පියෙකු, තම පුතාගේ පෙම්වතිය සමඟ පුතාට හොරෙන් දැඩි ලෙස ලිංගික සම්බන්ධකමක් ගෙන යන්නේ නම්, එය මොනතරම් පහත් ක්‍රියාවලියක්දැයි බොහෝ අයට සිතෙන්නට පිළිවන. එලෙසම එම ලිංගික සම්බන්ධකම එකී පුත්‍රයාගේ අතටම අසුවූවහොත් එතැන ඇතිවන තත්ත්වය කෙබඳු වේද? එය බටහිර වේවා, යුරෝපයේ වේවා, ආසියාවේ වේවා, අප්‍රිකාවේ වේවා, ලොව කුමන රටක, කුමන ජාතිකයක් වේවා, එතැනින් පසු ඇතිවෙන්නේ විශාල ඛේදවාචකයකි. 'ඩැමේජ්' එලෙස විශාල 'ඩැමේජ්' එකක් වූ චිත්‍රපටයකි.

වෙළඳාම් මාමාගේ ලොකු පුතා ගුණපාල සෝමා සමඟ විවාහ වී තම ගෙදරට ගෙන ආ දවසේ, ගුණපාල පළිඟු මාණික්‍යයක් නිවසට ගෙන ආ බව කීවේ ගුණපාලගේ පියා වෙළඳාම් මාමාය. අවසානයේදී තම ලොකු පුත් ගුණපාලටත් හොරා ඔහුගේ අඹුව වූ සෝමා සමඟ ලිංගික සබඳකමක් ගෙන ගියේ ගුණපාලගේ පියා වූ වෙළඳාම් මාමාය. එය දැන ගත් පසු ගුණපාල කළේ හෙමින්ම තම බිරිඳව තාත්තාටම දී, ගමෙන් පිටවීමය. ඒ ගුණදාස අමරසේකර ලියූ, තිස්ස අබේසේකර හැදූ 'කරුමක්කාරයෝ' චිත්‍රපටයේය. නමුත් 'ඩැමේජ්' හී, මාර්ටින් ෆෙලෙමින්ග් තම පෙම්වතිය වූ රූමත් ඈන් බාර්ටන්, තම පියා වූ ස්ටෙෆන් ෆෙලෙමින්ග් සමඟ ලිංගිකව හැසිරෙනවා අතට අසුවූ පසු ඔහු තම පෙම්වතිය, තම පියාටම භාර කළාද?

වෙළඳම් මාමාට, ගුණපාලගේ බිරිඳව තමාගේම කරගැන්මට වුවද හැකියාව තිබුණේ, ඒ වන විටත් වෙළදම් මාමාගේ බිරිඳ, එනම් ගුණපාල ගේ මව, මිය පරලොව ගොස් තිබුණු නිසාය. නමුත් 'ඩැමේජ්' හී මෙම සිදුවීම අහුවණ විටත් ස්ටෙෆන් ෆෙලෙමින්ග් තම බිරිඳ වූ ඉන්ග්‍රිඩ් තොම්ප්සන් සමඟ සාර්ථක පවුල් ජීවිතයක් ගත කරමින් සිටියේය. ඒ හෙයින්, මෙම සිදුවීම නිසා මාටින් ෆෙලෙමින්ග් ට තම පෙම්වතියව තම පියා⁣ට භාර දී පලා යෑමට හැකියාවක් තිබුණේ නැත. එසේ නම් සිදුවූයේ කුමක්ද?

ජොසපියන් හාර්ට්, අයිරිශ් ජාතික ලේඛිකාවියෙකි. 1991 වසරේදී ඇය, ඇයගේ මුල්ම නවකථාව වින්ටේජ් පොතක් ලෙස එළි දැක්විය. ඒ 'ඩැමේජ්'ය. ඉන්පසු ඇය 'සින්', 'ඔබ්ලිවියන්', 'ද ස්ටිලස්ට් ඩේ', 'ද රිකන්ස්ට්‍රක්ෂනිස්ට්', 'කැචින් ලයිෆ් බයි ද ත්‍රෝට්', සහ 'ද ටෘත් අබවුට් ලව්', යන නම් වලින් යුක්තව පොත් කීපයක් එළි දැක්විය.

