හින්දි බසින් ගී ලියන ගායිකාව

දේශානි විතානගේ
මැයි 13, 2021

 

ඇය කොළඹ විශාකාවේ ආදී සිසුවියකි. ශ්‍රී ජයවර්ධනපුර විශ්වවිද්‍යාලයෙන් පරිපාලනය පිළිබඳ විශේෂවේදී උපාධිය ලබාගන්නා ඇය මේ වන විට රාජයේ විගණනවරියකි. සිය කාර්යබහුලත්වය කොතරම් වුවත් තමා කුඩා කල සිට පුරුදු පුහුණු වූ සංගීතයට නම් ජීවීතයේ ඉතා වැඩි ඉඩක් ලබා දී ඇති බව වැටහෙන්නේ ඇය ගායනා කළ ගීත ගොන්න දෙස බැලීමෙනි. මේ වන විට ගීත තිහකට ආසන්න සංඛ්‍යාවක් තමන්ගේ කරගත් ඇයට ගායන හැකියාව වගේම පද රචනයද මනාව කළ හැකි බව සනාථ කර හමාරය. විශේෂත්වය නම් එම පද රචනා හින්දි භාෂාව භාවිතයෙන් නිර්මාණය කිරීමයි. සිංහල මෙන්ම හින්දි භාෂාවද ඇයට මනාව හැසිරවිය හැකිය. මේ සියලු දස්කම් සපිරි ඇය දේශානී විතානගේ.

 

 

දේශානී කොහොමද සංගීතයට යොමු වෙන්නේ.

මගෙ අම්මයි තාත්තායි දෙන්නම කලාවට හිතැති අය. මං පොඩි කාලෙම ඒ අය මගෙ ගායන හැකියාව හඳුනාගෙන විශාරද නන්දා මාලිනි මහත්මිය වෙත මා යොමු කරනවා. ඇයගෙන් ගායනය ඉගෙන ගන්නේ මා අවුරුදු තුනක තරම් වූ කාලයේ සිට. එදා සිට අද දක්වා සංගීතය ඉගෙන ගන්නවා. මා විශාරදවරියක්. ඒ වගේම ගුවන් විදුලි සංස්ථාවේ ඒ ශ්‍රේණියේ සරල ගී ගායන ශිල්පිනියක්.

 

ඔබ හින්දි භාෂාව මෙලෙස හසුරවන්නේ කොහොමද?

මම ඉන්දියානු සංස්කෘතිය මධ්‍යස්ථානයේ හින්දි භාෂාව ඉගෙන ගත්තා. ඒ වගේම මා රාජ්‍ය භාෂා දෙපාර්තුමේන්තුවේ හින්දි භාෂා පරිවර්තිකාවක්. අද වන විට හින්දි භාෂාවෙන් ගී පද රචනය කරනවා. මම මුල්ම ගීතය ලිව්වේ ප්‍රභාව් චන්ද්‍රන් නම් ඉන්දියානු ගායකයෙකුට. එය යේ දෝරියා නමින් නම් කළා. ඉන් පසුව රවීන්ද්‍ර ත්ත්සරට බාහු මේ තෙරි ගීතය රචනා කළා.

 

ඔබ ගීත 30ක් නිර්මාණය කරලා තියෙනවා?

ඔව්. ඒවා ස්වාභාවිත ගීත. ක්ෂේත්‍රයේ ප්‍රවීණයන් සමඟයි මා මේ ගීත නිර්මාණය කරන්නෙ. ගායනය පදරචනය වගේම සංගීතය යන කාරණා ත්‍රිත්වයේදීම ඔවුන් මට සහාය ලබා දුන්නා. ආචාර්ය වික්‍ටර් රත්නායක, කීර්ති පැස්කුවෙල්, රජීව් සෙබස්තියන්, මිත්‍ර කපුගේ, විශාරද එඩ්වඩ් ජයකොඩි වගේ ප්‍රවීණ ගායන ශිල්පීන් සමඟ යුග ගී ගායනා කරලා තියෙනවා. පදරචනාවලින් මෙල්රෝයි ධර්මරත්න, සමන් චන්ද්‍රනාත් වීරසිංහ, ආචාර්ය අජන්තා රණසිංහ, ලූෂන් බුලත්සිංහල, වගේ ප්‍රවීණයින්ගෙ සහාය ලැබිලා තියෙනවා. එච්. එම්. ජයවර්ධන, මෙල්රෝයි ධර්මරත්න, නීලා වික්‍රමසිංහ, රෝහණ වීරසිංහ වගේ ප්‍රවීණ සංගීතඥයින් මගේ ගීතවලට සංගීතය සපයලා තියෙනවා.

