කැනඩාවේ අපි තිරගත කරන්නේ ප්‍රමිතියක් ඇති සිංහල චිත්‍රපට පමණයි

රවී සේනාධිපති
සැප්තැම්බර් 1, 2022

 

සිනමාශාලා කුලියටගෙන චිත්‍රපට පෙන්වී‍ෙම්දී ලාභ ලබන්න අපහසුයි

 

මෑත කාලයේ අපේ කලා කෘති බොහොමයක් අන්තර්ජාතිකව ඇගයීමට ලක්වුණා. හොලිවුඩ් බොලිවුඩ් චිත්‍රපට ලෝකයේ අස්සක් මුල්ලක් නෑර කරනම් ගහද්දි ලාංකේය සිනමාව ඒ ගමන ආරම්භ කිරීමම සිංහල සිනමාවේ හොඳ ප්‍රවේශයක් බලාපොරොත්තු තබාගැනීමට හැකි නව මානයක් විවෘතවීමක් විදිහට දකින්න පුළුවන්. අපේ අය ලෝකෙට ගිහින් අපේ චිත්‍රපට පෙන්වීම කොතරම් අපූරුද. ඔහු රවි සේනාධිපති. අපේ චිත්‍රපට කැනඩාවේ පෙන්වන රවී සමඟ සරසවිය අපි කළ කතබහයි මේ

 

කලාවට මුල් අඩිතාලම වැටෙන්නේ?

ඉස්කෝලේ යන කාලේ රූපවාහිනියේ ගුරු ගෙදර වැඩසටහන හා ටී එන් එල් නාලිකාවේ විකාශය වුණ වැඩසටහන්වලට සහභාගී වුණා. එහිදී දීපාල් අපෝන්සු මහතා මාව හඳුනාගෙන ගෙදර ඇවිත් කිව්වා මල්ලිට රඟපාන්න පුළුවන් කියලා මට හිතෙනවා, අපි උත්සාහයක් අරන් බලමු කියලා. තාත්තාගෙන් මේ ගැන ඇහුවම ඔහුත් එයට කැමැති වුණා. නෑබඩ තිබුණ රූගත කිරීමකට අපි ගියා. මම හිටියේ ගමේ කොල්ලෙකුගේ චරිතයකට එය පොඩි චරිතයක්. ඒ වනවිටත් මම දැනගෙන හිටියේ නෑ කා එක්කද මම රඟපාන්නේ කියලා. මම මේකප් දාගෙන ඉද්දි පුද්ගලයෙක් ආවා. මට ඔහුව හොඳට දැකලා පුරුදුයි. ඔහු දයා අල්විස්. ඔහු මට කිව්වා පුතේ බයවෙන්න එපා. මමත් ඔයාලා වගේම සාමාන්‍ය මනුස්සයෙක් මෙන්න මේ ඩයලොග් ටික ඔයාට කියන්න තියෙන්නේ කියලා. මම ඇහුවා කා එක්කද මට කියන්න තියෙන්නේ කියලා. එයා ගැන දැන්ම ඔයාට කියන්න බෑ. අපි රිහසල් එකක් බලමු මේ ටික හොඳට බලාගන්න කියලා. මට තිබුණේ ඒ දෙබසේ ' පුංචි නෝනා පුංචි නෝනා හාමු මහත්තයා මරලා දාලා' කියලා කියන්න. මම රඟපාලා පෙන්නුවාම දයා අල්විස් මහත්මයා කිව්වා ආයේ බලන්න දෙයක් නෑ අපි ටේක් එකම ගමු කියලා. මට ඩයලොග් කියන්න තිබුණේ අනෝජා වීරසිංහ මහත්මිය සමඟ. මට හිතාගන්න බෑ ඒත් මම ඩයලොග් කිව්වා. ඒ දර්ශනවාරයෙන් පසුව අනෝජා අක්කා මගෙන් ඇහුවා උඹ කොහෙන්ද රඟපාන්න ඉගෙනගත්තේ කියලා. ඒ දවස්වල තරුණසේවා සභාවේ ඒ දවස්වල තිබුණා වැඩසටහනක් බන්දුල විතානගේ, ජයලාල් රෝහණ, වගේ ප්‍රවීණයෝ මෙහෙයවූයේ එය. පසුව මට අනෝජා අක්කා කිව්වා ඇය ලන්ඩනයට ගිහින් ඉගෙන ගන්නා කාලයේ ඇයගේ පුහුණු කරු වූ සූ වෙන්ස්ටන් ලංකාවට එනවා මට ඔයාව පුතේ එයාට දාන්න ඕන පුහුණු කරවන්න කියලා. ඒ විදිහට මම අනෝජා අක්කාගේ අභින පාසලේ සූ වින්ස්ටන් සමඟ රංගනය පුහුණු කළා. පසුව මම සහය අධ්‍යක්ෂවරයෙක් විදිහට දීපාල් අපෝන්සු අයියා එක්ක ටෙලිනාට්‍ය සහ වැඩසටහන් ගණනාවක වැඩ කළා. මේ සියල්ල කළත් මගේ රැකියාව බැංකුවේ කළේ. නමුත් මට මාධ්‍ය වැඩ කරන්න ඔවුන් රිලීස් කරලා තිබුණා. පසුව මම රට එනවා. මෙහෙ ඇවිල්ලත් යම් යම් ඉදිරිපත් කිරීම් කරමින් සම්මාන ගන්න මට හැකි වුණා.