ජොසපියන් හාර්ට් ගේ 'ඩැමේජ්' නව කථාව කියවූ පසු එය චිත්‍රපටයකට නංවන්නට උවමනා වූයේ 'ලුයිස් මලේ' ටය. ඔහු ප්‍රංශ චිත්‍රපට තිර රචකයෙකි, අධ්‍යක්ෂකවරයෙකි, එමෙන්ම නිෂ්පාදකවරයෙකි. ඔහු තම අධ්‍යක්ෂණය ආරම්භ කළේ 1953 වසරේදීය. ඒ 'ක්‍රේසියෝලොජි' චිත්‍රපටයෙනි. ඔහු එහි අධ්‍යක්ෂණයට අමතරව තිර රචනයද ලිවීය. ඔහු මුලින්ම චිත්‍රපටයක් නිෂ්පාදනය කළේ 1960 දීය. ඒ 'සැසී ඉන් ද මෙට්රෝ', චිත්‍රපටය ය. ඔහු එහි නිෂ්පාදනයට අමතරව තිර නාටකය ලියා, අධ්‍යක්ෂණයද කළේය. 1953 සිට 1994 දක්වා ඔහු චිත්‍රප⁣ට 24 කට සම්බන්ධවූ අතර ඉන් 22 ක් අධ්‍යක්ෂණය කර, 14ක තිර රචනය ලියා තිබුණි. ඒ අතරේ චිත්‍රපට 8 කට නිෂ්පාදනයෙන්ද දායක වී තිබුණි. 'ඩැමේජ්' ඔහුගේ 21 වන අධ්‍යක්ෂණය වූ අතර, 7 වන නිෂ්පාදනය විය.

ඔහු 'ඩැමේජ්' හී තිර රචනය ලිවීමට භාර දුන්නේ 'ඩේවිඩ් හ⁣රේ' ටය. 2008 වසරේ තිර ගත කළ කේට් වින්ස්ලෙට් රඟපෑ ඇමරිකානු ඩොලර් මිලියන 108.9 ක් ඉපැයූ 'ද රීඩර්' මෙන්ම 2002 වසරේ තිරගත වූ මෙරිල් ස්ට්‍රීප් රඟපෑ ඇමරිකානු ඩොලර් මිලියන 108.8 ක් ඉපැයූ 'ද අවර්ස්' චිත්‍රපටයේ තිරනාටක ලීවේද, ඩේවිඩ් හරේ ය ඔහු ඇමරිකානු ඇකඩමි සම්මානයට හොඳම තිර රචකයා ලෙස නිර්දේශ වූයේ ද, මේ 'ද අවර්ස්' චිත්‍රපටයටය

ඩේවිඩ් හරේ, ජොසපියන් හාර්ට් ගේ නව කථාව තුළ තිබූ මානුෂීකත්වය දෙසය මුලින්ම අවධානය යොමු කළේ. එය පැහැදිලිව පෙනුණේ 'ඉන්ග්‍රීඩ් තොම්ප්සන් ෆෙලෙමින්ග් ගේ චරිතය තිරනාටකය තුළින් ඉස්මතු වී එන නිසාය. ඉන්ග්‍රීඩ් තොම්ප්සන් යනු මෙම කථාන්තරයේ කථා නායකයාගේ බිරිඳය. චිත්‍රපටය තුළදී ප්‍රේක්ෂක දැඩි අනුකම්පාව දිනා ගන්නේ මේ ඉන්ග්‍රීඩ් තොම්ප්සන් චරිතයය. තම සැමියාගේ අවලම් වැඩ නිසාත්, එකම පුතුගේ ඛේදවාචකය නිසාත්, මේ මිහිතලය නොඋසුලන තරම් දුක් කරදර, සමාජීක අවමන් වලට මුහුණ දෙන්නට සිදුවුණේ ඉන්ග්‍රීඩ් තොම්ප්සන් ටය.

කථාව ගෙතී යන්නේ දොස්තර ස්ටෙෆන් ⁣ෆ්ලෙමින්ග් නම් වූ වෛද්‍යවරයා වටාය. ඔහු දේශපාලනයට එක්වී පසුව බ්‍රිතාන්‍ය රජය තුළ ඇමතිවරයෙකුගේ තත්ත්වයකට පත් වේ. ඔහුගේ බිරිඳ ඉන්ග්‍රීඩ් ය. ඔවුන් දෙදෙනාට සැලී නම් දියණියක් හා මාර්ටින් නම් පුත්‍රයෙක් ද සිටියි. මාර්ටින් මාධ්‍ය ක්ෂේත්‍රය ට සම්බන්ධ වී තිබූ අතර, ඔහු පදිංචි වී සිටියේ ලන්ඩන් හීය.

