු කාල වකවානුවක මෙවැනි සිනමා කණ්ඩායමක් ඇවිත් ‘ආරුගම්බේ‘ යන නමින් සිනමාපටයක් රූපගත කිරීම ගැනයි. පළමුවෙන්ම මම ඔවුන්ට ස්තූති වන්ත වෙනවා මෙවැනි කාලවකවානුවක ඇවිත් මේ වගේ වැඩක් කරන එක ගැන. හැබැයි, ඔවුන් ශ්‍රී ලංකාවට පැමිණියාම නොයෙක් බාධා ඇති වුණා. ඒත්, ඒවා කොහොම හරි නිවැරදි කරගෙන ඔවුන්ව ගෙන්වා ගැනීමට මට හැකි වුණා. ඒක මම ලබපු ලොකු ජයග්‍රහණයක්. ශ්‍රී ලංකාවේ මොන ප්‍රශ්න තිබ්බත් ඔවුන්ට මම ඒවා පෙන්වන්නෙ නෑ. ප්‍රශ්න පෙන්නුවොත් මේ වැඩේ කරගන්න බැරි වෙනවා. ඒ නිසා ඔවුනුත් දන්නවා මම කොහොම හරි මේ වැඩේ කර ගන්නට අවස්ථාව සලසා දෙනවා කියලා. ඒ විශ්වාසය මත මම මේ වැඩේ කොහොම හරි කරගෙන යනවා. ඔවුන්ගේ ආරක්ෂාවෙ වගකීම මා සතුයි. මම එය නොපිරිහෙලා ඉටු කරන්න ඕනෑ . මට යම් තරමකින් රාජ්‍ය මට්ටමෙන් සහයෝගයක් ලැබිලා මෙවැනි නිර්මාණකරණයට දොරගුළු විවර වෙනවානම් ශ්‍රී ලංකාවට ඕන තරම් විදේශ මුදල් ගලාගෙන එනවා. අන්න එතෙන්ට මේ ෆිල්ම් එක ගෙන යාම තමයි මගේ එකම අරමුණ. අරුගම්බේ බ්‍රෑන්ඩ් නේම් එකක් තමයි, මෙම සිනමා පටය විදේශිය රටවල් 50 කට වැඩි සංඛ්‍යාවක ප්‍රදර්ශනය ආරම්භ කරන්නේ. හීබ්රූ භාෂාවෙන් තමයි කතාව දිග හැරෙන්නේ. රටවල් දෙකක් අතර තරග කරලා තමයි මේ සිනමාපටය මම ශ්‍රී ලංකාවට ගෙනාවේ. මෙහි රූගත කිරීම් ආරම්භ කරන්න ඉස්සෙල්ලා මේකෙ නම වුණේ ‘කර්ම පොලිස්‘. ඒ තායිලන්තයේ නමෙනුයි රූගත කිරීම් කරන්න සියලු දේම යොදා ගෙන තිබුණේ. ඊශ්‍රායල් ජාතික රංගන ශිල්පීන් පස් දෙනෙක් ද ශ්‍රී ලංකාව නියෝජනය කරමින් පස් දෙනෙක් ද චරිත නිරූපණය කරනවා. සනත් ගුණතිලක, බුද්ධික ජයරත්න හා අෂාන් ඩයස් ප්‍රධාන චරිත අතරට තෝරා ගත්තා. රුවන් ෆර්ඩිනැන්ඩු සහ කීර්ති රන්ජිත් පීරිස් මෙයට දායක වනවා.

ඉදිරියේදී ෆිල්ම් සංචාරක කර්මාන්තය පැත්තෙන් හොඳ නිර්මාණ කිහිපයකට දායක වෙන්න පුළුවන් වුණොත් අන්තර්ජාතික සිනමා කර්මාන්තයයේ ශ්‍රී ලංකාව කියන නම සහ ආරුගම්බේ කියන නාමය ඔසවා තබන්නට හැකි වේවි.

විදේශීය සිනමා නිෂ්පාදකවරු හා අධ්‍යක්ෂවරුන්ට අවශ්‍ය පහසුකම් සියල්ල සලසා දුක්නොත් අපේ සිනමා කර්මාන්තයට එන්න කැමති වේවි. අරුගම්බේ විතරක් නෙවෙයි, අනිත් ස්ථානවලටත් වටිනාකමක් හැදෙයි. එහෙම වුණොත් අපේ සිනමා කර්මාන්තය විතරක් නෙමේ, හැම දෙනාගේම සාක්කුවත් සරු වෙන්න පුළුවන්. අපි කොහොමහරි එකතුවෙලා මේකෙ ජය ගැනීම තමයි කළ යුතු හොඳම දෙය. "

 

ඊශ්‍රාලයේ සහ ශ්‍රී ලංකාවේ කාර්මික ශිල්පීන් මෙම සිනමාපටයට දක්වන දායකත්වය අගේ කළ යුතුමය. අන්තර්ජාතික සිනමාපටයක රූගත කරන අවස්ථාවේ ඔවුන්ට ලැබෙන අත්දැකීම අතිශය වැදගත්ය. ඔවුන්ට පමණක් නොවේ, අපට ද අතිශයින් වැදගත්ය. සිනමා පටයේ රූගත කිරීම් අවසන් වන දිනය දක්වා එහි තිබෙන කාර්යභාරය එකිනෙකාට බැඳී ඇත. ඒ වගකීම බැහැර විය නොහැකි ලෙසින් සිනමාපටය පුරාම බැඳී ඇත. කලා අධ්‍යක්ෂකවරයකු වන අතුල සුල්තානාගොඩ සහ කැමරා අධ්‍යක්ෂක ඇඩම්ස් ඇඳුම් නිර්මාණ ශිල්පිනිය ඔනාලි අයේෂ්මන්ති පවසන්නේ මේ සියලු අත්දැකීම් මිල කළ නොහැකි බවයි. දර්ශන තලයේ සිටි සියලු දෙනාගේම සතුට මුහුණුවලින් පෙනෙන්නට වෙයි. ඔවුන් දින විසි හයක් තුළ රූගත කිරීම් ආරම්භ කර දැන් උදා වී ඇත්තේ අවසන් දවසය. අධ්‍යක්ෂකවරයා එකවරම කට් කියා සුළු වෙලාවකින් ‘ලෙඩීස් ඇන්ඩ් ජෙන්ටර්මන් පැකප් ද ෆිල්ම්‘ ඔවුහු එකිනෙකාට සුබ පතා ගත්හ. අනතුරුව අධ්‍යක්ෂකවරයා ද සියලුම දෙනාට සුබ පැතුවේය. බුද්ධික ජයරත්නට අධ්‍යක්ෂක මාර්කෝ විසින් ඔහුව වැලද ගනිම්න් විශේෂ ස්තූතියක් කළේ මගේ තෙවැනි ඇසට එහි සටහනකට ද ඉඩ සලසමින්ය. තමා දැන්...... අධ්‍යක්ෂක මාර්කෝ නැවතත් ‘ඕකේ ලෙඩීස් ඇන්ඩ් ජෙන්ටර්මන් තැන්ක් යූ‘ කීවේ "ආරුගම්බේ" සිනමාපටය රූගත කිරීම් සාර්ථකව නිමා කළ බව සනිටුහන් කරමිනි.

 

 

සේයාරූ - නිශ්ශංක විජේරත්න