කලාව සමඟ ගමන ආරම්භ කළාට වෘත්තීය විදිහට තෝරගෙන තිබෙන්නේ බැංකු රස්සාව?

උසස් පෙළ සිටම විශ්වවිද්‍යාල අධ්‍යාපනය දක්වා කළේ වාණිජ අංශයෙන්. මගේ ආසාව තිබුණා බැංකුවක සේවය කරන්න. ඒ වගේම කලාවටත් මම ආසයි. මගේ අම්මා තාත්තාගේ වැඩි කැමැත්තක් තිබුණේ නෑ මම කලාවෙන් ඉස්සරහට යනවට. ඔවුන් මට කිව්වේ රැකියාව කරන ගමන් කලාව කරන්න කියලා. මුලින්ම මම බැංකුවට සම්බන්ධ වෙන්නේ මෘදුකාංග ඉන්ජිනේරුවෙක් විදිහට. අපි හදවතින් ආස කරන දේ තිබෙනවානේ ඒ කලාව.

 

කැනඩාවට යන්නේ චිත්‍රපට පෙන්වන්න නොවෙයිනේ. කැනඩා ගමන ගැන කතා කරමු?

කැනඩාවට ස්ථීර පදිංචිය ලැබෙන්නේ 2012 වසරේ. ඒ වනවිට මම වැඩකරමින් සිටියේ පෞද්ගලික බැංකුවක. 2013 වසරේ මගේ නැඟණියගේ විවාහයෙන් පසුව අපි 2014 වසරේ ජනවාරී මාසයේදී ස්ථිර පදිංචිය සඳහා කැනඩාවට යනවා. මගේ බිරිඳ වෘත්තීයෙන් දන්ත ශෛල්‍ය වෛද්‍යවරියක්. මට රැකියාව ලැබෙන්නේ කැල්ගරිවල. 2017 වසරෙදි මට ආරාධනයක් ලැබෙනවා ශ්‍රී ලංකා සහ කැනඩා ඇසෝසියේෂන් එකෙන් සමාජ ක්‍රියාකාරි අධ්‍යක්ෂක කියන තනතුර අරගෙන වැඩ කරන්න කියලා. මම ඒ තනතුර භාරගෙන මුලින්ම වර්ණ රාත්‍රිය කියන වැඩසටහන නිර්මාණය කළා. එය මම කරන්නේ මෙහෙ ළමයින්ගේ දක්ෂතා හඳුනාගන්න. පසුව මම ප්‍රසංගයක් කරනවා සමන්ත පෙරේරා, උරේෂා රවිහාරි, ඉන්ද්‍රානි පෙරේරා, නිරෝෂා විරාජිනි, දීපිකා ප්‍රියදර්ශනී කියන අය එක්ක. එය ඉතා විශිෂ්ට අන්දමින් කරන්න මට හැකියාව ලැබෙනවා. පසුව 70වන නිදහස් දිනය ඉතාම සාර්ථක ලෙස සංවිධානය කරනවා එයත් මගේ අධීක්ෂණය යටතේ සිදු කළා. එයට බොහෝ දෙනාගේ සහය ලැබුණා. ඔය කාලෙදි මට 'ඝරසරප' චිත්‍රපටය කැනඩාවේ පෙන්වන්නට කියා ඉල්ලීමක් කරනවා. ඒ වනවිට ඒ සම්බන්ධ කිසිදු අත්දැකීමක් මට තිබුණේ නැහැ. ඝරසරප චිත්‍රපටය මෙහෙ පෙන්වුවත් එය අසාර්ථකවනවා. එය ඒ වනවිටත් යූටියුබයට මුදාහැරලා තිබුණා. ඒ වෙලාවේ මට ලැබෙන සහය සමඟ මට බලපෑමක් ආවේ නැතත් මට ලොකු පාඩුවක් වුණා.