ඉතාමත් ප්‍රභූ ලෙස ජිවත් ව සිටි ෆෙලෙමින්ග් ගේ පවුල් සංස්ථාව ඉරිතැලී යන්නට පටන් ගත්තේ 'ඇනා බාර්ටන්' ඔවුනොවුනගේ ජීවිත වලට එක්වන්නට පටන් ගත් පසුවය. කවුද මේ 'ඇනා බාර්ටන්' ?

ඇනා බාර්ටන් යනු බ්‍රිතාන්‍ය තානාපතිගේ දියණියයි. ඇයගේ මව 4 වරක් විවාහ වූ ප්‍රංශ කාන්තාවකි. ප්‍රභූන්ටම වෙන්වූ එක්තරා සාදයකදී මාර්ටින් විසින් තම පියා වූ ස්ටෙෆන් ෆෙලෙමින් ට, ඇනා බාර්ටන්ව හදුන්වා දුන්නේ ඔහුගේ පෙම්වතිය ලෙසටය. එහෙත් ඇනා කීවේ මාර්ටින් ඇයගේ ළඟම මිතුරා බවය.

එසේ හඳුන්වා දුන් අවස්ථාවේම ස්ටෙෆන් ෆ්ලෙමින්ග්ට ඇයව ආකර්ෂණීය විය. ඉන් පසු දිනයක මාර්ටින් ඇයව තම නිවසට රැගෙන ගොස් තම මව වූ ඉන්ග්‍රීඩ්ට හඳුන්වා දුන්නේ ඇනා තමන්ගේ පෙම්වතිය බවත් තම දෙදෙනා ළඟදීම විවාහ වන බවත්ය. එවෙලේ මාර්ටින්ගේ පියාවූ ස්ටෙෆන් ද, ඒ අසල සිටියේය. එම අවස්ථාවේදී නම් ඇනා, මාර්ටින් තමාගේ පෙම්වතා බව පිළි ගතී. එහෙත් එම අවස්ථාවෙදී ද, ස්ටෙෆාන් හා ඇනා අතර ලිංගික හැඟීම් හුවමාරු වූවද, ඒවා මාර්ටින්ටවත් එලෙසම ඔහුගේ මව, ස්ටෙෆන් ගේ බිරිඳ වූ ඉන්ග්‍රීඩ්ටවත් දැණුනේ නැත.

ගුණපාල තම රූමත් බිරිඳවූ සෝමාව, ඇයගේ ගමේ සිට තම නිවසට රැගෙන ආ අවස්ථාවේ, ඇයගේ පැමිණීම ගැන වඩාත් සතුටු වූයේ ගුණපාල ගේ පියා වූ වෙළඳාම් මාමාය. එම අවස්ථාවේ වෙළඳාම් මාමා ගේ මුහුණ පුරා ඇතිවූ සතුටු සිනා රැල්ල ශෘංගාරාත්මක විය. නමුත් ඒ බවක් ඔහුගේ වැඩිමල් පුත් ගුණපාල දුටුවේ නැත. නොඑසේ නම් එය වැඩි සැලකිල්ලට ගත්තේ නැත.

'ඩැමේජ්' හා 'කරුමක්කාරයෝ' අතර තිබෙන සබඳතාවය බොහෝ විට එක සමාන විය. ඒ පියවරු දෙදෙනාම තම පුතුන්ගේ සහකාරියන් දෙදෙනාට ආශා කිරීමය. ඒ ආශාවේ මූලික හරය වූයේ ශෘංගාරයයි. ස්ටෙෆන් ට අවශ්‍ය වනුයේ තම පුතුගේ පෙම්වතිය හා සමඟ ශෘංගාරයේ වෙළීමටය. වෙළදාම් මාමාටද තම පුත්‍රයාගේ බිරිඳ සමඟ ශෘංගාරය වෙලීමට අවශ්‍ය විය. නමුත් මෙහී වෙනස වූයේ ස්ටෙෆන් පැටලෙන්නේ පුත්‍රයාගේ පෙම්වතිය සමඟය. ඔහුට ඇය හා ශෘංගාරයෙන් වෙළීම හැර ඇය සමඟ ජීවත් වීමට අවශ්‍ය නොවීය. ඒ ස්ටෙෆන්ට බිරිඳක් සිටින නිසාය. නමුත් වෙළදාම් මාමාට නම් ශෘංගාරයටත් එහා ගිය දෙයක් තම පුතු ගුණපාලගේ බිරිඳ ගෙන් උවමනා විය. ඒ ඇය සමඟ එකට ජීවත් වීමය. එයට ආසන්නම හේතුව වෙළදම් මාමාගේ බිරිඳ මිය ගොස් ඇති නිසා විය හැක.

