දෘශ්‍යමාන සහ අදෘශ්‍යමාන ප්‍රේමයේ කතාව

මිදුණු විශ්වය

ජුනි 15, 2023

වේදිකාව, පුංචි තිරය හා රිදී තිරය එකසේ ජයගත් සොඳුරු මාධ්‍යවේදියාගේ නවතම සිනමා සිත්තමයි ‘මිදුණු විශ්වය.’ අධ්‍යක්‍ෂවරයා මෙයට ප්‍රථම, ‘අග්නි දාහය’ (2002), ‘ගරිල්ලා මාකටිං’’ (2005), ‘සමනල සංධ්වනිය’ (2013), ‘මහරජ ගැමුණු’ (2015), ‘ඝරසරප’ (2018) සිනමාව තුළින්ද, ‘වෙද හාමිනේ’ (1990), ‘වෙස් මුහුණු’ (1992), ‘දඬුබස්නාමානය’ (1995), ‘අකාල සන්ධ්‍යා’ (1997), ‘රැජින’ (2000), ‘සතර දෙනෙක් සෙන්පතියෝ’ (2009) ‘නන්නන්තාර’ (2022) යන නිර්මාණ පුංචි තිරය ඔස්සේ ද ප්‍රේක්ෂකයා සමීපයට ගෙන ආ ඔහු, ‘සරස්වතී’, ‘අත්’, ‘මෝරා’, ‘ඔත්තුකාරයා’, ‘VOYAGE TO THE HEART LAND’ සහ ‘STREET OPERA’ යන වේදිකා නාට්‍ය නිර්මාණ ද කලා ලොවට දයාද කර ඇත. එසේම තිර පිටපත් රචකයකු සහ ග්‍රන්ථ කතුවරයකුද වන ඔහු, මහරජ ගැමුණු නවකතාව මෙන්ම, දඬුබස්නාමානය, වෙද හාමිනේ, අකාල සන්ධ්‍යා, වෙස් මුහුණු යන නිර්මාණයන්හි තිර රචනා කෘති ද එළි දක්වා ඇත.

සන්ධ්‍යාවට හිමිදිරිය හඹායා නොහැකිය. එහෙත් ආලය කළ හැකිය. රූපණය තීව්‍රතර මානසික විද්‍යාවක් වශයෙන් උගන්වන බටහිර ගුරු කුලයකට අයත් දීප්තිමත් ශ්‍රී ලාංකික රංගාචාර්යවරයකු වන වරේණ්‍යයට තම දීර්ඝකාලීන අධ්‍යාපන ජිවිතය තුළ විවිධ මානසික කලාපයනට අයත් ශිෂ්‍ය ශිෂ්‍යාවන් අපමණව හමුවී ඇත. සූමධ්‍යා ඒ අතරින් ඔහුට විශේෂ වන්නේ යම් ගැඹුරු මානසික අභ්‍යාසයකදී, සමහරෙකුට සිදුවිය හැකි ස්වාපන ආරූඪයකට යනවාට වඩා වෙනස් මානසික තලයකට ඇය ගමන් කරන නිසාය. මේ මානසික තලයේදී ඉතාම අසාමාන්‍ය කාල විපරිවර්තනයක ගොදුරක් වන ඇය සේම, එහි ගොදුරක් වු බීම දශක පහකට පෙර (1960 දශකය) විසු රාජිනි නම් සුප්‍රකට සිනමා තාරකාවගේ සංවේදන ප්‍රවාහිකාව බවට පත්වන්නීය. මේ අනුව 1964 දී තරමේ රාජිනි වර්තමානයේ වරේණ්‍යගෙන්, සුමධ්‍යා මාධ්‍යයක් කොට ගනිමින් රූපණ විද්‍යාව හදාරන්නීය.

සාර්ථක සිනමා ජීවිතයක් තුළ සිටිමින් වුව, අසාර්ථක විවාහ ජිවිතයක් ගත කරන රාජිනි, වර්ණ්‍යගෙන් තම උගැන්මට අමතරව ප්‍රේමයද ප්‍රාර්ථනා කරන්නීය. මෙම කාල දෙකක, යුග දෙකක ස්ත්‍රී පුරුෂ ප්‍රේමයට මහත්ම බාධාව වන්නේ, නොදැන වුව ඔවුනට ඒ සඳහා උපකාරවු සේම, ඒ සඳහා ඔවුන් විසින් මාධ්‍ය වශයෙන් ද භාවිතා කළ අප්‍රකාශිතව වුව, වරේණ්‍යට ප්‍රේමකළ සුමධ්‍යාට මෙම තතු හෙළිවීමයි. මෙපරිද්දෙන් ගලා යන යුග දෙකක සොඳුරු ආදර කතාවේ අවසානය කෙබදුවේදැයි මිදුණු විශ්වය තිරගත වු දිනෙක ප්‍රේක්ෂක ඔබට පසක් කර ගැනීමට හැකිවනු ඇත.

මිදුණු විශ්වය රංගන දායකත්වය

උද්දික ප්‍රේමරත්න, උදාරි වර්ණකුලසූරිය, බුද්ධික ජයරත්න, චූලක්ෂි රණතුංග, ශ්‍රියන්ත මෙන්ඩිස්, කුසුම් රේණු, දමිතා අබේරත්න, වසන්ත විට්ටච්චි, උදිත ගුණරත්න, ගාමිණි ජයලත්, දිමුතු චින්තක, ඥානාංග ගුණවර්ධන, ලක්‍ෂ්මී දමයන්ති, ජයතිස්ස අතුලසිරි, නිල්වලා විශ්වමාලි, ජයනාත් බෝදාහන්දි, හේමන්ත රන්දුණු, සුදත් ඇන්තනි, සඳුන් බණ්ඩාර, ලක්‍ෂ්මන් රාජපක්‍ෂ, ශ්‍රියාණි දිසානායක, මහින්ද තෙන්නකෝන් ඇතුළු රංගන ශීල්පීන් විශාල පිරිසක් මේ සඳහා එක්වී ඇත.