 

කැනඩාවේ චිත්‍රපට පෙන්වන්න ඕන කියලා හිතුණේ?

ඒක ටිකක් දීර්ඝ කතාවක්. මම වාහනේ පදවගෙන යනවිට මම දකිනවා හින්දි චිත්‍රපට ප්‍රචාරණ පෝස්ටර් එහෙම තියෙනවා. මං කල්පනා කළා අපේ ලංකාවේ චිත්‍රපටයක් මෙහෙම දකින්න පුළුවන්නම් කියලා. ඒක තමයි මුලින්ම හදවතට ආවේ. මේ සම්බන්ධව හොයා බලන්න ආස හිතුණා. අනෙක් අතට කවුරුහරි අපිට අභියෝගයක් කළොත් ඒ දේ කරන්න තල්ලුවෙන්න තිබෙන ඉඩකඩත් වැඩියිනේ. ඝරසරප චිත්‍රපට පෙන්වීමෙන් වුණු අසාර්ථකත්වය නිසා පසු බසින්නේ නැතිව මෙය හරි තැනට ගෙනල්ලා ක්‍රමවත් විදිහට හරි ක්‍රමයක් හදනවා කියන අභියෝගය මම මටම කර ගත්තා. මම මෙහිදි විශේෂයෙන්ම මතක් කරන්න ඕන ඕස්ට්‍රේලියාවේ ජීවත් වන මගේ මිත්‍ර මාලක යාපාව. ඔහු ඔස්ට්‍රේලියාවේ ර්ඥඨච තඪමඥ ඥමඥදබඵ නමින් මේ වැඩේම කරනවා. මාලක යාපා සහ මම අතර ඇති මිත්‍රත්වය හරහා තමයි අපි මේ ඔස්ටේ‍්‍රලියාව කැනඩාව හා ලංකාව කියන මේ තුන්කොනම යා කළේ.

කැනඩාව වගේ රටක අපේ චිත්‍රපට පෙන්වීම ආවාට ගියාට කරන්න බැහැනේ. එය හරියාකාරව කරන්න නම් යම් ක්‍රියාපටිපාටියකට අනුව කටයුතු කළ යුතුයි?