කෙලෙස වෙතත් මෙම පොත් දෙක අතර හෝ චිත්‍රපට දෙක අතර උපුටා ගැනීම් වැනී දෑ පිළිබඳව නම් කිසිදු සබඳ කමක් නැත. ගුණදාස අමරසේකර ලියු 'කරුමක්කාරයෝ' පොත බිහිවූයේ 1955 දීය. ජොසපින් හාර්ට් ලියූ 'ඩැමේජ්' නවකථාව බිහිවූයේ 1991දීය. එලෙසම තිස්ස අබේසේකර අධ්‍යක්ෂණය කෙරූ 'කරුමක්කාරයෝ' චිත්‍රපටය තිරගත වූයේ 1980 දීය. ලුවිස් මාලේ අධ්‍යක්ෂණය කළ 'ඩැමේජ්' චිත්‍රපටය තිරගත වූයේ 1992 දීය. එහෙත් මේ නිර්මාණ දෙක තුළින් එකී නිර්මාණකරුවන් ⁣හතර දෙදෙනාම (එනම් පොත් ලියූ දෙදෙනා හා චිත්‍රපටය නිර්මාණය කළ දෙදෙනා ) ඉදිරිපත් කළේ මිනිසුන් හා ගැහැනුන්ගේ හැගීම්ය, ශෘංගාරාත්මක ආශාවෝය. එයින් උපරිමයට ගොස් ඇතිවන ඛේදවාචකයන්ය. මිනිසුන්, ගැහැනුන්ගේ අසීමාන්තික ආශාවන් හමුවේ, වයස, වගකීම් යන පවුරු කඩා බිද දමන ආකාරයන්ය. මෙම කථාන්තර දෙක තුළ නො එසේ නම් මෙම චිත්‍රපට දෙක තුළ තිබෙන සමාන කම ද එයමය.

ආකර්ෂණය යනු මහා පුදුමාකාර දෙයකි. එයට අසුවූ පසු එතනින් මතු වන්නේ රාගයයි. ඉන්පසු නොඉවසිලිමත් වන්නේ එය සමනය කර ගන්නටය. ඇනා බාර්ටන්ට ස්ටෙෆන් ෆෙලෙමින්ග් ගැන ආකර්ෂණයක් ඇතිවුණේ ඔහුගේ, පුත් තම පෙම්වතාවත් අබිබවාය. ස්ටෙෆන්ටත් මේ තමන්ගේ පුත්‍රයාගේ පෙම්වතිය කියා ඇතිවූ සිතුවිල්ල යට වී දැඩි රාගයකින් මුළු සිරුරම වෙළී ගියේය.

ස්ටෙෆන් හා ඇනාගේ කථාන්තරය ආරම්භ වූයේ ඇනා විසින් ස්ටෙෆන් තම කාර්යාලයේ සිටියදී ඔහුට දුරකථනයෙන් අමතා ඇය නැවතී සිටින පුද්ගලීක නිවසට පැමිණෙන ලෙස කරන ආරාධනාවකිනි. ඇය ඔහුට එසේ ආරාධනා කරන්නේ ඔහු සමඟ ලිංගීක ක්‍රියාවලියකට සම්බන්ධ වීමටය.

ගින්දර ඇවිළුණි. එය ලැව් ගින්නක්සේ පැතිර යනු ඇතැයි ඔවුන් සිතුවේ නැත. ඔවුන් දෙදෙනා සිතුවේ තමන්ගේ සිරුරුවලින් ඇවිළුණු රාගීක ලැව් ගින්න ගැන පමණී. මැදිවියේ ස්ටෙෆන් ඇනා බාර්ටන් නම් තරුණියට වහ වැටුණි. ඔහු වහ වහා ඇනාගේ පුද්ගලීක නිවසට ගියේ, ඇය වෙනුවෙන් ඇවිලී ගිය රාග ගින්න නිවා ගන්නටය. එහිදී මුල්වරට ඔවුන් දෙදෙනා ලිංගීකව එක්වූ පසුය, ඔවුන් දැන ගත්තේ ඒ ගින්න නිවන්න ලේසි, පහසු නොවන බව. එලෙසම එය එක දවසකින් හෝ සති කීපයකින්, නැතිනම් මාස කීපයකින් නිවා දැමිය හැකි ගින්නක් නොවන බව.