 

අපි ඒ ගීත කිහිපයක් මතක් කරමු?

විල්තෙර අද්දර, මගෙ සිත ඇතුළේ, කෝකිලයාණෙනි, හද විමන්, මංගල දිනයක පෙරදා, වේදනා හද වේදනා, නුඹ ගැන සිතූ තරම් , ලෙන්ගතුම හිත වගේ ගීත මතක් කරන්න පුළුවන්. ඒ වගේම මට අවස්ථාව ලැබුණා අප අතර නැති සංගීතඥයින්ගේ ගී තනුවලට ගීත ගායනා කරන්න. සරත් දසනායක, ස්ටැන්ලි පිරීස්, සුනිල් දයානන්ද කෝණාර වගේ ශිල්පීන් නැති වුණාට පසුව.

 

කොහොමද මේ අවස්ථාව දේශානිට ලැබෙන්නේ?

ඒ අය මිය යන්න කලින් තනු නිර්මාණය කරා මා වෙනිවෙන්. ඒ කාලේ මම පොඩියි. ඒ නිර්මාණය කළ තනුවලට වර්තමානයේදී පද එකතු කරලා ගායනා කළා.

 

දේශානිත් ගීත කරන්නේ you tube  එකටද?

මුල් කාලයේදී මා ප්‍රධාන ධාරාවේ නාළිකාවලට ගීත ලබා දුන්නා. විශේෂයෙන්ම ගුවන් විදුලියට. අද වන විට සමාජ මාධ්‍ය හරහා අපිට තනිවම නිර්මාණ එළි දැක්විය හැකියි. මටත් තියෙනවා youtube. නාළිකාවක්. Deshani vithanage  නමින්. නමුත් අප ගායනා කරන ගීත යම් ප්‍රමාණයකට අපේ වැඩිහිටියන්ට අහන්න ලැබෙනවා අඩුයි.මොකද ඔවුන් තාක්ෂණය සමඟ ගනුදෙනු කරන්නේ ඉතාම අල්පව. අප ගායනා කරන ස්භාවිත ගීතයට වැඩි පුරම ඇළුම් කරන්නෙත් අපේ වැඩිහිටියන්.

 

ඔබේ රැකියාව සමඟ කොහොමද කලා කටයුතු කළමනාකරණය කරගන්නේ?

මූලිකවම ආසාව තියෙනවා නම් කරන්න බැරි දෙයක් නෑ. සීයට සීයක් හැමදේටම කැපවෙන්න නොහැකි වුණත් පුළුවන් තරම් කාලය කළමනාකරණය කරගෙන කරනවා. ගෙදරින් ලොකු සහයෝගයක් ලැබෙනවා. අම්මා තාත්තා මගෙ ස්වාමියා සහෝදරයා සහෝදරිය මේ අයගෙන් විශාල සහයෝගයක් ලැබෙනවා. එයම මට ලොකු අස්වැසිල්ලක් මගේ කටයුතු පහසු කර ගැනීමට.

 

මේ ආ ගමන්මඟේ ඔබට ස්තූතියි කියන්නත් බොහෝ දෙනා ඇති?

සංගීත කටයුතුවලදි මා සමඟ ගී ගැයූ, සංගීතය සැපයූ, ලස්සන පදමාලා නිර්මාණය කර දුන් සියලු දෙනාටම මා ස්තූතිවන්ත වෙනවා. මගෙ පාසලේ ගුරුතුමිය ප්‍රියදර්ශනී කීර්තිසිංහ, මගෙ සංගීත ගුරුවරු නන්දා මාලනී මහත්මිය, මංජුලා සෙනෙවිරත්න, සංජය හේමාල් හා මගෙ හින්දි භාෂා ගුරුවරු වගේම ක්ෂේත්‍රයේදී මට උදවු කළ සියලු දෙනාටම ස්තූතියි කියන්න කැමතියි.