අපි මුලින්ම චිත්‍රපට පෙන්වූවේ කුලී පදනම මත ලබාගත් සිනමාශාලාවල. බොහෝ වෙලාවට අපිට ලැබුණේ අනෙක් චිත්‍රපට පෙන්වීමට කලින් උදේ වරුවේ වෙලාවක්. එය චිත්‍රපටයක් මිනිස්සුන්ට පෙන්වීමට හරිම අපහසු වෙලාවක්. පසුව අපි මෙහි කළමනාකාරිත්වය සමඟ කතා කරලා චිත්‍රපට පෙන්වීමට අපිට සාමාන්‍ය වෙලාව ලබා දෙන්න කියන ඉල්ලීම කළා. ඔවුන් අපෙන් ඇහුවා ඔයාලට ශ්‍රී ලාංකේය සිනමාවක් තිබෙනවාද කියලා. ඒ වෙලාවේ මම ලබා දුන් පිළිතුර සමඟ ඔවුන් අපිට අවස්ථාව ලබා දෙන්න තීරණය කළා. පසුව අපට අවස්ථාව ලැබෙනවා ප්‍රධාන ධාරාවේ සිනමශාලාවල අපේ චිත්‍රපට පෙන්වීමට. කතුරු මිතුරු චිත්‍රපටය ප්‍රදර්ශනය වනතෙක්ම කුලීපදනම මත සිනමාශාලා රැගෙන චිත්‍රපට පෙන්වූයේ. දැන් අපිට හොලිවුඩ් බොලිවුඩ් චිත්‍රපට පෙන්වන සිනමාශාලා 20ක් පමණ තිබෙන සිනමාශාලා සංකීර්ණයක් ඇතුළේ අපිට අපේ චිත්‍රපට පෙන්වන්න අවස්ථාව තිබෙනවා.

 

ඝරසරප චිත්‍රපටයෙන් පටන්ගෙන කොපමණ චිත්‍රපට පෙන්වලා තිබෙනවාද?

ඝරසරප චිත්‍රපටයෙන් පසුව තාල, විජයබා කොල්ලය, රෂ්, යූටර්න් පෙන්වන්න සිටියත් අපිට පෙන්වන්න හැකිවුණේ නෑ කොරෝනා වසංගතය නිසා. තිරගත කරන්න දින නියමවෙලා තිබුණත් ඒ වනවිට මෙහෙ කොරෝනා නිසා පනවා තිබුණ සීමාවන් නිසා අපිට එය පෙන්වන්න පුළුවන් වුණේ නැහැ. 2020 මාර්තුවල සිට 2022 මාර්තු දක්වා සම්පූර්ණ වශයෙන් සිනමාශාලා වසා දැමීම සහ කොරෝනා නිසා පනවා තිබූ සීමා නිසා චිත්‍රපට පෙන්වූයේ නැහැ. මාර්තුවල පනවා තිබූ සීමාවන් අයින් වුණා ඒ එක්කම අපි කතුරු මිතුරු චිත්‍රපටය පෙන්වන්න ආරම්භ කළා. පසුව ආශාවරි දැන් ආදරණීය ප්‍රාර්ථනා.

 

කැනඩාවේ ශ්‍රී ලාංකිකයන් අතර ශ්‍රී ලාංකික දෙමළ පිරිස වැඩි වශයෙන් ඉන්නවා. කොහොමද ඔවුන්ගෙන් ලැබෙන ප්‍රතිචාර?

ටොරොන්ටෝවල අපි කතුරු මිතුරු සිංහල චිත්‍රපටය තිරගතවෙද්දි දෙමළ ජාතිකයන් ඇවිත් සිටියා චිත්‍රපටය බලන්න. ඇත්තටම ඔවුන් සහයෝගය දෙනවා. ඔවුන්ට සිංහල හරි හැටි නොතේරුණත් ඔවුන්ගෙන් හොඳ සහයෝගයක් ලැබෙනවා.

 

කෝටි ගණන් වියදම් කර නිමැවෙන හොලිවුඩ් බොලිවුඩ් චිත්‍රපට පෙන්වන සිනමාශාලා සංකීර්ණයක සිංහල චිත්‍රපට පෙන්වීමම අරුමයක්. සිංහල චිත්‍රපට බලන්න ප්‍රේක්ෂකයා ගෙන්වගන්න මොනවද භාවිත කරන උපක්‍රම?