පසුදින මාර්ටින් විසින් තම නිවසේ ප්‍රභූ පැලැන්තියේ රාත්‍රි කෑමක් ඇනා බාර්ටන් වෙනුවෙන් සංවිධානය කළේය. එයට, මාර්ටින් ගේ පියා ස්ටෙෆන් හා මව ඉන්ග්‍රීඩ් ඔවුන් සමඟ එකතු විය. ඉන්ග්‍රීඩ්ට ඇනා ගැන කිසියම් සැකයක සේයාවක් ඇති විය. ඒ තම සැමියා පිළිබඳව නම් නොවේ. ඇය ඒ ගැන හාංකාසියක්වත් දැන සිටියේ නැත. ඉන්ග්‍රීඩ්ට සැක සිතුණේ ඇනාගේ ළමා කාලය ගැනය.

තම සැමියා වූ ස්ටෙෆන් එංගලන්තයේ පිළිගත් දොස්තර කෙනෙක් විය. එලෙසම දැන් ඔහු බ්‍රිතාන්‍ය රජයේ කැබිනට් ඇමතිවරයෙකි. ඇනාගේ පියා බ්‍රිතාන්‍යයේ තානාපතිවරයෙක් පමණි. මැය කොතෙක් දුරට තම පවුල් අභිමානයට ගැළපේද යන්නය ඉන්ග්‍රීඩ් සොයා බැලුවේ. ඇනා තම ළමා කාලය ගැන කීවේ ඇයගේ සොහොයුරු වයස 16 වන විට, ආදර සම්බන්ධයක් අහිමි වූ නිසා සිය දිවි හානි කර ගත් බවකි.

එම ප්‍රභු රාත්‍රි කෑම නිම වූ පසු එම රාත්‍රියේ ම මාර්ටින්, ඇනාව හැරලවීම පිණිස ඔහුගේ රථයෙන් පිටත් විය. ස්ටෙෆන් එම රථයට පිටු පා ඔවුන් පසු පස යන්නට විය. මාර්ටින් ඇයව ඇයගේ නිවසට හැරලවා, නැවත යන්නට වූ අතර ස්ටෙෆන් ඇයගේ නිවසට ඇතුල්වී ඇය සමඟ ලිංගිකව හැසිරුණි. එතනදී ඇය තම සහෝදරයාට වූ ඇත්ත සිදුවීම ස්ටෙෆන් ට කීය. ඇයගේ සහෝදරයාගේ ලිංගික තාඩන පීඩනවලට බොහෝ කාලයක් ඇය ලක් වී සිටි අතර, ඇයගේ සහෝදරයාට උවමනා කම තිබුණේ ඇයව ඔහු ළඟම මුළු ජීවිත කාලය තුළම තබා ගැන්මටය. එයට දැඩි ලෙස විරුද්ධ වූ ඇය, ඇය විසින්ම මෙම කාර්ය නිම කළාය. ඇය අන් අයට එය හඳුන්වන්නේ එය සිය දිවි නසා ගැන්මක් ලෙසටය.

සිනමාකරුවාට මෙම ප්‍රශ්නය යළි දිගින් දිගට ඇවිස්සීමට උවමනා කමක් තිබුණේ නැත. එහෙයින් එය එතැනින්ම යටපත් විය. ඇය එවන් කථාවක් කීවද ස්ටෙෆන් කීවේ තම නිවසේදී ඔවුන් සියල්ල එක්ව රාත්‍රී ආහාර ගන්නා අවස්ථාවේ ඔහුට ඇයව අතගෑමට දැඩි ආශාවක් ආ බවකි. එයින් වැටහුණේ ඇනා, ගේ සොහොයුරා සිය දිවි හානිකර ගත්තත්, ඇනා විසින් ඔහුව මරා දැමුවත්, ස්ටෙෆන්ට එය එතරම් ඇල්මක් දක්වන කථාවක් නොවන බවකි. ඔහුගේ මුඛ්‍ය පරමාර්ථය ඇනා සමඟ ලිංගීකව හැසිරීම පමණි.

පසුව ස්ටෙෆන් ට මෙය පිස්සුවක් විය. ඔහු මාර්ටින් හා ඇනා යන එන බොහෝතැන්වලට ඔවුන්ට නොදන්වා පිටු පසින් යන්නට විය. සති අන්තවල මාර්ටින් හා ඇනා ගත කරන හෝටල් වලට යන ස්ටෙෆන් මාර්ටින්ට නින්ද යන තෙක් සිට, ඇනාව පිටතට ගෙන කාමරයේ දොර ළඟ, ලිංගිකව හැසිරීමට තරම් පිස්සුවක් ස්ටෙෆන්ට ඇති විය. දැන් ඔහුට ඇනාව සදාකල්ම තබා ගැන්මට උවමනා වූ අතර, එම හේතුව මත තම බිරිඳ, දියණිය හා පුත්‍රයා පමණක් නොව තම ඇමතිකම, තම දේශපාලන ජීවිතය වුවද අත්හැර දැමීමට හෝ ලෑස්ති වී සිටියේය.

