නොපෙන්වන ආදරයේ සුසුම් කන්ද

ජුනි 22, 2023

විවාහක එක්දරු පියකු වන රත්නපාල, ගමේ කුලී වැඩ කරමින් අවිහිංසක ලෙස ජීවත්වන දුප්පත් පුද්ගලයෙකි. ඔවුනට රුවන් නමින් පාසැල් වියේ පසුවන පිරිමි දරුවෙකු සිටි. අපමණ අග හිඟකම් මැද වුවද තම පවුල වෙනුවෙන් සිය යුතුකම් නිසි ලෙස ඉටු කිරීමට ඔහු වග බලා ගනී. දසවැනි වියේ පසුවන රුවන් තරමක් දඟවැඩට බර දරුවෙකි. ඒ දඟවැඩ නිසාම, තාත්තගේ උදහසට ලක්ව පහර කෑමට සිදුවන අවස්ථා එමටය. දරුවාව යහමඟට ගැනීමට ඔහුට පහර දුන්න ද, රත්නපාලට එය මහා දුකකි. නිමාවක් නැති දඟවැඩ හමුවේ. නිතර නිතර පහරකෑමට ලක්වන රුවන් සිය තාත්තාව නුරුස්සන ස්වභාවයකට පත්වේ.

සිය පියා ගැන වෛරයෙන් පසුවන රුවන්, දිනක් සිය පියාව චාටුවෙන් පාළු නිවසකට රැගෙන ගොස්, එහි සිරකර තබයි. සිය සැමියා නොමැති සොවින් වැලපෙන මව පිළිබඳව රුවන් කම්පාවට පත් වේ. කෙමෙන් සිය පියාගේ අගය හා ආදරය ඔහුට දැනෙන්නට පටන් ගනී. සිතින් දහස්වර විඳවන රුවන් සිය පියාව නිදහස් කර ගැනීමට උත්සාහ කළද අවස්ථා කිහිපයකදීම ඔහුට එය කළ නොහැකි වේ. අවසානය රත්නපාලට සිදුවන්නේ කුමක් ද යනු “තාත්තා” සිනමා පටය තිරගත වූ පසුව දැන ගැනීමට හැකිවනු ඇත. පිය සෙනෙහසක ගැඹුර සහ අරුමය සමාජගත කිරීමට අධ්‍යක්ෂවරයා උත්සාහ දරා ඇත.

“ඉස්කෝලෙට මං ආවා” (2019) චිත්‍රපටය අධ්‍යක්ෂණය කර තිරගත කරමින් සිනමා ක්ෂේත්‍රයට පිවිසි ප්‍රසාද් සමරතුංග ගේ දෙවන සිනමා නිර්මාණයයි “තාත්තා”. සිනමා මාධ්‍යවේදියකු ලෙස කලා ක්ෂේත්‍රයට පිවිස සිනමාව හැදෑරූ ඔහු, ගීත රචකයකු, ගායන ශිල්පියකු සේම තිර පිටපත් රචකයකු ද වේ. තාත්තා නුදුරේම තිරගත කිරීමට ඔහු සූදානමින් සිටී.

තාත්තා රංගන දායකත්වය

කුමාර තිරිමාදුර , නිල්මිණි තෙන්නකෝන්, තිසෙව් සත්සිළු විජේනායක, ඔනෙලි හිමංසි, කුෂේයා අනගි, සඳෙව් වලිමුණි, උපුල් වීරසිංහ, රුෂාන්ත විජේනායක, සිනෙති අකිලා, කුමාර වඳුරැස්ස, රොහාන් පෝල්, සැනෙට් දික්කුඹුර, උපුල් නිශාන්ත, සුමිත් ගල්හේන, සනත් රත්නායක, සමන් කුමාර ගමගේ, විජිත් හේවාවිතාරණ , උපේන්ද්‍රිකා රත්නායක, ලලිත් නවරත්න, නිශ්ශංක විජේරත්න, චමිලා ප්‍රියංගනී, විහඟ කවිශාන්, ඩිලූශ ටේෂාන්, දෙනුකි හසින්තිකා, තෙනුමි විහංසා, බිමංසා සඳෙව්මි, කවිඳු නෙත්මාල්, දසුන් නිර්වාන්, ජනෝදි හංසනා, තාරක දිල්හාන් ජයසිංහ.