අපි ශ්‍රී ලංකාවේ නිෂ්පාදනය වන සහ එළියට එන හැම චිත්‍රපටයක්ම ගන්නේ නැහැ. යම්කිසි ප්‍රමිතිකරණයක් අපේ තියෙනවා. උදාහරණ විදිහට කතාව, වර්ණ භාවිතය, කැමරාව හසුරවා ඇති ආකාරය, තාක්ෂණය, නළු නිළියන්, කතා තේමාව, වාණිජ වුණත් කලාත්මක වුණත් මේ වගේ දේවල් බලනවා. සිනමාපටයක් බලන ප්‍රේක්ෂකයා යම් ආස්වාදයක් ලබාගත හැකි ඔළුවට වදයක් නොවන සිනමාකෘති තෝරාගන්නවා. අපේ සමීක්ෂණවල තිබෙන දත්ත අනුව අපි දන්නවා මෙහෙ අය බලන්න කැමැති මොනවගේ චිත්‍රපටද කියලා. ඒ අනූව ප්‍රේක්ෂකයා අවශ්‍ය දේ ගන්නවා. ලංකාවේ තරුණ අධ්‍යක්ෂකවරු ඉදිරියට එන්න ඕන. ඒ අය තමයි අපේ කලාවේ කොඳු නාරටියවෙන්නේ. ඔවුන්ව ශක්තිමත් කළේ නැත්නම් කලාවේ ඉදිරිය ගැන හිතන්න අපහසුයි. ඒ නිසා විශිෂ්ට නිර්මාණ වගේම ගුණාත්මකබවින් යුතු අලුත් පරම්පරාවේ චිත්‍රපටත් අපි පෙන්වනවා.

 

ලංකාවේ චිත්‍රපට නිර්මාණය කරලා පෙන්වගන්න විදිහක් නැතිව ළඟ තබාගෙන ඉන්න චිත්‍රපට අධ්‍යක්ෂවරුන්ට කැනඩාවේ ඔවුන්ගේ චිත්‍රපටය පෙන්වගන්න මොනවද කරන්න ඕන?

අපිට දුරකථන ඇමතුමකින් හෝ අපේ වෙබ් අඩවියට ගිහින් හෝ අපේ ඊමේල් ලිපිනයට පණිවුඩයක් එවා අප සමඟ සම්බන්ධවෙන්න පුළුවන්.

 

ලංකාවේ චිත්‍රපටයක් නම් දින පනහා දින සියය වගේ තිරගතවනවා. කැනඩාවේ කොමපණ කාලයක් එක චිත්‍රපටයක් තිරගත වෙනවාද?

මුල්කාලෙදි හැම නගරයකම එක දවසයි සිනමාපට පෙන්වූයේ. අපි දැන් හදලා තිබෙන ක්‍රමවේදය තුළ ඒ චිත්‍රපටයට තිරගතකර මුල් දවස් කිහිපය තුළ හොඳ ප්‍රතිචාර ලැබුණොත් පෙන්වන දින ගනණ වැඩි කරන්න පුළුවන්. ලංකාවේ අපේ අය ඇවිත් අපේ චිත්‍රපට වැඩි වැඩියෙන් බලනවානම් අපිට පුළුවන් චිත්‍රපට වැඩි දින ගණනක් තිරගත කරන්න.

 

සිනමාශාලාවක චිත්‍රපටයක් පෙන්වූ පමණින්ම ප්‍රේක්ෂකයා එන්නේ නැහැනේ. එයට යම් ප්‍රචාරයක් අවශ්‍යයයි. කැනඩාවේ කොහොමද ඒ කාර්යය සිදුවෙන්නේ?