මේ අතර මාර්ටින් තම මව, පියා, හා නැගණිය සැලී ඉදිරිපිට ඇනා තමා කළ විවාහ යෝජනාව පිළිගත් බවක් කීය. මෙයින් ස්ටෙෆන් කලබලයට පත් වන්නට විය. එදින රාත්‍රියේ ඇනා සිටියේ ස්ටෙෆන්ගේ නිවසේය. මාර්ටින් ඇයට වෙනම කාමරයක් ලෑස්ති කර දුනි. එදින රාත්‍රියේ ස්ටෙෆන් ඇනාගේ කාමරයට රිංගන විට ඔහුගේ දියණිය සැලීට අසුවුණි. සැලී ඔහුගෙන් ඇසූ විට ඔහු කීවේ ඇනාගෙන් තම පුත්‍රයාගේ විවාහය ගැන ගැඹුරින් කථා කළ යුතු නිසාත්, මෙම විවාහයට මාර්ටින්ගේ හා සැලීගේ මව, තම බිරිඳ ඉන්ග්‍රීඩ් අසතුට නිසා ඇයගේ සිත දිනා ගන්නා අන්දම කියා දෙන්නට ඔහු ඇනාගේ කාමරයට ගිය බවය. සැලි එය එවේලේ විශ්වාස කළාය.

මේ අතර ⁣ස්ටෙෆන් ෆෙලෙමින්ග් ඇතුළු මුළු පවුලම ඇනා ගේ නිවසට රාත්‍රි කෑමකට සහභාගි විය. එහිදී ඇනාගේ මව වූ එලිසබෙත් කීවේ මාර්ටින්ගේ ගති පැවතුම් අනුව ඇනා වගේ කෙනෙක් ඔහුට නොගැළපෙන බවය. නමුත් ඔවුන්ගේ කැමැත්ත විවාහ වන්නට නම්, ඔවුන්ට විවාහ වන්නටද අවසර දුනි. එහෙත් මාර්ටින්ගේ මව වූ ඉන්ග්‍රීඩ් නම් සිටියේ මේ විවාහයට අසතුටෙනි. ඇයට කොහොමත් ඇනාගේ ගති පැවතුම් ඇල්ලුවේ නැත.

ඒ අතරේදී ඇනා සහ මාර්ටින්ගේ පියා වූ ස්ටෙෆන් ගේ සංඥාත්මක හැඟීම් හුවමාරු ගැන එලිසබෙත් නිරික්ෂණය කර තිබුණි. මොවුන් දෙදෙනා අතර කිසියම් රහස් සම්බන්ධයක් ඇති බවක් ඇය සැකයකින් තොරවම අනුමාන කළාය. ඇය කිසිවෙක් නැති අතරේ ස්ටෙෆන් ට මේ බව කියා මෙම සම්බන්ධය වහා නතර කරන ලෙස තදින්ම අවවාද කළාය.

කෙසේ වෙතත් මෙම ඇසුර දිගින් දිගටම යන අතරේ ස්ටෙෆන් මෙය නතර කරන්නටද සිතුවේය. එලෙසම ඔහුට තම බිරිඳ ඉන්ග්‍රීඩ් හා පුතු මාර්ටින් ට පාපොච්චාරණය කරන්නට ද සිතුණි. එසේ කීප වරක් සිතුවද, ඔහු එලෙස කළේ නම් නැත.

