තරුවක වූ පසු එම තරු ගුණය දිගු කාලීනව පවත්වා ගැනීම අසීරු කටයුත්තකි. එය එසේ වුවත් අජේ දේව්ගන් දශක තුනක් තිස්සේ ඔහුගේ තරු ගුණය ඉහළින්ම පවත්වා ගැනීමට සමත් වී ඇත. 

අජේ හට විවිධ වයස් කාණ්ඩ නියෝජනය කරමින් විශාල රසික පිරිසක් සිටී. ඔහු පසුගියදා ඔහුගේ රසික රසිකාවන් පිරිසක් හමුවිය. එම අවස්ථාවේදී රට පුරා සිටින රසිකයෝ ඔහු හමුවීමට පැමිණ ඔහුගේ සමරු අත්සන සහ පින්තූර ලබා ගත්හ. ඒ අතරින් එක් රසිකාවක වූ සාරිකා ගුප්තා අජේගේ අත්සන ලබා ගත්තාය. පසුව එය ඇගේ අතේ පච්චයක් ලෙස කොටා ගත්තාය.

ඇය සමාජ මාධ්‍ය ඔස්සේ පච්චයේ පින්තූර බෙදා ගත්තේ මෙලෙසිනි. "පසුගිය වසර දෙක සෑම අංශයකින්ම දුෂ්කර විය. නමුත් රසිකාවක ලෙස මම පවසන්නේ දුර සිට අජේ දේව්ගන් දැකීමට අපහසු වූ බවයි. එම වසර දෙකෙන් පසු මට මුම්බායි වෙත යාමට හැකි වූ අතර මගේ ප්‍රියතම නළුවා හමුවීමට විශේෂ අවස්ථාවක් උදා විය". අජේ ද ඔහුගේ ඉන්ස්ටග්‍රම් ගිණුමේ එම රසික හමුවේ ඡායාරූප සමඟ මෙසේ ලිවීය. "පසුගිය වසර දෙක දුෂ්කර වූ බව මම දනිමි. රටේ විවිධ ප්‍රදේශවලින් පැමිණි ඔබ සැමට ස්තූතියි. ඔබගේ ආදරයට සහ සහයෝගයට සදා කෘතඥ වෙමි".

අජේ නව වසරේදී 'ආර්ආර්ආර්', 'ගංගුබායි කැතියාවාඩි' සහ 'රනවේ 34' සමඟින් රිදී තිරයට පැමිණීමට නියමිතය. ඊට අමතරව ඔහු මේ වන විට ඔහුගේ මීළඟ අධ්‍යක්ෂණය වන 'මේඩේ' චිත්‍රපටයේ රූගත කිරීම් කරමින් සිටින අතර පාපන්දු පුහුණුකරුවෙකුගේ චරිතයට පණ පොවන 'මයිඩාන්' නිකුත් කිරීමට බලාපොරොත්තුවෙන් සිටී.