මූලිකවම අපේ වෙබ්සයිට් ඔස්සේ ප්‍රචාරණ කටයුතු කරනවා. ඒ වගේම සමාජ මාධ්‍ය උපයෝගී කරගන්නවා. ශ්‍රී ලාංකේය ප්‍රජාව අතර කට වචනයෙන් ලොකු ප්‍රචාරයක් සිදුවෙනවා අපේ අය අතර. ඒ වගේම සිංහල දෙමළ කඩවල අපි පෝස්ටර් අලවනවා. ඛ්රතධදඥඥදබඥපබචඪදථඥදබ කියන වෙබ් අඩවියට හිගින් සබ්ස්ක්‍රයිබ් කරන හැමෝටම ඊළඟට පෙන්වන චිත්‍රපටය මොකද්ද කියලා බලාගන්න පුළුවන් ක්‍රමවේදයක් හදලා තියෙනවා. අපේ දත්ත ගබඩාවක් තිබෙනවා. ඒ වගේම ලංකාවේ ඉන්න අපේ චිත්‍රපට අධ්‍යක්ෂවරු සහ නිෂ්පාදකවරුන්ගේ උපරිම සහයත් ලැබෙනවා මේ වෙනුවෙන්.

 

ඔබ ව්‍යවසායකයන් නිර්මාණය කරන ව්‍යවසායකයෙක්. මේ ව්‍යාපාරය හරහා ලාභ ලබන්න පුළුවන් වුණාද?

කලින් තිබුණු ක්‍රමය මත ඒ කියන්නේ සිනමාශාලා කුලියට ගෙන චිත්‍රපට පෙන්වීමෙදී ලාබ ලබන්න අපහසුයි. අද අපි නිර්මාණය කරගෙන තිබෙන ක්‍රමවේදය තුළ ලාබ ලබන්න පුළුවන්. එයිනුත් වැඩි වාසියක් චිත්‍රපයේ නිෂ්පාදකට ලැබෙනවා. ඒ වගේම බෙදාහරින සමාගමටත් ලැබෙනවා. නිෂ්පාදකවරුන්ට ඉස්සර තිබුණු ක්‍රමයට වඩා වැඩි වාර ගණනක් චිත්‍රපටය පෙන්වන්න, වැඩි ප්‍රේක්ෂකයෝ ප්‍රමාණයකට චිත්‍රපටය බලන්න පුළුවන් ක්‍රමවේදය හදන්න අපිට හැකි වුණා. එයින් යම් ලාබයක් ලබන්න පුළුවන්. විනෝදාස්වාදය කියන්නේ මිනිසුන්ගේ අවශ්‍යතාවක්. අපි මේ කරන්නේ සේවයක්. මුදලින් ලාබ ලබනවට වඩා මේ කරන සේවය තුළින් ලැබෙන ලාබය විශාලයි.

 

විනෝදාස්වාදය ලැබෙන චිත්‍රපට හෝ වේවා ගීත හෝ වේවා මේවාගේ අයිතිය පිළිබඳ මතුවන ප්‍රශ්න බොහොමයි. කැනඩාවේ සිංහල චිත්‍රපට පෙන්වීමෙදී අයිතියට මොකද වෙන්නේ?

කැනඩාවේ චිත්‍රපට ප්‍රදර්ශනයේදී අපිට සම්පුර්ණ ප්‍රදර්ශන අයිතිය හා බෙදාහැරීමේ අයිතිය තිරගත කිරීමේ අයිතිය වගේම කොපි රයිට්ස් සිලෝන් එන්ටර්ටේන්මන්ට් ආයතනය සතුවනවා. ඒක අධ්‍යක්ෂකවරයා හෝ නිෂ්පාදකවරයා කවුද අපි එක්ක එකඟතාවයකට පැමිණෙන්නේ ඒ කෙනා එක්කයි අපේ නීත්‍යානුකූල බැඳීම තිබෙන්නේ. අප සමඟ එකඟතාවයකට පැමිණෙන පුද්ගලයා තමයි ලංකාවේ නීතියේ දී යම් කිසි දෙයක් වුණොත් වගකීම ගන්නේ. ප්‍රදර්ශන අයිතිය, බෙදාහැරීමේ අයිතිය හා පිටපත් කිරීමේ අයිතිය අපිට ලැබිය යුතුමයි. නැත්නම් කැනඩාවේ චිත්‍රපට පෙන්වන්න බැහැ.

 

කැනඩාවේ ඉන්න ශ්‍රී ලාංකිකයන්ට සිංහල චිත්‍රපට බලන්න පුළුවන් මොන මොන නගරවලද? මොන මොන සිනමාශාලා සංකීර්ණවලද?