දිනක් ඇනා විසින් තමන් කුලියට ගත් අලුත් නිවාසයක යතුර හා එම තට්ටු නිවාස සංකීර්ණයේ ලිපිනිය ස්ටෙෆන් ගේ කාර්යාලයට යැවීය. ස්ටෙෆන් වහා එම තට්ටු නිවාස සංකීර්ණයට ගොස් එහී උඩුමහලේ තිබූ ඇනාගේ අලුත් නිවස සොයා ගති. ඇනා ස්ටෙෆන් එන තෙක් තම නිවසට වී බලා සිටියාය. ඔවුන් දෙදෙනා එකිනෙකා දුටු සැනින් දෙදෙනාම වහා නිරුවත් වී දිගු ලිංගික ක්‍රියාවලියක යෙදුනී. මේ අතර මාර්ටින්ද ඇනාව සොයා නිවාස සංකීර්ණයට පැමිණියේය. ඔහු කෙළින්ම ඇනාගේ නිවසට පැමිණ දොර හැරියේය. තම පියා වු ස්ටෙෆන්, තමා විවාහ වන්නට සිටින පෙම්වතිය වූ ඇනා සමඟ සම්පූර්ණයෙන්ම නිරුවත් ව ලිංගිකව හැසිරෙනවා මාර්ටින් තම දෑස් දෙකෙන්ම දුටුවේය. ඔහුට මෙය කිසිසේත් අදහා ගැන්මට නොහැකි විය. කළ යුත්තේ කුමක්දැයි ඔහුට නිනව්වක් නැති විය. ඔහුව ඉබේම පස්සෙන් පස්සට යන්නට විය. නොදැනීම නිවාස සංකීර්ණයේ උඩුමහලේ තිබූ ගරාදි වැටේ හැපී, එයත් කඩාගෙන ගොස් ඔහුව උඩු මහලේ සිට බිමට වැටුණි. එම වැටීම කෙතරම් වේගයෙන් සිදු වූවාදැයි කිව හොත්, මාර්ටින්ව බිම වැටුණු සැණින්ම ඔහු මිය ගියේය. ස්ටෙෆන් කෙතරම් කලබල වූවාදැයි ඔහු නිරුවතින්ම උඩු මහලේ සිට පහතම මාලයට දිව ආවේ තම පුතුට සිදුවූ දෙය බැලීමටය. තමා තට්ටු ගණනාවක් පහළට බැස්සේ නිරුවතින් බවත්, දැන් පුතුගේ මළ සිරුර ළඟ සිටින්නේ නිරුවතින් බවත් මේ මැදිවියේ මහලු මිනිසාට නොවැටහුණි. ඔහු තම පුතුගේ නිසල සිරුර තම අතට ගෙන හැඬුවේ නිරුවතින්මය. තට්ටු නිවාස සංකීර්ණයේ සිටි හැම නිවැසියෙක්ම එළියට විත් මෙම සිදුවීම බලා සිටි අතර, මේ නිසල සිරුර මත නිරුවතින් හඬන මහලු මිනිසා බ්‍රිතාන්‍ය රජයේ කැබිනට් ඇමති දොස්තර ස්ටෙෆන් ෆෙලෙමින්ග් බව එතැන සිටි බොහෝ දෙනා හදුනා ගතී. එලෙසම ඔහු මෙම නිවාස සංකිර්ණයට පැමිණී හේතුව කුමකටදැයි ඒ වන විට එතැන සිටි බොහෝ දෙනා දැන ගතී. මේ කලබෑගනිය අතරින් ඇනා බාර්ටන් කිසිවෙකුට නොපෙනී එතැනින් පැන ගතී.

මෙම සිදුවීම මුළු බ්‍රිතාන්‍ය පුරාම පැතිරිණි. එම සතියේ ප්‍රධාන පුවත්පත් සියල්ලේම ප්‍රධාන හෙඩිම වූයේ මෙම සිදුවීමය. ස්ටෙෆන් තම ඇමති ධූරයෙන් පමණක් නොව රාජ්‍ය සේවයෙන්ද ඉවත් විය. ඔහුට ඔහුගේම නිවස තහනම් කලාපයක් විය. ඔහුගේ බිරිඳ ඔහුගෙන් ඉල්ලුවේ ඔහුගේ නොමනා හැසිරීම නිසා අහිමි වී ගිය තමන්ගේ පුත්‍රයාව නැවත ගෙන දෙන ලෙසටය. එලෙසම ඇය ඔහුගෙන් ඇසුවේ ඔහු ඇයට එක වරක් හෝ ආදරය කර තිබෙනවාද කියාය. ඇය ඔහුට කීවේ ඔහු ඇයට කිසිම දිනයක හමු නොවී ඇති ලෙසට ඇය මින් පසු සිතන බවකි. ස්ටෙෆන් ඇනාගේ මව වූ එළිසබෙත්ව හමුවීමට ගියේ ඇනා ගැන තොරතුරක් දැන ගැන්මටය. එහිදී ඔහු දුටුවේ ඇනා තම මව සමඟ සිටින බවකි. ඔවුන් දෙදෙනාම එළිසබෙත් ඉදිරියේදී නිශ්ශබ්දව සිටියහ.