අපිට මෙහෙ වෙස්ටර්න් කැනඩා සහ ඔටාරියෝ කියන ප්‍රාන්ත දෙකේ.කැනඩාවේ චිත්‍රපට ප්‍රදර්ශන ආයතන දෙකයි තිබෙන්නේ සිනේප්ලෙක්ස් සහ ලෑන්ඩ්මාර්ක්. එයින් ලෑන්ඩ්මාර්ක් සිනමාශාලා කියන්නේ කැනඩාවේ උසස් මට්ටමේ සිනමාශාලාවන්. එහි අපිට ලැබිලා තිබෙන්නේ චිත්‍රපට පෙන්වීමට. බටහිර ප්‍රදේශයේ කැල්ගරි, එඩ්මන්ටන්, සරෙ සහ විනිපෙග් කියන නගරවල අපිට ප්‍රදර්ශන අයිතිය දැනට අපි ඉල්ලපු නගර හතරෙම අපිට ලැබිලා තිබෙනවා. විනිපෙග්හි චිත්‍රපට ප්‍රදර්ශනය සඳහා යන වියදමට සාපේක්ෂව බලන ප්‍රේක්ෂකයාගේ අඩුව නිසා අපි තාවකාලික එහි ප්‍රදර්ශන කටයුතු නවතලා තිබෙනවා. වෙනිපෙග් සිටින ශ්‍රී ලාංකිකයෝ චිත්‍රපට බලනවානම් සිනමාශාලාවට ඇවිත් අපිට එහි චිත්‍රපට ප්‍රදර්ශනය කිරීම පිළිබඳ සලකා බලන්න පුළුවන්. ටොරොන්ටෝ සහ ඔටාවා කියන නගරවල චිත්‍රපට ප්‍රදර්ශනය ආරම්භ කරන්න බලාපොරොත්තුවනවා.

 

මොකද්ද මේ වනවිට තිරගත වන චිත්‍රපටය?

ආදරණීය ප්‍රාර්ථනා චිත්‍රපටය තිරගතවෙන්නේ. ඉතා හොඳ ප්‍රතිචාර තිබෙනවා. විශේෂයෙන්ම කියන්න ඕන ලංකාවේ සමහර අවස්ථාවන් ඍජුවම මෙහෙට බලපාන අවස්ථා තිබෙනවා. විශේෂයෙන්ම අරගලය වගේ දේවල්. එහෙම වුණාම අපි චිත්‍රපට ප්‍රදර්ශනය කරන්නේ නෑ. ඒකට ඉඩදීලා ඉන්නවා. ඉදිරියට මාස තුන හතරකට චිත්‍රපට පෙන්වන්න අපි සූදානම් කරගෙන ඉන්නවා. බෙනට් රත්නායකගේ කවුරුවත් දන්නේ නෑ, තට්ටු දෙකේ ඉස්කොලේ ලංකාවේ ප්‍රදර්ශනයට ප්‍රථම කැනඩාවේ ප්‍රදර්ශනය කිරීමට නියමිතයි. තව සිනමාපට කිහිපයක් අධ්‍යයනය කරමින් ඉන්නවා.

 

මේ තරම් වැඩ කරන ඔබේ පවුලේ ගැනත් කියමු?

මගේ බිරිඳ සහ මට දියණියන් දෙදෙනෙක් ඉන්නවා. ඒ අය මෙහෙ අධ්‍යාපනය ලබනවා. ඒ අයව මම එක්ක යනවා සිංහල චිත්‍රපට පෙන්වන්න. සිලෝන් එන්ටර්ටේන්මන්ට් ආයතනයේ ඇයත් මමත් එකට වැඩ කරනවා. මගේ නැගණිය ලංකාවේ ඉන්නේ ඇය මට ලොකු සහයෝගයක් ලබා දෙනවා. ඒ වගේම මගේ දෙමාපියන් මට ලොකු දිරිගැන්වීමක් ලබදෙනවා මගේ වැඩවලට.