ස්ටෙෆන් තම බිරිඳත්, දියණියත්, තම අතී සුඛෝපභෝගි නිවසත් තම ප්‍රභූ ජීවන පැලැන්තියත් අත හැර දකුණු යුරෝපයේ නගරයක කුඩා නිවසක් කුලියට ගෙන අතිශය සාමාන්‍ය ජීවිතයක් ගත කරන්නට විය. අසම්මත ඇසුරක් නිසාත්, දැඩිව රාගයට නතු වීම නිසාත් ඔහුට ඔහුගේ එකම පුතු නැතිවිය. එලෙසම ඔහුගේ බිරිඳ, දියණිය වෙන්විය. සියලු යස ඉසුරු, තාන්න මාන්න නැති විය. යාන, වාහන, ආරක්ෂක භටයන්, ඒ සියල්ලම නැති වී අතීශය සාමාන්‍ය මිනිසෙකුගේ තත්ත්වයකට ඔහුව පත්විය.

ගුණපාල විසින් තම බිරිඳ වූ සෝමාව තම පියා වෙළදම් මාමාට භාර දුන් පසු සෝමා ගැබ්ගත්තාය. එම දරුවා වෙළදම් මාමාගේ බව තහවරු වූයේ ඇයගේ ප්‍රසුත්තියට වෙළදම් මාමා ඇය ළඟින් නොසෙල්වී ඇයට ආවතේව කරන අන්දම දුටු විටය. කෙසේ හෝ සෝමා දරුප්‍රසුත්තියේදී මිය ගියාය. වෙළඳාම් මාමා තමා සිටි නිවසත්, ගමත් අතහැරදා වෙනත් ගමකට ගොස් ජීවිතයේ ඉතුරු කාලය තනිවම ජීවත් විය.

ස්ටෙෆන් ඉන්පසු ඇනාව දුටුවේ එකම එක වරක් පමණි. ඒ ඇය ගුවන් තොටුපොළ පසු කර යන විටය. ඒ වන විට ඇයට කුඩා දරුවකු සිටීය. ඒ කුඩා දරුවා ඇයට, ඇයගේ මුල් පෙම්වතා වූ පීටර් නිසා ලැබුණු දරුවකු බව ස්ටෙෆන් සොයා ගතී.

'ඇනා බාර්ටන් යනුද, අන් කිසිවකට වඩා වෙනස් නොවූ, සාමාන්‍ය ගැහැනියක්' බව ඔහුට ප්‍රත්‍යක්ෂ වූයේ එවිටය.

ජෙරමි අයන්ස් නම් බ්‍රිතාන්‍ය නළුවා මෙහී ස්ටෙෆන් ෆෙලෙමින්ග් ගේ චරිතයට අතිශය සාර්ථක ලෙස පණ පෙවීය. ඔහු 1991 වසරේ 'රිවර්සල් ඔෆ් ෆෝචූන්' නම් චිත්‍රපටයේ 'ක්ලවුස් වොන් බූලෝ' නම් චරිතය රඟපා හොඳම නළුවා ලෙස ඇමරිකානු ඇකඩමි සම්මානයට පාත්‍ර විය.

ජුලියට් බයිනොචි නම් වූ ප්‍රංශ නිළිය ඇනා බාර්ටන් ගේ චරිතයට පණ පෙවු අතර, බ්‍රිතාන්‍ය නිළියක් වූ මිරැන්ඩා රිචඩ්සන්, ස්ටෙෆන්ගේ බිරිඳ වූ ඉන්ග්‍රීඩ් තොම්ප්සන් ෆ්ලෙමින්ග් ගේ චරිතය ජීවමාන කළාය. එම චරිතය වෙනුවෙන් ඇය හොඳම සහය නිළිය ලෙස ඇමරිකානු ඇකඩමි ඔස්කාර් සම්මානයට නිර්දේශ විය. රුපර්ට් ග්‍රේව්ස්ද බ්‍රිතාන්‍ය නළුවෙකි. ස්ටෙෆන්ගේ පුත් මාර්ටින් ගෙ චරිතය රඟපෑවේ ඔහුය.

'ඩැමේජ්' හී චරිතද එක් අතකට 'කරුමක්කාර' චරිතයන්ය. රාගය පසුපස හඹා ගොස් විනාශ කර ගත් ජීවිතයන්ය. මේ ජීවිත වල යථාර්ථයන් හරිහැටි තේරුම් ගැනීමට නම් 'ඩැමේජ්' වැනි චිත්‍රපට නැරඹිය යුතුමය.

[email protected]